Sekretaria Estadu Terras no Propriedades (SETP) ne’ebé reprezenta hosi Diretór Nasionál Terras Propriedades no Servisu Kadastrais (DNTPSK), Romão Guterres, hala’o lansamentu ba programa Sistema Nasionál Kadastru (SNK) hanesan atividade dahuluk VI Governu Konstitusionál nian iha salaun enkontru Munisípiu Aileu, loron 17 Fevereiru.

Iha biban ne’e reprezentante SETP, Romão Guterres hateten, programa SNK hala’o ona iha munisípiu neen kompostu husi Dili, Likisa, Manatuto, Lospalos, Oekusi Ambenu no Suai.

Programa SNK ne’e, tuir Romão, importante tanba bainhira lei rai nian aprova ona dadus sira ne’ebé maka SNK foti ne’e maka sei sai hanesan baze de dadus hodi bele hatene ida-idak nia baliza, nune’e mós bele produz sertifikadu na’in ba rai,tanba ne’e husu ba komunidade sira atu fó informasaun ne’ebé loos ba ekipa SNK sira.

Administradór Munisípiu Aileu, Martinho Matos, iha intervensaun hateten, rai importante ba ema nia moris tanba ne’e ho prezensa tékniku sira hosi SNK nian, komunidade sira tenki fó informasaun ne’ebé loos no klaru ba ekipa sira, fatin sira ne’ebé maka estadu konsidera hanesan dominio públiku estadu nian mós komunidade sira dehan sira nian.

Diretór Terras Propriedade Munisipiu Aileu, Gaspar hateten, programa ne’e konsidera programa nasionál nian, uluk hanaran Ita-Nia Rai ne’ebé suporta hosi Governu amerikanu agora ho naran ba SNK.

Tuir planu sei halo levantamentu iha teritóriu laran tomak. Tanba ne’e, husu ba komunidade sira tenki rona didi’ak saida nai-ulun sira hato’o hosi nasionál atu hamenus problema rai.

Hanesan komunidade Domingos Rodrigues mós hateten, Problema ba rai hanesan  mós impedementu ba dezenvolvimentu, tanba dalaruma rai fuik no no ailaran tuan mós komunidade sira dehana sira nian, tanba ne’e estadu liu hosi terras propriedade tenki iha lei ne’ebé forte hodi bele haree ba problema sira ne’ebé maka durante ne’e akontese.