Governu Timor-Leste

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 29 fulan-abríl tinan 2015

Timor-Leste hato’o kondolénsia no oferese asisténsia ba Nepál

Governu Timor-Leste hato’o kondolénsia ba Governu no povu Repúblika Demokrátika Federál Nepál nian hafoin akontesimentu estragu sira ne’ebé maka’as no ema barak maka mate tanba rai-nakdoko iha sábadu liubá iha nasaun ne’e. Nepál iha populasaun millaun 26,5 resin no, husi totál ida ne’e, iha estimasaun katak kurakuran ema millaun 8 maka sofre konsekuénsia husi rai-nakdoko ne’e, no to’o oras ne’e iha ona konfirmasaun katak ema rihun-lima resin maka mate no rihun-sanulu resin maka hetan kanek.

Dezastre naturál ida ho dimensaun boot tebes hanesan ne’e nu’udar lakon boot ida ba nasaun ne’ebé de’it no prosesu atu rekupera no rekonstrue sei presiza tinan barak. Konsellu Ministrus Timor-Leste nian deside horseik kontribui dolar amerikanu $500.000 (atus lima) hodi fó apoiu ba vítima sira rai-nakdoko ne’e nian no “hatudu ninia laran-triste ba situasaun ne’ebé povu Nepál nian hasoru.” Governu Timor-Leste nian hahi’i ba sira-hotu ne’ebé envolve iha atividade rezgate no asisténsia médika nian no fó sira nia apoiu ba Governu Nepál.

Portavós Governu Timor-Leste nian, Ministru Estadu Ágio Pereira, hateten katak “Ami mós sente sa’ida maka povu Nepál nian sente iha tempu susar nian ida-ne’e. Povu Timor-Leste solidáriu tebetebes ho povu Nepál.”