S.E. Primeiru Ministru, Dr. Rui Araújo, ho Espoza Dra. Teresa Soares partisipa (07/03) iha marxa hodi komemora Loron Mundial Feto ne’ebe tinan-tinan selebra iha loron 8 fulan Marsu.

Marxa ho tema ‘Halais Igualdade Jéneru iha Timor-Leste’ hahu iha Jardin Solidaridade Motael to’o iha Largo Lecidere, iha Dili, no hetan partisipasaun masimu husi grupu feto nomos mane sira nian, governu, sosiedade sivil no NGO no ajensia internasional sira, no mos reprezentantes korpu diplomatiku rai liur iha Timor-Leste.

Primeiru Ministru Araújo iha nia intervensaun hafoin marxa ne’e husu ba ema hotu iha Timor-Leste atu hare kona ba igualdadi jéneru labele iha numeru deit. “Tenke hare mos indikador seluk hanesaun kualidadi feto sira nia influensia iha parte sira nebe importante no iha vida sosiedade ninian, no Timor-Leste komprova  hela daudauk ona.”

Primeiru Ministru Araújo husu mos ba ema hotu atu refleta mos kona-ba konseitu igualdadi jéneru no aplika ba realidade kultura ema Timor nian.

“Iha kultura Timor, familia importante, maibe ita rekuñesese katak iha familia ninia laran sei iha dizigualdade de influensias, iha dizigualdade de poderes ba desizaun. See ita hare didiak ba ita nia sosiedade, dizigualdade ida ne’e makas liu iha areas rurais laos area urbana. Area urbana agora dizigualdade ida ne’e komesa menus.”

Primeiru Ministru Araújo haktuir tan katak kona ba kestaun feto iha rai laran tenki fo importansia liu ba edukasaun no asesu ba ekonomia ba feto iha Timor-Leste.

Relasiona ho realidade no kontestu Igualdadi de Jéneru, Primeiru Ministru Araújo apela atu labele fo marjem ba revendikasaun  unitaleteral hosi feto sira nian deit no nune’e katak kriak kondisoens para mane mos revendika ninia ubrigasaun atu apoiu feto.

Tuir Primeiru Ministru problema ida iha kestaun dezigualdadi jéneru iha Timor nian mak mane sira seidauk involvidu makas, tan ne’e presiza konsensializa sosiedade no hahu kedas husi uma laran.