Sorumutuk Konsellu Ministrus nian iha loron 12 fulan-maiu tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 12 fulan-maiu tinan 2015
Komunikadu Imprensa
Sorumutuk Konsellu Ministrus loron 12 fulan-maiu tinan 2015
Konsellu Ministrus hala’o sorumutuk tersa ne’e, iha loron 12 fulan-maiu tinan 2015, iha sala sorumutuk Konsellu Ministrus nian, iha Palásiu Governu iha Dili no aprova ona:
1. Dekretu-Lei ne’ebé aprova Orgánika Ministériu Agrikultura no Peska nian
Dekretu- Lei n.u 6/2015, loron 11 fulan-marsu, ne’ebé aprova Orgánika Governu Konstitusionál VI, reformula ona atribuisaun sira hosi Ministériu Agrikultura no Peska hodi reflete klaru liu ba polítika Governu nian ba setór, hodi reforsa liuliu ninia knaar sentrál iha protesaun no konservasaun ba natureza no biodiversidade.
Estrutura Ministériu Agrikultura no Peska nian ne’e mós iha fleksibilidade, hodi garante koordenasaun no artikulasaun ida ne’ebé di’ak hosi ninia orgaun sira, nune’e hadi’a di’ak liután prestasaun servisu ba públiku.
2. Dekretu-Lei ne’ebé aprova Férias Judisiál sira
Dekretu-Lei ne’e estabelese rejime ne’ebé bele aplika férias judisiál sira, hodi determina iha tinan-tinan katak, atividade tribunál sira nian sei suspende ba férias judisiál sira iha loron 1 fulan-agostu to’o loron 15 fulan-setembru, ne’ebé durante periódu ne’e, atividade sira urjente husi tribunál sira, sei hal’o liuhusi turnu. Nune’e fiksa ona periódu úniku ba férias judisiál sira, ne’ebé durante periodu ne’e, tribunál sira suspende sira nia atividae, hodi garante de’it ba prestasaun servisu urjente no servisu hirak ne’ebé mak tenki halo kedas.
Diploma ne’e mós determina katak, majistradu judisiál sira tenki goza sira nia férias tuir regra no periódu ne’ebé mak hanesan ho férias judisiál sira no tenke organiza atu bele asegura servisu turnu nian.
3. Dekretu-Lei ne’ebé aprova Orgánika Sekretaria sira Ministériu Públiku nian
Dekretu-Lei ne’e estabelese no regula estrutura orgánika sekretaria sira Ministériu Públiku nian, ne’ebé mak define ona nia forma orgnizasaun, sira-nia kompeténsia, nia funsionamentu no kolokasaun nia pesoál (ofisiál justisa nian) ne’ebé prevee ona iha Estatutu sira Ministériu Públiku nian.
4. Rezolusaun Governu ne’ebé aprova nomeasaun membru sira Autoridade Rejiaun Administrativa Espesiál Oekusi nian
Diploma ne’e define katak Autoridade Rejiaun Administrativa Espesiál Oekusi Ambenu nian iha periódu dahuluk, kompostu husi membru na’in hitu. Sira ne’ebé hetan neomeasaun mak: Arsénio Paixão Bano, nu’udar Sekretáriu Rejionál ba Edukasaun no Solidaridade Sosiál; Leónia da Costa Monteiro, nu’udar Sekretária Rejionál ba Finansas; Pedro de Sousa Xavier, nu’udar Sekretáriu Rejionál ba Ordenamentu Territóriu no Kadastru; Francisco Xavier Marques, nu’udar Sekretáriu Rejionál ba Administrasaun; Régio Servantes Romeia da Cruz Salu, nu’udar Sekretáriu Rejionál ba Agrikultura no Dezenvolvimentu Rurál; Lusia Taeki, nu’udar Sekretária Rejionál ba Saúde; Inácia da Conceição Teixeira, nu’udar Sekretária Rejionál ba Turizmu Komunitáriu.
Pasta sira Planu no Infraestrutura nian, hanesan funsaun espesífika sira Prezidente Autoridade nian seidauk distribui no aprova ona mós kritériu hirak kona-ba remunerasaun ba membru sira Autoridade Rejiaun Administrativa Espesiál Oekusi Ambenu nian.
5. Rezolusaun Governu nian ne’ebé aprova nomeasaun ba Komisáriu na’in tolu no Prezidente ba Komisaun Funsaun Públika
Governu deside ona atu nomea Faustino Cardoso Gomes atu hala’o mandatu ida tinan lima, iha rejime dedikasaun eskluziva, hanesan Komisáriu no Prezidente Komisaun Funsaun Públika nian. Hetan mós nomeasaun nu’udar Komisária Komisaun Funsaun Públika nian : Maria Domingas Alves no Jacinta Bernardo, atu hala’o mandatu ida ba tinan lima iha rejime dedikasaun parsiál nian.
Atu hanoin fali katak halo parte iha Komisaun Funsaun Públika membru na’in lima, na’in rua hili hosi Parlamentu Nasionál no sira seluk hatudu hosi Governu no husi sira hirak ne’e, Governu sei hili ida nu’udar Prezidente.
6. Proposta Lei kona-ba alterasaun dahuluk ba Lei kona-ba Lideransa Komunitária sira no Ninia Eleisaun
Alterasaun ba Lei n.u 3/2009, loron 8 fulan-junu (Lei kona-ba Lideransa Komunitária sira no Ninia Elisaun) ho objetivu atu garante viabilidade reforma nian ba kuadru jurídiku lideransa komunitária nian sira ne’ebé daudaun ne’e vigora hela, hodi fixa data eleisaun kona-ba lider Komunutáriu sira ba fulan-dezembru, hodi aumenta sira nia mandatu ba fulan rua tan. Define mós katak, Sekretáriu Tékniku Administrasaun Estatál (STAE) mak atu propoin kalendáriu eleitorál, ne’ebé tenke aprova hosi Komisaun Nasionál Elisaun nian (CNE), to’o loron neenulu molok eleisaun.
Konsellu Ministru analiza ona :
1. Aprezentasaun kona-ba konsesaun ba Portu Tibar nian
Modelu Parseria Públiku-Privadu nian, liuhusi konsesaun, aprova tiha ona hosi Konsellu Ministru, iha sorumutuk loron 2 fulan-agostu tinan 2013, hafoin remata tiha estudu tékniku sira no merkadu nian.
Konsellu Ministru analiza ona detalle projetu, ne’ebé mak hato’o husi ekipa interministeriál, kompostu husi Ministériu Finansas, Ministériu Planeamentu no Investimentu Estratéjiku no husi Ministériu Obras Públika, Transporte no Komunikasaun, ho kolaborasaun husi Kooperasaun Finanseira Internasionál (IFC- sigla iha lian inglés). Iha aprezentasaun ne’e foka liubá antesedente projetu no estrutura PPP nian, kona-ba risku prinsipál sira , projesaun cash-flow, kustu projetu nian, benefísiu ekonómiku, aspetu ambientál no sosiál, desizaun sira ne’ebé mak persiza no perfíl husi konkorente sira.
Dadaun ne’e elabora hela versaun finál Kontratu Konsesaun nian atu haruka ba konkorrente sira.
Atu hanoin fali katak, infraestrutura ida ne’e esensiál ba nasaun ne’ebé mak prevee ona iha Planu Dezenvolvimentu Estratéjiku iha 2011-2030, no importante liu bainhira haree katak Portu Díli nian iha movimentu maka’as iha nível tráfegu tasi no mós tráfegu dalan nian.
2. Aprezentasaun kona-ba finansiamentu adisionál husi ADB hodi hadi’a estrada Díli – Tibar nian
Ekipa interministeriál kompostu husi Ministériu Finansas, Ministériu Planeamentu no Investimentu Estratéjiku no mós husi Ministériu Obras Públikas, Transporte no Komunikasaun, hato’o ona ba Konsellu Ministru proposta kona-ba finansiamentu adisionál husi Banku Dezenvolvimentu Ázia (ADB) hodi hadi’a no haluan tan parte husi estrada entre kapitál no Likisá nian. Projektu ne’e atuhodi hadi’a no haluan tan ba faixa haat ne’e, parte husi estrada entre Tasitolu no mós Portu Tibar nian, inklui mós konstrusaun ba rotunda.
Aprezentasaun ne’e foka liuliu ba estudu viabilidade, perfíl empréstimu no mós estrutura implementasaun nian.
