………………………………………………………………………………………………………………
Díli, Loron 9 Fulan-marsu Tinan 2015
Komunikadu Imprensa
Sorumutuk estraordináriu Konsellu Ministrus nian iha loron 9 fulan-marsu 2015
Konsellu Ministrus hala’o sorumutuk estraordináriu iha segunda-feira ne’e, loron 9 fulan-marsu 2015, iha sala sorumutuk Konsellu Ministrus nian, iha Palásiu Governu, iha Díli. Hosi Sorumutuk ne’e hatuun Rezolusaun Governu nian ne’ebé aprova atuasaun konjunta hosi PNTL no F-FDTL, hafoin liu tiha insidente sira iha Baguia.
Hafoin halo tiha análize kle’an ida ba informasaun kona-ba akontesimentu hirak ne’ebé mosu daudauk iha país, ne’ebé halo problema ba órden públika no autoridade Estadu nian, Konsellu Ministrus rezolve fó kna’ar ba Komandante-Jerál PNTL hodi kria forsa-konjunta ida ne’ebé kompostu hosi PNTL no F-FDTL, atuhodi hala’o operasaun sira seguransa nian ne’ebé envolve forsa rua ne’e.
Tuir medida ne’e, iha akontesementu grave tebes ne’ebé mosu iha madrugada iha loron 8 fulan-marsu tinan 2015, iha postu polisía Baguia nian, ne’ebé elemntu sira PNTL na’in haat maka hetan kanek, estraga rikusoin no sunu populasaun kbiit-laek sira nia uma.
Hahalok sira pertuba órden públika ne’ebé mak bele iha relasaun ho hahalok sira mosu iha loron 15 fulan-janeiru liubá, tenke rezolve ona, tamba sai nu’udar atentandu ida hasoru seguransa nasionál no krime ida ne’ebé labele tolera tan ona. Ne’e tanba lei ne’e bandu atu iha assosiasaun sira ho kilat no organizasaun ne’ebé tipu militár ka paramilitár sira.
Nune’e, hafoin halo tiha análize ba informasaun ne’ebé maka rekolla kona-ba akontesimentu sira ne’e hotu, no hola pozisaun ne’ebé maka relasiona ho situasaun ne’e, liu-liu Parlamentu Nasionál no Prezidente Repúblika, buat hotu hatudu ona katak iha grupu sira ne’ebé involve iha krime organizadu no ho objetivu sira atu hamosu instabilidade iha país ne’e. Rezolusaun ne’e fó-kna’ar ba Xefe Estadu Maior Jeneral F-FDTL no Komandante Jerál PNTL atu elabora no propoin ba Konsellu Ministrus regra sira kona-ba empeñamentu, ne’ebé sei implementa atuhodi previne no bandu atuasaun krimi nian husi grupu ilegál sira ne’ebé kria instabilidade ba-iha país ne’e.