Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 31 fulan-marsu tinan 2015

Governu kongratula PNTL ba ninia Aniversáriu da-15

Iha loron-sesta liubá, iha serimónia ida ne’ebé hala’o atu komemora aniversáriu da-15 Polísia Nasionál Timor-Leste (PNTL) nian, Primeiru-Ministru, Dr. Rui Maria de Araújo, “hato’o ninia felisitasaun kaloroza.” ba PNTL no repete ninia “konfiansa totál” ba instituisaun ne’e.

Partisipa iha serimónia ne’e Prezidente Parlamentu Nasionál, Vicente Guterres, Prezidente Tribunál Rekursu, Dr Guilhermino da Silva, Ministru Interiór, Dr. Longuinhos Monteiro, Xefe Estadu-Maior Jenerál FFDTL nian, Majór-Jenerál Lere Anan Timur, no membru Parlamentu, Governu no Korpu Diplomátiku nian sira.

Serimónia Espesiál hala’o iha Sentru Formasaun Polísia nian iha Komoro inklui pasa revista ba Forsa sira iha parada, fó kondekorasaun no promosaun no fó pose ba ofisiál rua, titulár husi kargu rua ne’ebé aas liu iha instituisaun ne’e.

Komandante-Jerál Júlio Hornay simu pose hodi lidera PNTL no Faustino da Costa simu pose hanesan Segundu Komandante-Jerál.

Primeiru-Ministru agradese ba ofisiál sira ne’ebé simu ona kondekorasaun “ba empeñu, dedikasaun no profisionalizmu ne’ebé sira hatudu ona durante hala’o sira nia knaar. Ezemplu di’ak sira ne’e“ nia hateten ”sira seluk tenke banati tuir no tenke sai komún ba membru PNTL hotu-hotu, atu nune’e bele kria korpu ida ne’ebé omojéneu, uniforme, hetan onra no respeitu husi komunidade ne’ebé mak sira pertense ba.”

Portavós Governu nian, Ministru Estadu Agio Pereira, dehan katak “Ita selebra ita-nia servisu nasionál polísia nian ho orgullu boot. Ita labele konsidera hanesan buat ne’ebé ita hetan nune’e de’it, importánsia husi forsa polisiál timor nian ida ne’ebé simu knaar atu mantein lei no orden no serví povu Timor-Leste nian. Ita felisita feto no mane sira PNTL nian no ita hakarak atu sira hala’o, ho hakasolok, sira nia knaar hodi serví ba Nasaun.”