Governu Timor-Leste liuhusi Ministériu Interior no Governu Japaun liu hosi Asosiasaun Nipon Lorosa’e, koopera ho organiza treinamentu ba Bombeiru na’in 10 iha Dili, durante semana ida. Enseramentu ba treinamentu ne’e halo iha Edifisiu Bombeiros Díli, loron 23 Fevereiru 2015.

Treinamentu ne’e foka liu ba servisu Motorista no oinsá utiliza kareta hamate ahi. Tuir  planu, Governu Japaun sei entrega kareta hamate ahi hamutuk neen ba Governu Timor-Leste, liu hosi Diresaun Nasionál Protesaun Sivil, Ministériu Interior.

Prezidente Asosiasaun Nipon Lorosa’e, Iwao Kitahara, informa, kareta sira-ne’e sei apoia servisu Bombeiros. Husi kareta neen ne’e, kareta tolu iha ona Timor-Leste  no kareta tolu  seluk seluk sei to’o iha tempu besik.

Iha fatin hanesan, treinadór Kenzy no Hata, sente kontente tebes tanba maske iha lian no kultura ne’ebe deferente, bele realiza treinamentu iha semana ida. Husu ba motorista Bombeiros sira, atu utiliza no kuidadu didi’ak kareta ne’e hodi uza ba tempu naruk.

Diretór Diresaun Nasionál Protesaun Sivil (DNPC), Cândido Filomeno Pereira Gusmão, agradese ba treinadór Kenzy no Hata, bele oferese sira-nia matenek no abilidade fó treinamentu ba motorista sira ho susesu durante semana ida.

“Laiha prezente di’ak ida atu fó ba treinadór sira,  exeptu tara tais jestu kultura Timor-Leste nian, sinál agradesementu ba sira-nia dedikasaun,” Diretór Cândido hateten.

Iha loron hanesan,  Prezidente Asosiasaun Nipon Lorosáe (Eis Embaixadór Japaun ba Timor-Leste), Iwao Kitahara, akompañadu hosi Bombeiros na’in rua husi Japaun hasoru Ministru  Interior, Longuinhos Monteiro iha Gabinete Ministériu  Interior Vila-Verde Díli.

Iha enkontru refere  Ministru Interior, Longuinhos Monteiro apresia tebes ho vizita ne’e.  Durante enkontru ko’alia kona-ba apoiu no koperasaun entre bombeirus Japaun ho Bombeirus Timor-Leste.