Primeiru-Ministru alta ona hosi ospitál
Ministru Estadu no Prezidénsia Konsllu Ministrus
Portavós Ofisiál Governu Timor-Leste
Dili, Loron 19 fulan-marsu, 2015
Primeiru-Ministru alta ona hosi ospitál
Primeiru-Ministru, Dr. Rui Maria de Araújo, alta ona hosi National University Hospital Singapura nian horseik no daudaun ne’e hela iha otél ida iha Singapura to’o nia fila fali mai Díli iha sábadu. Primeiru-Ministru rekupera ona nia saúde no sei halo hikas fali konsulta dala ikus nian iha loron sesta molok fila mai.
Ohin dader, Primeiru-Ministru hasoru-malu iha sorumutuk kortezia nian ida ho Ministru Negósius Estranjeirus Singapura nian, K. Shanmugam, atu agradese ba ospitalidade no tulun ne’ebé nia hetan durante hala’o tratamentu no atu hato’o mós Timor-Leste nia solidariedade no preokupasaun ba kondisaun saúde Primeiru-Ministru dahuluk Singapura nian, Lee Kuan Yew.
Durante nia baixa iha National University Hospital Singapura nian, Primeiru-Ministru nu’udar médiku ida, nia hasoru-malu ho ekipa jestaun ospitál nian hodi aprende tan kona-ba oinsá setór saúde funsiona iha Singapura no oinsá iha fasilidade ba ninia populasaun sira. Timor-Leste no National University Hospital Singapura nian hala’o ona servisu hamutuk iha área saúde nian hosi tinan rua ikus no durante sorumutuk, Primeiru-Ministru diskute kona-ba posibilidade atu iha kooperasaun ho Timor-Leste iha tempu oin-mai.
Nia agradese mós ekipa ospitál nian ne’ebé iha atensaun hodi fó asisténsia ba nia.
Primeiru-Ministru mós vizita pasiente timoroan ida ne’ebé daudaun ne’e hetan tratamentu iha ospitál ne’ebá.
Portavós Governu Konstitusionál Da-neen nian, Ministru Estadu, Ágio Pereira, fó-sai katak, Governu no povu Timor-Leste nian sei haksolok tebe-tebes atu ita nia Primeiru-Ministru fila-hikas mai uma iha sábadu”. Nia agradese ba ema hotu ne’ebé asiste nia durante semana liubá inklui médiku no funsionáriu sira Ospitál Nasionál Guido Valadares nian iha Timor-Leste no ekipa médiku iha National University Hospital Singapura no Funsionáriu sira Embaixada Timor-Leste nian iha Singapura”.
