Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 21 fulan-marsu tinan 2015

Primeiru-Ministru fila mai Timor-Leste

Primeiru-Ministru, Dr. Rui Maria de Araújo, ohin fila mai Timor-Leste ho aviaun Air Timor nian ne’ebé semo husi Singapura, no to’o iha Aeroportu Internasionál Prezidente Nicolao Lobato, Dili, iha tuku 14:15. Primeiru-Ministru simu husi nia família, belun sira, membru Governu sira, funsionáriu nivel aas sira husi ninia Gabinete no mós meiu komunikasaun lokál sira. Iha konferénsia imprensa, Primeiru-Ministru Rui Araújo ko’alia kona-ba nia tratamentu saúde no sorumutuk sira ne’ebé mak nia hala’o bainhira nia iha Singapura.

Primeiru-Ministru hala’o sorumutu ho Ministru Negósius Estrangeirus Singapura nian, K. Shanmugam, atu diskuti kona-ba relasaun bilaterál sira entre nasaun rua ne’e, no mós, ho ekipa jestaun ospitalar husi National University Hospital Singapura nian, hodi buka posibilidade atu halo kooperasaun ida ne’ebé boot liután iha setór saúde nian.

Xefe Governu iha biban ne’e hato’o solidariedade Timor-Leste nian, kona-ba kondisaun saúde Primeiru-Ministru dahuluk Singapura nian, Lee Kuan Yew.

Dr. Rui Maria Araújo afirma katak nia agora iha kondisaun saúde ne’ebé di’ak no preparadu atu halo servisu iha semana importante ne’ebé atu mai, ne’ebé sei halo aprezentasaun ba Programa VI Governu Konstitusional nian ba Parlamentu Nasionál, no ne’ebé mak sei hahú mós apresiasaun ba Orsamentu Jerál Estadu Retifikativu, tinan 2015 nian.