Primeiru-Ministru Dr. Rui Maria de Araújo hala’o vizita ba Timor Gap E.P. Kuarta-feira ne’e(22/04) hodi rona husi Prezidente Francisco da Costa Monteiro kona-ba funsionamentu iha instituisaun públika ne’ebé refere.

Vizita hosi PM ba dahuluk no akompaña hosi Ministru Petróleu no Rekursus Minerál Sr. Alfredo Pires.

Durante enkontru-vizita nian ne’e,  Prezidente Timor Gap halo aprezentasaun ba Primeiru-Ministru Dr. Rui Maria de Araújo kona-ba lala’ok servisu instituisaun nian inklui servisu iha Tasi Timor iha área esplorasaun mina nian no mós kona-ba aspetu tékniku seluk.

Primeiru-Ministru kongratula desizaun ne’ebé halo durante Governu Konstitusionál  V atu Timor Gap sai nu’udar Empreza Públika no mós apresia Prezidente Timor Gap, Monteiro kona-ba servisu ne’ebé hala’o ona to’o o hin loron.

“Timor Gap bele sai hanesan referénsia ida ba instituisaun sira seluk iha estadu nia laran,” tenik  PM Araújo. “Iha parte dezenvolvimentu instituisionál nian, presiza hamosu dinámika prinsípiu negósiu; nune’e katak Timor Gap, hanesan empreza ida importante tebes atu halo desizaun sira bazeia ba prinsípiu emprezariál.”

Primeiru-Ministru hatete mós katak Timor Gap tenki hala’o nia servisu la’ós hanesan departamentu estadu nian. “Estadu-Timor hanesan parte interesada ba empreza Timor Gap tenke tau matan ba empreza ne’e atu bele halo business hodi  Estadu nia naran, maibé la’ós departamentu Estadu ninian. Fatór ne’e importante mak hodi lori Timor Gap bele la’o ba oin.”

Primeiru-Ministru mós hatutan tan katak ho atividade prinsipál ne’ebé mak difini tiha ona, importante ba Timor Gap dezenvolve nia planu negósiu hodi implementa planu negósiu ne’ebé trasa tiha ona.

 “Estadu hanesan parte interesada sei haree kona-ba karáter investimentu ba Timor Gap, maibé Timor Gap mós tenke prova ba estadu katak empreza ida ne’e bele halo duni business no vale apena ba estadu atu investe.”

Primeiru-Ministru hateten mós katak Governu VI ne’e iha tinan rua de’it ba governasaun no labele halo kompromisu barak, maibé karik Timor Gap dezenvolve business plan ida ne’ebé mak di’ak no bele konvense estadu atu investe ba área ida ne’e.

Primeiru-Ministru remata vizita ho fó parabens ba servisu ne’ebé Timor Gap halao durante ne’e no husu atu mantein nafatin servisu ne’ebé di’ak ho profisionalizmu hodi lori empreza públika ne’e ba oin.