Autoridade nivel aas husi Repúblika Populár Xina hasoru malu ho Primeiru-Ministru
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 3 fulan-abril tinan 2015
Autoridade nivel aas husi Repúblika Populár Xina hasoru malu ho Primeiru-Ministru
Primeiru-Ministru, Dr. Rui Maria de Araújo, simu Chen Zhu, Vise-Prezidente Komisaun Permanente Kongresu Nasionál Povu, Repúblika Populár Xina nian, iha Palásiu Governu, iha loron 1 fulan-abríl. Sorumutu ne’e hametin relasaun hirak ne’ebé estabelese ona iha fulan-abríl tinan kotuk, bainhira Primeiru-Ministru Governu Konstitusionál V nian, Kay Rala Xanana Gusmão, hala’o sorumutu ho Prezidente Xi Jinping no ho Primeiru-Ministru Li Kequian, iha vizita ne’ebé hala’o ba Repúblika Populár Xina. Akompaña iha sorumutu ne’ebé Primeiru-Ministru, Dr. Rui Araújo, hala’o ho Vise-Prezidente Komisaun Permanente Nasionál Povu nian maka Ministru Estadu, Agio Pereira, no Vise-Ministru Negósius Estranjeirus no Kooperasaun, Roberto Soares.
Primeiru-Ministru salienta katak tinan ida ne’e sei selebra aniversáriu da-13 kona-ba estabelesimentu relasaun diplomátika entre Xina no Timor-Leste no agradese Governu Xina nian ba vizita ne’e. Xefe Governu nian esplika ba Vise-Prezidente Chen Zhu kona-ba prosesu tranzisaun governamentál, Planu Estratéjiku Dezenvolvimentu nian no progesu resente hirak ne’ebé nasaun ne’e alkansa ona.
Chen Zhu salienta kona-ba relasaun ne’ebé metin entre Timor-Leste no Xina, hodi fó hanoin fila-fali kona-ba Parseria Jerál ida kona-ba Boaviziñansa no Amizade, Fiar Malu no Hetan Di’ak Hamutuk ne’ebé estabelese iha vizita ne’ebé hala’o ba Xina iha tinan kotuk. Autoridade ne’e mós felisita Primeiru-Ministru no Governu foun.
Timor-Leste no Xina tama dadaun iha etapa foun kooperasaun bilaterál nian ida ne’ebé planeada ba tinan 2015/2016. Diálogu kona-ba Kooperasaun Ekonómika no Komersiál tau ona iha ajenda atubele hahú iha loron 16 fulan-abríl tinan 2015. Iha sorumutu ne’e deskute kona-ba kooperasaun iha área oin-oin, maka hanesan seguransa ai-han, saúde, desportu, rekursus umanus, infraestrutura, ambiente, investimentu ekonómiku, seguransa, defeza no turizmu.
Sorumutu ne’e hala’o iha inísiu lorokraik nian, hafoin aprezentasaun Orsamentu Estadu Governu Konstitusionál VI nian ba tinan 2015 ba Parlamentu Nasionál.
Portavós Governu nian, Ministru Agio Pereira, konsidera “vizita Vise-Prezidente Chen Zhu nian ne’e, hanesan hakat importante ida ba relasaun ida ne’ebé forte entre Timor-Leste ho Xina. Relasaun ida ne’e sa’e tan ba nivel foun ida iha tinan kotuk, no Governu iha kompromisu atu kaer-metin nafatin amizade ho fiar malu no benefísiu ba malu ida ne’e”.
