Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 6 fulan-abríl tinan 2015

Iha memória “Don Ricardo” nian

Governu Timor-Leste hato’o ninia laran-triste no sentidu kondolénsia nian ba Bispu Eméritu Dili nian, Don Alberto Ricardo da Silva, ninia mate. Monseñór Ricardo mate iha kinta-feira kalan, iha Ospitál Nasionál Guido Valadares, hafoin hetan moras kle’ur. Nia iha otas tinan 71. Iha loron hirak ikus ne’e, ema atus ba atus maka halibur malu iha Dili hodi hato’o sira nia omenajen ba “Don Ricardo” ne’ebé ema respeitu tebtebes.

Alberto Ricardo da Silva moris iha Aileu, iha loron 26 fulan-abríl tinan 1943.Tama iha semináriu Dili no kontinua ninia estudu sira kona-ba filozofia iha Makau, no kona-ba teolojia iha Portugál. Iha Roma, nia sai hanesan estudante iha Pontifísia Universidade Gregoriana ne’ebé nia hasai ninia lisensiatura iha teolojia espirituál no simu ordenasaun hanesan amu-lulik, iha Portugál, iha loron 15 fulan-agostu tinan 1972. Simu ordenasaun nu’udar Bispu Dioseze Dili nian iha loron 2 fulan-maiu tinan 2004, no husik ninia knaar foin dadaun ne’e, tanba problema saúde.

Don Ricardo hala’o knaar importante ida iha tempu luta rezisténsia Timor-Leste nian, hodi proteje ema barak, liuliu foin-sa’e sira, ne’ebé nia subar iha nia parókia Motael iha fulan-novembru tinan 1991, iha momentu ne’ebé mak akontese Masakre Santa Krus nian. Ho sentidu justisa ne’ebé maka’as no nu’udar bibi-atan ne’ebé iha kbiit, nia sempre buka atu promove protesaun no moris-di’ak.

Durante tinan barak ne’ebé nia serbisu, nia hala’o ona knaar nu’udar amu-pároku, reitór semináriu nian no mós Bispu Dili nian.

Don Ricardo nia moris selebra ohin liuhusi misa ida iha Igreja Katedrál Díli, no hakoi ona iha Semitériu Klerikál iha Ailo’ok-laran. Durante Liturjia, Prezidente Taur Matan Ruak atribui formalmente, ba Don Alberto da Silva, Medalla Estadu nian husi Orden Prezidente Nicolao Lobato, ba knaar importante ne’ebé nia halo iha tempu hirak ne’ebé susar  tebes durante luta ba libertasaun nasionál Timor-Leste nian.

Portavós Governu nian, Ministru Estadu Agio Pereira, hateten katak ”ita hotu laran susar tebes ho Don Ricardo nia mate. Ninia mate halo ita triste, maibé iha tempu hanesan foti aas ita-nia morál hodi fó onra no haksolok ita ho nia eransa kona-ba moris ida ho dedikasaun loloos ba povu Timor-Leste. Don Ricardo hanesan ezemplu loloos kona-ba “bibi atan di’ak” ne’ebé simu no proteje ninia povu sira, sempre preokupa ho sira-nia moris-di’ak, liuliu foin-sa’e Timor-Leste nian sira, ne’ebé mak sei sai hanesan ita-nia lider sira iha futuru. Don Ricardo sei sai nafatin nu’udar naroman ne’ebé leno ita-nia dalan bainhira la’o hanesan nasaun ne’ebé mak orgullu duni”.