Ministru Estadu no Prezidénsia Konsellu Ministru no

  Portavós Ofisiál Governu Timor-Leste

Dili, loron 2 fulan-marsu tinan 2015

Governu Konstitusionál VI fó-sai rezultadu sira kona-ba ninia mandatu iha semana rua dahuluk nian

 

Iha sorumutuk Konsellu Ministrus nian ida, iha sesta-feira, diskuti ona Programa Governu Konstitusionál VI nian. Sorumutuk ida ne’e intensivu liu iha semana rua ne’ebé nakonu ho atividade sira atu estabelese baze sira kona-ba servisu ne’ebé Governu hakarak atu kompleta, iha durante ninia mandatu, to’o remata tinan 2017.

Governu foun, foin semana rua simu nia pose, iha segunda-feira, loron 16 fulan-fevereiru. Iha kedas loron ida tuir mai, membru governu sira hala’o sorumutu atu aprova Lei Orgánika, ne’ebe’ presiza, atu bele hahú hala’o ninia funsaun sira. Tanba iha remodelasaun Ezekutivu nian, importante tebes  atu hetan lei foun ida ne’ebé bele define estrutura Governu foun nian, nune’e mós papél no responsabilidade Ministériu ida-idak nian.

Hafoin ajusta no hadi’a buat ruma, maka sorumutuk ida ne’e rezulta aprovasaun, hosi parte membru Governu nian sira hotu, kona-ba Lei Orgánika foun.

Hosi ne’e ba oin, maka membru Governu sira bele dedika an ba servisu importante tolu, ba-iha preparasaun ba sorumutuk sesta-feira liu ba, kona-ba Programa Governu nian.

Dahuluk sira hato’o progresu hirak ne’ebé hetan iha tinan 2012, konta mós ho Programa Governu Konstitusionál V nian, hodi identifika rezultadu sira no destaka mós limitasaun hirak ne’ebé la fó dalan atu bele hala’o programa. Daruak, membru Governu sira prepara sujestaun sira ne’ebé prátiku liu ba Governu Konstitusionál VI, ho baze ba-iha projetu sira  ne’ebé bele implementa ka ba projetu sira ne’ebé mak atu implementa iha tinan rua ho balun tuir mai. Datoluk, membru Governu sira tau iha konsiderasaun no dokumentasaun ba atividade prinsipál sira ne’ebé Governu sei hala’o iha loron atus ida dahuluk nia laran. Iha sorumutuk loron sesta-feira nian halibur hotu kontributu hirak ne’e ba Programa foun Governu nian.

Iha semana rua liu bá, iha ninia diskursu ba dahuluk nu’udar Primeiru-Ministru, Dr. Rui Maria de Araújo promete katak, iha ninia Ukun nia sei fó atensaun liu ba-iha “hadi’a prestasaun servisu no iha kualidade iha obra sira, ho forma ida ne’ebé efisiente, efikás no responsável” no nia temi mós katak sei bele identifika Governu ne’e liuhusi rezultadu servisu nian sira hotu ne’ebé mak nia hala’o tiha ona.

Portavós Governu Konstitusionál VI nian, Ministru Estadu Agio Pereira, hatete katak “Governu hahú nia servisu ho forma ida ativu no konstrutivu tebes. Membru Governu sira fó sira nia atensaun maka’as tebtebes ba knaar sira ne’ebé sira sei hala’o ba oin, ho hanoin katak presiza atu hato’o rezultadu ne’ebé di’ak duni, iha tinan rua ho balun oin mai, hodi servi loloos povu no lori Nasaun Timor-Leste ba faze dezenvolvimentu nian tuir mai”.