Sekretáriu Estadu ba Assuntu ASEAN, Ministériu Negósiu Estranjéiru no Koperasaun, Roberto Soares, hala’o sorumutu ho Embaixador Extraordináriu no Plenipotensiáriu Repúblika Singapura dezignadu mai Timor-Leste, Sudesh Maniar, iha loron 10 fulan fevereiru, edifísiu MNEK, Dili.

Iha sorumutu ne’e, Sudesh Maniar entrega kopia karta kredensial no diskute kona-ba koperasaun bilaterál entre rai rua ne’e.

“Ne’e prosedimentu no pratika normal tuir prosesu reprezentasaun diplomatika, ne’ebé durante ne’e hala’o,” Roberto Soares hateten.

Aleinde ne’e, diplomata rua ne’e ko’alia no troka perspetivas kona-ba progresu relasõens bilaterais entre Timor-Leste ho Singapura. Embaixadór ne’e sei hatutan kna’ar ne’ebé mak ninia predesesor, Embaixadór Lee, hala’o tiha ona iha ámbitu fortalesimentu relasaun bilateral entre Timor-Leste ho Singapura.

Embaixadór Sudesh mós dehan Singapura fó apoiu ba Timor-Leste iha area dezenvolvimentu rekursu umanu, segurnasa, reforsa kooperasaun ekonómika, organiza hodi lori nafatin investór potensial husi Singapura investe iha Timor-Leste.  Timor-Leste apresia no agradesimentu ba apoiu husi governu Singapura.

Kona-ba asuntu ASEAN, Roberto Soares hateten Timor-Leste kontinua ho nia mehi atus sai membru ASEAN. “ Ha’u hato’o ba Embaixadór atu kontinua aprezenta ita-nia hakarak ba sira-nia governante, hodi konsidera atu aselera no assegura ita nia partisipasaun iha atividades ASEAN, hanesan âmbitu kapasitasaun hodi bele lori ita sai membru ASEAN,” nia esplika.

Singapura mós agredese ba Timor-Leste tanba apoia Singapura bainhira aprezenta sira-nia kandidatura iha Nasõens Unidas, organizasõens internasionais sira seluk, liuliu hanesan iha Organizasaun Internasionál Marítima.

Tuir planu, Embaixadór Extraordinariu no Plenipotensiariu, Sudesh Maniar sei aprezenta ninian kredensial ba Prezidente Repúblika, hafoin tomada pose VI Governu Konstitusionál, iha Pálasiu Prezidénsial Nicolau Lobato.