Primeiru-Ministru, Dr. Rui Maria de Araújo, iha loron 13 – 14 Marsu 2015, inaugura mós Osuáriu iha Munisipiu Ainaro.

Dr. Rui Maria de Araújo iha nia diskursu hateten, halot restu mortais hamutuk 2.527 sira signifika fó ónra ba sira. Tanba sira nia isin, ruin no ran ne’ebé naklekar lemo-lemo iha Timor laran tomak, mak ohin loron rai ne’e ukun aan. Governu fó nafatin onra ba luta na’in sira-nia sakrifisiu no ba  veteranus kombatente libertasaun sira-nia sakrifisiu.

“Ema ida sei selu labele. Nuudar timoroan, ita tenki fó valor ba sira-nia sakrifisiu no tenki fó laran ba rai ida-ne’e,” Primeiru-Ministru dehan tan. Rui Araújo, promote, sei tau interese partidu ba kotuk hodi kompromete ba dezenvolvimentu nasionál, hodi realiza matebian sira- nia mehi  hadia povu nia moris.

Prezidente komisaun organizadora ba rekollamentu restu mortais Munisipiu Ainaro, Gil da Costa Alves, haktuir, veteranus munisipiu Ainaro lakohi sai vitima  ba estetmentu  politika sira. Hanesan veteranu, bele aseita  sakrifisiu, maibé  labele  koopera ho organizasaun ilegal sira  ne’ebé kria instabilidade iha nasaun Timor-Leste.

Primeiru-Ministru akompaña husi Ministru Estadu Koordenadór Asuntu Sosiais no Ministru Edukasaun, Fernando Lasama de Araujo, Vise Ministru Solidariedade Sosiál, Miguel Marques Manetelu no Vise Ministra Saúde, Ana Isabel Soares.

Iha vizita ne’e, Primeiru-Ministru, hala’o uluk vizita surpreza ba Óspital Referal Maubesi, Vila Maria, ne’ebé harii tinan atus ida ona no entrega simbolikamente meza no kadeira ba Inan-aman sira hosi alunus Eskola filial Ensinu Baziku  Venâncio Braz.