Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 16 fulan-marsu tinan 2015

Primeiru-Ministru simu tratamentu médiku iha Singapura

Primeiru-Ministru, Dr. Rui Maria de Araújo, ohin desloka ba Singapura atu halo ezame médiku. Primeiru-Ministru moras iha domingu kalan, hafoin fila hikas husi vizita servisu nian ida ba Ainaru.

Hala’o ona ezame médiku rigorozu sira husi médiku sira Ospitál Nasionál Guido Valadares nian no hosi ezame hirak ne’e hatudu katak sei presiza halo tan teste. Tuir informasaun ne’ebé fó sai iha Konferénsia Imprensa hosi Diretór Ospitál, José António Gusmão Guterres, hatete katak médiku sira rekomenda atu halo transferénsia Xefe Governu nian ba ospitál Singapura nian hodi halo check-up ida kompletu.

Tuir Konstituisaun Repúblika nian, Ministru Estadu no Prezidénsia Konsellu Ministrus, Ágio Pereira, mak sei kaer knaar Primeiru-Ministru nian.

Governu sei kontinua hato’o informasaun sira kona-ba evolusaun estadu saúde Primeiru-Ministru nian no hamutuk ho timoroan hotu-hotu hato’o votu atu bele hetan isin di’ak lalais hodi fila hikas mai Timor-Leste.