Primeiru Ministru, Dr. Rui Araújo, lidera delegasaun governamental durante vizita dahuluk (06/03) VI Governu Konstitusional nian ba iha Municipiu Lautem hodi partisipa iha serimonia fahe karteiras ba eskola-eskola iha munisipiu ne’e.

Serimonia ne’e organiza husi Ministeriu Edukasaun no Primeiru Ministru nia vizita dahuluk ba Munisipiu Lautem, akompaña husi Ministru Estadu, Koordenador Asuntu Sosial no Ministru Edukasaun, Fernando La-sama de Araújo, Ministra Saúde, Maria da Costa, Administrador Munisipiu Lautem, Zeferino dos Santos Sequeira, Prezidente Conselho Veteranus Regiaun 1, Ponte Leste, Virgilio Smith, Prezidente Komisaun Homenajem Munisipiu Lautem, Renan Sela no Diretores sira seluk hosi Administrasaun Munisipalidade nian.

Povo Lautem sente orgulhu tamba Munisipiu Lautem nudar Munisipiu ba dahuluk ne’ebe Primeiru Ministru Araújo vizita hafoin assume kargu nudar Primeiru Ministru ba VI Governu Konstitusional ba Timor-Leste nian. Durante serimonia ida ne’e, reprezentante sira hosi VI Governu Konstitusional simbolikamente intrega karteiras rihun 4 resin ba Munisipiu Lautem.

Hafoin partisipa iha serimonia fahe karteiras, Primeiru Ministru akompanya husi Ministru Edukasaun, Fernando La-sama de Araújo no kometiva tomak halao enkontru kortezia ho Diretores Eskola sira husi Munisipiu Manatuto, Baucau, Viqueque no Lautem ho tema Construir a Nação Através de Uma Educação de Qualidade.

Primeiru Ministru Araújo iha nia intervensaun hateten kargu ne’ebe nia asumi ne’e hanesan cruz ida tamba konfiansa lider istoriku sira, fo nia simu todan ne’e maibe katak prinsipiu ba VI Governu Konstitusional no lema mak Um por Todos, Todos por Um.

Primeiru Ministru rekonhese frajilidade Setór Administrasaun Públika, maske VI Governu Konstitusional adopta liafuan tolu nudar prinsipiu atu halao governasaun ida ne’e: Disiplina, Rigor, no Firmeza.

Iha enkontru ida ne’e Primeiru Ministru mos rona hanoin ne’ebe hatoo husi Direktores Escola sira nian. Diretores Escola mos hatoo sira nia preokupasaun kona-ba: jestaun pagamentu ne’ebe la lao diak; kona ba avaliasaun aplikasaun iha sistema edukasaun no kurrikulu la hapar ho nesesidadi iha rai laran; katak Program Merenda Escolar adianta tinan ida ne’e; presiza iha aumenta siguransa ba Escolas no alunus; katak presiza avalia nivel profesore sira nian, presiza tau matan ba Professores nia moris diak nebe inklui salariu, alojamentu, transporte, tratamentu saude, formasaun no pensaun ba profesores sira.

Primeiru Ministru Araújo uja biban ida ne’e responde mos ba preokupasaun profesores sira kona ba Pensaun ba Profesores, Ministeriu Solidaridadi Sosial iha ona Rejime Temporariu no iha tinan rua nia laran, VI Governu sei halo esforsu atu hamosu Lei Pensaun nebe abranje Funsionarius hotu-hotu.

Halo parte mos ba visita dahuluk ba Administrasaun Munisipiu Lautem nian, Primeiru Ministru Araújo halao vizita-surpresa ba Centru Saúde Laga nian, Centru Saúde Lautem no ba Ospital Referral Baucau hodi hare kondisaun real fatin hirak ne’e.