Timor-Leste solidáriu ho Vanuatu
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 20fulan-marsu tinan 2015
Timor-Leste solidáriu ho Vanuatu
Governu Timor-Leste hatudu ninia solidariedade ba povu no Estadu Vanuatu nian hafoin hetan destruisaun ne’ebé mosu tanba Siklone Pam. Povu timoroan sira nia hanoin ba hotu família no belun sira ne’ebé kanek no lakon.
Gabineti Koordenasaun Asuntu Umnitáriu Organizasaun Nasoens Unidas nian informa katak siklone ne’e kauza ona, to’o oras ne’e, vítima mortál 11.
Ema liu rihun tolu maka halibur iha sentru evakuasaun 37, ne’ebé maka harii ona iha país nia laran tomak. Autoridade sira deklara estadu emerjénsia iha provínsia Shefa, ne’ebé mós hanesan kapitál país nian, Porto Vila, no iha ne’ebá mós ema besik rihun 80 maka hela iha ne’ebá.
Repúblika Vanuatu iha lasu espesiál amizade nian ho Timor-Leste, ne’ebé hori uluk mós nu’udar defensór ida brani no firme povu timoroan nian iha luta ba independénsia.
Iha tinan 2011, bainhira atu simu Medalla Primeira Klase Ordem Vanuatu nian iha Porto Vila, Kay Rala Xanana Gusmão, hatete ona katak “iha momentu hirak ne’ebé nakukun liu no difísil tebes, bainhira ami mesa-mesak no bele sura de’it ho belun uitoan liu, Vanuatu fó ninia apoiu mai ami. Timor-Leste sei la haluha apoiu ida ne’e.”
“Iha momentu difísil tebes” ne’ebé Repúblika Vanuatu hasoru, Timor-Leste hato’o ninia solidariedade no hahi’i ema hotu ne’ebé maka servisu hodi fó asisténsia ba país ne’e. Ba ninia rekonstrusaun presiza apoiu iha prazu ida naruk.
Portavós Governu Timor-Leste nian, Ministru Estadu Agio Pereira, hatete tan katak “ami lolo liman amizade nian ba Prezidente Baldwin Lonsdale no ba Primeiru-Ministru Joe Natuman, ba Estadu Vanuatu no ba ema hotu ne’ebé afetadu, tanba siklone destruidór ne’e”. FIN
