………………………………………………………………………………………………………………
Díli, Loron 12 Fulan-marsu Tinan 2015
Komunikadu Imprensa
Sorumutuk Konsellu Ministrus loron 12 fulan-marsu tinan 2015
Konsellu Ministru hala’o sorumutu iha kinta-feira ne’e, loron 12 fulan-marsu tinan 2015, iha sala sorumutuk Konsellu Ministrus nian, iha Palásiu Governu, iha Díli, no aprova ona :
1. Proposta Lei ne’ebé aprova Alterasaun Dahuluk ba Lei n.u 6/2014, iha loron 30 fulan-dezembru, ne’ebé aprova Orsamentu Jerál Estadu nian ba tinan 2015
Alterasaun ne’e reflete ba estrutura orgánika foun Governu Konstitusionál VI nian. Implementa politíka orsamentál ida ne’ebé bele hadi’a di’ak liután formulasaun politíka públika nian sira no ninia implementasaun ba Governu hotu, reforsa planeamentu ba tempu naruk no hasai tiha despeza funsionamentu nian ne’ebé mak la presiza, liuliu ho númeru membru Governu nian ne’ebé mak menus ona. Hakarak katak, ho altersaun ida ne’e, atu aumenta efisiénsia administrativa, no kontinua hasa’e kresimentu ekonómiku sustentável ida no ho kualidade, hamenus ki’ak no hala’o servisu hodi hetan efikásia no efisiénsia ba sidadaun sira.
Atu dehan katak totál valór estimativa ba despezas Orsamentu Jerál Estadu nian (OJE) ba tinan finanseiru ida ne’e la altera, mak millaun 1.570.000 dolar.
2.Rezolusaun Governu ne’ebé Aprova regra hirak Empeñamentu nian ba Forsa Operasioáal sira
Tuir Rezolusaun Governu nian, aprova tiha ona iha sorumutuk extraodinaria Konsellu Ministrus nian iha segunda-feira liu-bá, Komandante FALINTIL-Forsa Defeza Timor- Leste nian (F-FDTL) no Komandu Polísia Nasionál Timor-Leste nian (PNTL) elabora tiha Regra sira Empeñamentu nian ba Forsa-konjunta atu atua bainhira hala’o operasaun konjunta, hodi uza forsa tuir Lei ne’ebé prevee ona iha Seguransa Nasionál nian.
Regra empeñamentu hirak ne’e hanesan matadalan hodi estabelese norma sira klaru no rigorozu tebes ba Forsa-konjunta iha operasaun sira seguransa nian, importante liu mak kona-ba ba uza forsa iha ámbitu atuasaun konjunta ida atu hodi haree ba situasaun ida ne’ebé konsidera grave alterasaun ba ordem públika no kontra Estadu Direitu no paz sosiál.
Governu konkorda ho Regra Empeñamentu sira Forsa-konjunta nian, ne’ebé, hatete katak, respeitu ba direitu, liberdade no garantia sidadaun sira nian, direitus umanus no direitu povu sira nian no prinsípiu legalidade, liu-liu ba norma sira direitu internasionál nian ne’ebé mak vigora.