Governu Timor-Leste

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

Dili, loron 27 fulan-fevereiru tinan 2015

Stacey Addison livre atu sai husi Timor-Leste

Ohin, loron 27 fulan-fevereiru nian, Tribunál Distritál Dili simu formalmente ona dokumentu ida, ne’ebé aprezenta husi Ministériu Públiku Timor-Leste nian, ne’ebé esplika ho detalle ninia razasaun sira atu rekuza akuzasaun husi sidadaun amerikana Stacey Addison.

Agora, Stacey Addison livre ona atu sai husi Timor-Leste.

Sidadaun amerikana ne’e detidu iha fulan-setembru liubá, hafoin nia tama iha Timor-Leste, depoisde autoridade satan tiha kareta ne’ebé nia sa’e tanba iha kareta ne’e nia laran iha droga.

Iha loron 25 fulan-dezembru tinan 2014, Stacey Addison hetan liberdade hodi sai husi komarka, nune’e nia livre atu la’o ba mai, sein limitasaun, iha Timor-Leste laran iha tempu maibé funsionáriu timoroan sira sei konklui ninia prosesu investigasaun nian. To’o agora nia hela iha eis-Prezidente Repúblika Timor-Leste nian, Dr. José Ramos-Horta, nia uma.

Durante tempu ne’ebé nia hela iha Timor-Leste, responsável Governu nian sira halo nafatin kontaktu ne’ebé di’ak ho autoridade Estadus Unidus nian sira, hodi haree ba nia kazu.

Iha tinan hirak ikus ne’e, Timor-Leste hasa’e ninia kapasidade atu deteta droga hirak ne’ebé tama iha nasaun ne’e, no hala’o hela serbisu hamutuk ho ninia viziñu sira iha rejiaun ne’e, atu previne tráfiku droga nian ne’ebé hakat fronteira nasaun sira nian.