Primeiru-Ministru sei fila hikas mai Timor-Leste iha semana ne’e rohan
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 18 fulan-marsu tinan 2015
Primeiru-Ministru sei fila hikas mai Timor-Leste iha semana ne’e rohan
Primeiru-Ministru, Dr. Rui Maria de Araújo oras ne’e nia saúde di’ak ona no ohin sei alta husi Ospitál.
Tuir Ministru Negósius Estranjeirus no Kooperasaun, Hernâni Coelho, Primeiru-Ministru hahú kedas iha segunda-feira lokraik hala’o ezame klíniku iha National University Hospital Singapura nian (NUHS), no médiku espesialista sira informa katak Xefe Governu sei bele fila hikas mai Díli iha semana ida ne’e nia rohan.
Ministru Hernâni Coelho, hatete, mós katak ohin dadersan, Primeiru-Ministru, Dr.Rui Maria de Araújo, halo sorumutu ho diresaun Ospitál hodi agradese ba dedikasaun no kuidadu ne’ebé sira fó ba nia durante loron hirak ne’e.
Iha sorumutu ne’e, Xefe Governu hatete, koalia mós kona-ba kooperasaun ne’ebé mak estabelese ona tinan rua nia laran entre Timor-Leste no National University Hospital Singapura iha área saúde nian.
Primeiru-Ministru transfere ba Singapura husi Ospitál Nasionál Guido Valadares, Díli, hafoin nia sente moras, iha domingu kalan, wainhira fila husi Ainaru nia vizita servisu.
