Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 26 fulan-marsu tinan 2015

Apresiasaun ba Programa hafoin debate konstrutivu iha Parlamentu Nasionál

Horseik, Programa Governu Konstitusionál VI hetan apresiasaun iha Parlamentu Nasionál. Programa ne’e mak sei gia ba atividade Governu nian ba-iha tinan rua ho balun tuir mai.

Primeiru-Ministru Timor-Leste, Dr. Rui Maria de Araújo, nota katak “apresiasaun ba Programa Governu Konstitusionál VI ho sentidu de Estadu ne’ebe boot hosi Deputadu no membru Governu sira hotu” no hato’o mós “agradesimentu ba intervensaun hotu-hotu husi Distintu Deputadu sira nian ne’ebé hariku debate ida ne’e no fó pontudevista ne’ebé útil tebes hodi bele halo implementasaun Programa Governu VI nian no ba Governu nia atuasaun hotu”.

Aprezentasaun, debate no apresiasaun hala’o durante oras 15 no inklui intervensaun 38 hosi deputadu sira no mós intervensaun 34 hosi membru governu sira. Iha kuarta-feira kalan prezidente bankada partidária sira hato’o sira nia apresiasaun ba Programa.

Durante prosesu konstrutivu ne’e mosu pergunta sira kona-ba natureza ambisiozu Programa nian. Primeiru-Ministru, ho kompriensaun kona-ba preokupasaun ne’e hateten katak “Governu hanoin katak ita tenki fiar an, la’o ba oin tanba hamutuk ita bele harii nasaun husi baze, hodi halo mudansa ba Nasaun doben Timor-Leste”.

Portavós Governu Timor-Leste nian, Ministru Agio Pereira hateten “loos duni katak Governu iha ambisaun atu dezenvolve ita nia nasaun, ambisaun ne’e espresa ho klaru iha ita nia Planu Estratéjiku Dezenvolvimentu. Agora tempu atu hasa’e ambisaun hirak ne’e, foka ba implementasaun, hasai “obstákulu sira” no halo buat ne’ebé presiza halo atu hetan rezultadu iha tinan rua ho balun atu mai. Ida ne’e sei nesesita ita hotu nia servisu hamutuk, hako’ak mudansa wainhira nesesáriu no importante liu tau prioridade ba interese Nasaun nian”.