Primeiru-Ministru Dr. Rui Maria de Araújo, hasoru malu ho Komandante Polisia Nasional Timor-Leste, PNTL husi Timor laran tomak iha Kuartel-Jerál PNTL nian iha loron 20 fulan fevereiru, iha Kaikoli.

Primeiru-Ministru husu ba Polisia Nasionál Timor-Leste atu fo prioridade hodi fortifika liu tan polisia komunitáriu, kontrola tránzitu no kontrola tráfiku ba droga no ema.

Iha nia diskursu Primeiru-Ministru husu ba PNTL sira hotu atu servisu tuir rigór no firmeza, tamba polisia mak tenke fo ezemplu uluk ba komunidade sira.

Primeiru-Ministru mos apela ba PNTL sira atu reforsa operasaun konjunta entre PNTL ho F-FDTL.

Iha fatin hanesan, Komandante Polisia Nasional Timor-Leste Interino, Komisáriu Afonso de Jesus, aprezenta ba Primeiru-Ministru servisu polisia ninian. Komandante Afonso dehan durante ne’e, Komando  jeral PNTL ho nia strutura tomak kontinua monitoriza no akompaña nafatin akontesimentu iha rai laran. Tan ne’e nia fiar katak situasaun hirak ne’e sei la afeita ba iha estabilidade, seguransa no pas iha rai ida ne’e.

Alende ne’e, instituisaun PNTL mos orgullu ho diskursu Primeiru-Ministru nian durante Tomada de Posse katak VI Governu sei fo atensaun ba mos iha área Defeza no seguransa.

PNTL iha esperansa katak Primeiru-Ministru ho nia kompetensia tomak bele habadak burokrasia ne’ebe naruk iha rai ida ne’e, hodi instituisaun hotu iha kbi’it dezenvolve sira nia instiuisaun ho konfiansa husi Povo no autoridade sira.

Visita Primeiru-Ministru ba Kuartel-Jerál PNTL akompaña hosi Eis Komandante Polisia National Timor-Leste, atuál Ministru Interior, Longuinhos Monteiro no Komandante Polisia Nasional Timor-Leste Interinu, Komisáriu Afonso de Jesus.