Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 9 fulan-abríl tinan 201
Parlamentu Nasionál aprova ona ho unanimidade Orsamentu Governu Konstitusionál VI
Orsamentu Jerál Estadu nian ba tinan 2015 Governu Konstitusionál VI (GK VI) nian, aprova tiha ona iha Parlamentu Nasionál, iha loron 7 fulan-abril nian. Rezultadu votasaun nian mak votu 64 a favor, kontra zeru, tanba na’in ida hosi membru na’in 65 hosi Parlamentu Nasionál mak la marka prezensa tan problema saúde. Bainhira Lei Orsamentu n.u 18/III (3a) promulga tiha husi Prezidente Repúblika, mak remata ona medida lejislativa prinsipál sira atuhodi instala no fornese ekipamentu ba Governu Konstitusionál VI. Medida hirak ne’e inklui aprovasaun Lei Orgánika Governu nian, apresiasaun Programa Governu Konstitusionál VI no aprovasaun Orsamentu Jerál Estadu nian ba tinan 2015.
Orsamentu ne’e aprezenta ona ba Parlamentu Nasionál husi Primeiru-Ministru, Dr.Rui Maria de Araújo, iha loron 1 fulan-abril. Iha loron ne’e dunik aprova tiha iha jeneralidade, hafoin mak Parlamentu Nasionál hahú hala’o fali análise iha espesialidade. Prosesu ida ne’e kontinua durante lokraik tomak iha loron 6 no hakotu iha loron 7 fulan-abril, ho votasaun finál globál, hafoin hala’o tiha diskusaun ba artigu hotu Proposta Lei Governu nian.
Valór totál husi Orsamentu ba 2015 mantein iha totál 1.570. mil millaun dólar. Iha poupansa sira ne’ebé mak hetan iha área pagamentu saláriu no transferénsia públika sira permite aumentu ida ba verba sira ne’ebé aloka tiha ona ba bens no servisu, kapitál menór no kapitál dezenvolvimentu nian.
Iha Orsamentu husi VI Governu Konstitusionál, Autoridade Rejiaun Administrativa Espesiál Oekusi Ambenu no projetu-pilotu ba Zona Espesiál Ekonomia Sosiál ba Merkadu Oe-Kusi Ambenu no Ataúru nian sei simu tranferénsia adisionál ida hamutuk $51,5 millaun dolar, ne’ebé iha 2015 ninia alokasaun totál sa’e tan $133.430 millaun dolar.
Ministériu foun Planeamentu no Investimentu Estratéjiku, ne’ebé nia estrutura inklui Ajénsia Dezenvolvimentu Nasionál (ADN), Komisaun Nasionál Aprovazionamentu (CNA sigla iha lian portugés), Sekretariadu ba Projetu Boot sira no orgaun hirak seluk ne’ebé mak hamutuk iha dezenvolvimentu desentralizadu, sei hetan orsamentu hamutuk 76,5 milaun dollar atu hodi dezenvolve sira nia servisu, atu bele garante katak projetu sira ne’e sei implementa ho lalais, iha baze ida ne’ebé mak di’ak husi kustu-efisiénsia.
Halo mós alokasaun orsamentu estra ba funsionamentu Ministériu Edukasaun no ba servisu Ospitalár sira Ministériu Saúde nian.
Porta-vos husi Governu Konstitusionál VI, Ministru Estadu Agio Pereira, hateten katak “ Governu daudaun ne’e iha komprimisu ida atu implementa asaun no atividade sira ne’ebé mak tau iha ninia Programa atu hodi alkansa dezenvolvimentu ida ne’ebé sustentável no ekilibradu ba Timor-Leste”.