Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 2 fulan-maiu tinan 2015

Bobby Boye deklara katak nia sala tanba komete fraude hasoru Timor-Leste, tenke selu fila-fali ba Estadu

Eis-asesór jurídiku Governu Timor-Leste nian, Bobby Boye, deklara an katak nia sala duni iha audiénsia públika tanba nia halo fraude hasoru Estadu Timor-Leste nian hodi halakon osan hamutuk dolar millaun 3,51. Boye deklara an iha juís distritál EUA nian ida nia oin, iha Tribunál Federál Trenton, New Jersey, iha loron tersa-feira. Embaixadór Timor-Leste nian ba Estadus Unidus, Domingos Sarmento Alves, marka mós prezensa iha audiénsia ne’e atubele sai hanesan sasin ba Boye nia deklarasaun sira.

Iha fulan-juñu tinan 2014, Bobby Boye autoridade sira kaer iha Aeroportu Internasionál Newark nian no akuza nia halo konspirasaun tanba komete fraude. Ajénsia Investigasaun Federál Estadus Unidus nian (iha inglés: Federal Bureau of Investigation [FBI]) hahú investiga atividade Bobby Bove nian hafoin autoridade sira iha Timor-Leste fó alerta ba sira-nia omólogu sira iha Amérika. Kooperasaun entre FBI no Timor-Leste la’o nafatin to’o oras ne’e.

Boye harii eskritóriu advogadu no kontabilidade fiktísiu nian ida iha Nova Iorke ho naran Opus & Best Law Services LLC (Opus & Best), empreza ida ne’ebé Timor-Leste la hatene katak Boye maka kontrola nonók-nonók husi kotuk, uza ninia pozisaun hodi influensia, rekomenda ba Opus & Best atu simu kontratu husi Governu Timor-Leste nian.

Iha audiénsia ne’e, Bobby Boye dehan katak nia halo ona abuzu ba pozisaun konfiansa nian ida, no halo asaun “ho koñesimentu kona-ba kauza ne’e, no hanoin atu bosok hodi halo duni fraude”. Nia dehan ba tribunál katak nia la fó hatene ba Timor-Leste kona-ba ninia ligasaun ho empreza Opus & Best.

Audiénsia atu hasai desizaun finál prevee ba loron 13 fulan-agostu tinan 2015, hein katak iha ne’e nia bele simu ona kondenasaun ba kastigu iha komarka tinan 4 to’o 6, lahó liberdade kondisionál.

Tuir buat ne’ebé Boye konfesa, nia tenke fó fila ba Estadu Timor-Leste osan ho totál dolar millaun 3,51. Iha faze ida ne’e, tribunál hadau ona nian sasán sira, inklui konta bankária nian sira, propriedade haat, kareta tolu no re lójiu luxu rua. Sasán hirak ne’e sei fa’an hotu atubele fó fila fali osan  Timor-Leste nian ne’ebé lakon ona tanba fraude ne’ebé nia halo.

Iha inísiu tinan 2010 nian, Bobby Boye, sidadaun norte-amerikanu nian ida, ne’ebé Ministériu Finansas Noruega nian mak rekruta atu halo servisu iha Timor-Leste, halo parte iha Projetu Asisténsia Petrolífera Noruega nian (PAPN). Bobby Boye hahú halo servisu iha Timor-Leste hanesan asesór ba Divizaun Fiskál Petróleu nian iha inísiu fulan-juñu tinan 2010. Responsável sira husi Noruega nian sente laran susar tanba labele deteta, durante prosesu rekrutamentu nian, fraude ne’ebé Bobby Boye halo.

Portavós Governu nian, Ministru Estadu Agio Pereira, dehan katak “ susar tebes, bainnira Estadu foun sira sai hanesan alvu kriminizu sira nian ne’ebé aproveita ami-nia  sistema sira no kapasidade ne’ebé foin mak hahú sei fraku hela. Ami simu Bobby Boye ho di’ak bainhira nia tama iha ami-nia nasaun, nu’udar parte husi serbisu di’ak husi ekipa PAPN nian. Triste tebes tanba nia abuza ami-nia konfiansa no halo fraude kontra Estadu. Maibé, ho ninia detensaun, hodi konfesa kona-ba nia sala, hetan kastigu hodi dadur iha komarka no nia hatan ona atu selu fali ba Estadu, ne’e hatudu katak, iha ami-nia kazu, justisa sei iha duni.”