Sorumutuk Konsellu Ministrus loron 3 fulan-marsu tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, Loron 3 Fulan-marsu Tinan 2015
Komunikadu Imprensa
Sorumutuk Konsellu Ministrus loron 3 fulan-marsu tinan 2015
Konsellu Ministrus hala’o tiha sorumutu ida iha tersa-feira ne’e, loron 3 fulan-marsu tinan 2015, iha sla sorumutuk Konsellu Ministru nian, iha Palásiu Governu, iha Díli, no aprova ona Programa Governu Konstitusionál VI nian.
Hafoin halo tiha análize ba esbosu Programa ida uluk, iha sorumutuk estraordinária Konsellu Ministrus nian iha sezta-feira liu ba, introduz tiha alterasaun sira ne’ebé hato’o husi titular sira husi pasta ministeriál ida-idak nian. Testu finál nian halo fila fali ona análize, no aprova tiha husi Konsellu Ministrus, ne’ebé tenke fó fali ba Parlamentu Nasionál iha semana ida ne’e.
Programa Governu Konstitusionál VI aprova tiha iha semana tolu hafoin hala’o tiha tomada pose ba Governu, tuir “sirkunstánsia ne’ebé esesionál husi remodelasaun kle’an husi Governu V nian”, hahú lee iha preámbulu dokumentu nian, ne’ebé hanoin hikas, mós ba “entendimentu komum nesesidade dinámika boot ida tuir efisiénsia no efikásia husi Governu no konverjénsia husi asaun ida boot iha implementasaun ba Planu Estratéjiku Dezenvolvimentu nian tinan 2011-2030 no, importante tebes hadi’a prestasaun servisu sira ba populasaun”.
Maske durasaun ba mandatu ne’e oituan de’it, maizumenus tinan rua, “ Governu iha empeñamentu atu dezenvolve país ne’e, no asume “ kompromisu katak diálogu, konsertasaun no kooperasaun intitusionál, entre ekipa govenamentál, ka entre órgaun sira seluk Estadu nian, fundamentál tebes atu alkansa objetivu dezenvolvimentu nasionál nian”.
Reflete fali saida maka Primeiru-Ministru Dr. Rui Araújo tenik beibeik, no halo parte, iha faktus lubun ida hosi formasaun Governu ne’e, “ kontinuidade ba prespetiva nian sei refleta iha prosegimentu hosi programa no politika sira ne’ebé hahú tiha no estabelese tiha ona iha Planu Estratéjiku Dezenvolvimentu no iha Programa Governu Kontitusionál V nian. Sei hato’o mós dezafiu foun sira ne’ebé mak mosu ba nasaun, haree ba kresimentu ne’ebé lalais tebes iha Timor-leste no oras ne’e ezije atensaun foun atu asegura populasaun hotu ne’ebé hetan benefisiu hosi dezenvolvimentu ekonómiku no sosiál.
Programa tradus mote Governu VI nian: “ida ba hotu-hotu, Hotu-hotu ba ida”. “Hotu-hotu hamutuk bele halo di’ak liu-tan”, espíritu mak tenke movimenta ita nia sosiadade ba konstrusaun koletiva ita nia nasaun nian, no hodi halo Timor-Leste, no hosi ita rasik tenke reziliente no hatene oinsá atu hasoru dezafiu ba daudaun ne’e no ba-iha tempu oin mai”, lee mós iha preámbulu Programa nian ne’ebé sei dada dalan ba asaun Ezekutivu to’o 2017.
