Area komunikasaun iha direitu hodi simu atensaun partikular ne’ebé Governu Timor hakarak realiza no hametin iha ninia mandatu nia laran. Ami nia proposta involve asaun estrutural ne’ebé hala’o ona, hanesan prosesu desentralizasaun Estadu ni-nian ka konversaun husi televizaun Estadu nian ba Empreza Publiku, liu husi hatutan sinal TV ba teritoriu nasional tomak. Ami mós hakarak fo atensaun espesial ba meiu teknologiku sira foun hanesan internet, liu husi dezenvolve nia potensial hodi hakbesik Estadu ba sidadaun sira no mós ba mundu.

Refere ba prosesu Reforma Administrativa, IV Governu Konstitusional rekoñese katak importante tebetebes hadiak asesu sidadaun sira ba informasaun. Hato’o informasaun ba sidadaun sira kona ba asuntu ne’ebé refere ba asaun governativu sai hanesan nesesidade hodi hadiak kualidade relasaun entre Estadu ho sidadaun, no mós pasu importante ba Timor-Leste atu nia bele la’o ho seguransa hodi to’o demokrasia no mós promove konsiensia sivika no partisipasaun ativu husi populasaun iha kestaun ne’ebé refere ba Timor oan sira hotu.

Komponente importante husi servisu ne’e mak loke portal online foun Governu ninian, ne’ebé inklui konteúdu informativu no util ne’ebé ami atualiza beibeik no mós orienta ba ema espesífiku . Uluknanain ami hakarak hakbesik an ba sidadaun Timor oan ne’ebé hela iha Timor-Leste no iha rai-li’ur, no mós buka habadak distansia ho sidadaun hotu-hotu. Tuir mai, ami mós hakarak dada ema estranjeiru, hatudu ita nia rai, ita nia rai-ilas, ita nia povu, ita nia kultura no  kondisaun ne’ebé ami hamosu hela hodi promove area investimentu no turismo,  no simu investidor estranjeiru sira ne’ebé iha hakarak hodi partisipa iha dezenvolvimentu Timor-Leste ninian.

Ami nia konvite mak ne’e.
Mai la’o hamutuk ho ami!