Timor-Leste kaer knaar Prezidénsia Konfederasaun Emprezariál CPLP nian
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 3 fulan-marsu tinan 2015
Timor-Leste kaer knaar Prezidénsia Konfederasaun Emprezariál CPLP nian
Timor-Leste kaer knaar Prezidénsia Konfederasaun Emprezariál CPLP nian, iha loron sábadu, liuhosi serimónia ida ne’ebé hala’o iha Dili. Timor-Leste akumula kargu ida ne’e ho Prezidénsia Rotativa CPLP nian, durante tinan rua tutuir malu 2014-2016.
Konfederasaun Emprezariál, harii ihatinan 2014, ninia objetivu atu dezenvolve kooperasaun entre asosiasaun no entidade emprezariál sira husi Estadu-membru sia CPLP nian, atu kria kondisaun sira ba dezenvolvimentu emprezariál no atuhodi aumenta atividade ekonómika nian.
Jorge Manuel de Araújo Serrano, Prezidente ANJTL (Asosiasaun Joven Emprezáriu Timoroan nian) mak kaer knaar Prezidénsia Onra CE-CPLP, nu’udar reprezentante Timor-Leste nian.Tuir Jorge Serrano knaar Prezidénsia nian ne’e hanesan biban ida di’ak tebes ba Timor-Leste, hodi hatete mós katak” ami hakarak loke odamatan Timo-Leste nian, nasaun foun no iha oportunidade boot ba negósiu”.
Primeiru-Ministru, Dr. Rui Maria de Araújo, iha ninia diskursu enserramentu nian, hatete katak “ida ne’e mak biban ida ne’ebé di’ak liu no so’i duni atu hahú ita ninia Prezidénsia kona-ba setór emprezariál no ekonómiku, hanesan eixu sentrál ita nia programa no asaun nian”. Primeiru-Ministru fó sai mós katak “ ita ninia objetivu mak atu iha setór privadu ida forte, matenek atu mobiliza interese emprezáriu sira nian, liuliu ba espasu husi luzofonia, no atu loke odamatan ba parseria sira no hala’o projetu no negósiu sira iha Timor-Leste no iha rejiaun riku tebtebes ne’e ne’ebé mak ita mós halo parte”.
Iha tinan kotuk, durante Cimeira dasanuluk CPLP X nian ne’ebé hala’o iha Díli, Governu Timor-Leste reafirma fali ninia apoiu ba Konfederasaun Emprezariál CPLP nian hodi hatudu vizaun ida ba futuru, ne’ebé prevee aumentu maka’as iha área komersiál nian entre Estadu-membru sira, ne’ebé mak bele haluan organizasaun rejionál inklui iha kontinente haat. Iha vizaun ida ne’e, Timor-Leste hanesan ponte ida importante ba ligasaun iha Azia ba membru sira CPLP nian.
Iha sorumutuk iha loron-domingu nian, ne’ebé mak partisipa mós emprezáriu timoroan sira no asosiadu foun sira CE-CPLP nian, aprezenta tiha Uniaun Esportadór sira CPLP nian, projetu Zona Espesiál Ekonomika no Sosiál Merkadu Oe-kusse Ambenu nian, no mós oportunidade sira ba setór privadu timoroan. Eventu ida ne’e fo mós boas-vindas ba emprezáriu asosiadu foun sira Konfederasaun Emprezariál nian.
Portavós Governu nian, Ministru Agio Pereira, hatete “Timor-Leste kaer knaar Prezidénsia Onra Konfederasaun Emprezariál CPLP nian iha momentu ida ne’ebé setór privadu hatudu ona atenbrani iha sinál sira kresimentu nian. Atu hadi’a relasaun sira familia CPLP nian, hodi aprezenta oportunidade ba negósiunian iha Timor-Leste nia laran no hodi promove komérsiu no inovasaun entre Estadu-membru sira, hotu-hotu hetan benefísiu. Laiha biban ida di’ak liu ida ne’e.”
Diskursu Primeiru-Ministru nian Rui Maria de Araújo bele haree iha ne’e.
Iha site CE_CPLP nian mak : http://www.cecplp.org
