Ministru Estadu, Koordenadór Assuntu Ekonomiku no Ministru Agrikultura no Peska, Estanislau da Silva, lansa Primeira Pedra ba Projetu Rehabilitasaun no Melloramentu hosi eskema irrigasaun Bulutu, Suku Hatu – Ralan, Postu Administrativu Laleia, Munisípiu Manatutu iha loron kinta, 7 fulan-maiu 2015.

Akompaña iha lansamentu ne’e, Asesór Espesiál ba Primeiru Ministru Japaun nian, Taro Kimura, Ministru Planeamentu no Investimentu Estratéjiku Governu Konstitusionál VI, Kay Rala Xanana Gusmão, no eis Ministru Agrikultura no Peska, Mariano Asanami Sabino.

Ministru Estanislau da Silva, hateten, konstrusaun ne’e hanesan realizasaun husi planu ne’ebé Governu Japaun hato’o ona nia interese atu harii irrigasuan ne’e dezde Governu Konstitusionál V.

Governu Japaun suporta ho osan hamutuk millaun USD $ 14 no Asesór Espesiál ba Primeiru Ministru Japaun nian, Taro Kimura, mós husu atu utiliza didi’ak irrigasaun hodi lori benefísiu ba povu agrikultór. Irrigasaun Buluto sei lori bee ba natar hamutuk ektár 780, atubele benefisia uma kain 600. Governu Timor-Leste fasilta de’it livre husi taxa ba materiál sira ne’ebé governu Japaun lori mai atu uza ba konstrusaun irrigasaun. Projetu ne’e sei remata iha fulan-outubru 2016.

Ministru Planeamentu Investimentu Estratéjiku Timor-Leste, Kay Rala Xanana Gusmão husu ba povu agrikultór iha Laleia (Manantutu) no Vemase (Baukau) atu uza no tau-matan  didi’ak ba fasilidade hirak ne’e.