Sorumutuk estraordináriu Konsellu Ministrus nian iha loron 2 fulan-juñu tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 2 fulan-juñu tinan 2015
Komunikadu Imprensa
Sorumutuk estraordináriu Konsellu Ministrus nian iha loron 2 fulan-juñu tinan 2015
Konsellu-Ministrus hala’o sorumutuk estraordináriu iha tersa ne’e, loron 2 fulan-juñu tinan 2015, iha sala sorumutuk Konsellu Ministrus nian, iha Palásiu Governu, iha Dili, no hato’o ninia sentimentu tristeza ne’ebé kle’an tanba lakon ninia membru ida, Ministru Estadu Koordenadór Asuntu Sosiál no Ministru Edukasaun, Dr. Fernando La Sama de Araújo, hodi hakamtek minutu ida ba ninia omenajen.
Iha sorumutuk ne’e, Konsellu Ministrus aprova ona Dekretu Governu nian kona-ba Lutu Nasionál hodi fó onra ba Fernando La Sama de Araújo, ne’ebé sei hala’o to’o tuku 24:00 loron 5 fulan-juñu nian, no foti desizaun hodi propoin ba Prezidente Repúblika atu fó kondekorasaun ida ho títulu póstumu nian.
Durante períodu Lutu Nasionál nian ne’e, Bandeira Nasionál sei dada to’o klaran de’it. Serimónia hakoi-mate-isin nian, Ministériu Solidariedade Sosiál nian maka sei organiza, ho kolaborasaun husi Ministériu Administrasaun Estatál.
Fernando La Sama De Araújo hakotu nia iis, ohin, loron 2 fulan-juñu tinan 2015, iha oras tuku 8 minutu 30, iha Ospitál Nasionál Guido Valadares, iha Díli.
Nia sai hanesan lider RENETIL nian, movimentu rezisténsia estudante nian hasoru rejime okupasaun indonézia nian iha Timor-Leste, no sai mós hanesan fundadór organizasaun ne’e nian ida iha Indonézia, iha loron 20 fulan-juñu tinan 1988.
Sekretáriu-Jerál RENETIL nian, Fernando La Sama de Araújo tama kadeia iha loron 24 fulan-novembru tinan 1991 iha Denpasar, Bali, no tuirmai transfere fali ba Jakarta hanesan dadur polítiku; liutiha julgamentu, nia kumpre kadeia tinan neen fulan haat iha kadeia Cipinang, iha Repúblika Indonézia.
Iha tinan 1988, nia lidera pedidu azilu polítiku ba Embaixada Japaun no Vatikanu nian iha Jakarta.
Fernando La Sama de Araújo nu’udar fundadór Partidu Demokrátiku nian ida mós, iha tinan 2000, ne’ebé nia maka sai hanesan Prezidente to’o ohin loron.
Nia nu’udar Vise-Ministru Negósiu Estranejeiru no Kooperasaun nian iha Governu Tranzisan II, husi loron 20 fulan-setembru tinan 2001 to’o loron 19 fulan-maiu tinan 2002, no hanesan mós membru Asembleia Konstituinte nian.
Husi tinan 2007 to’o tinan 2012, kaer knaar hanesan Prezidente Parlamentu Nasionál, no hala’o knaar temporáriu, hanesan Prezidente Repúblika interinu Timor-Leste nian, hafoin mosu atentadu hasoru Dr. José Ramos Horta, iha loron 11 fulan-fevereiru tinan 2008.
Hala’o knaar hanesan Vise-Primeiru-Ministru Koordenadór Asuntu Sosiál nian iha tempu Governu Konstitusionál V nian no, hahú husi fulan-fevereiru tinan ida ne’e nian, sai hanesan membru Governu Konstitusionál VI nian, hodi okupa kargu sira maka hanesan Ministru Estadu Koordenadór Asuntu Sosiál no Ministru Edukasaun nian.
