Governu Konstitusionál VI simu pose
Prezidente Repúblika Taur Matan Ruak fó pose ba Governu Konstitusionál VI, ne’ebé lidera husi Primeiru-Ministru Dr. Rui Maria de Araújo, iha serimónia ida ne’ebé hala’o iha loron 16 fulan-fevereiru, iha Salaun Nobre Palásiu Prezidensiál Lahane, iha Dili.
Estrutura Governu Konstitusionál VI nian ki’ik liu husi Governu ida uluk no iha ne’ebá halo parte lider sira husi jerasaun foun ida ne’ebé sei lori ba oin nafatin Planu Estartéjiku Dezenvolvimentu no Programa Governu V ninian.
Hafoin membru sira Governu VI nian simu pose hotu ona, Primeiru-Ministru Dr. Rui Maria de Araújo, hatete iha nia diskursu katak “Responsabilizasaun, prestasaun servisu ho kualidade no dixiplina, la’ós buat opsionál (ka ita bele hili, tuir ita nia hakarak), maibé nu’udar kondisaun sine qua non atu serbí Povu Timór”
Primeiru-Ministru reafirma konpromisu katak Governu ne’ebé maka nia ukun, ninia tempu “lato’o tinan rua ho balun, atu fó forma no isin ba kompromisu hotuhotu ne’ebé ita asume iha Povu nia oin”, hodi kontinua lori ba oin Planu Estratéjiku Dezenvolvimentu no Programa Governu ida uluk ninian “ho énfaze ba hadi’a prestasaun servisu no ba kualidade obra sira-nian, ne’ebé efisiente, efikás no responsável”.
Prezidente Repúblika konsidera Governu Konstitusionál VI hanesan “Governu kontinuidade ida” katak "Governu ne’e harii iha ambiente estabilidade nia laran, liuhusi prosesu konsulta no diálogu”. Taur Matan Ruak mós aproveita atu agradese, lori naran no nasaun nian, ba Primeiru-Ministru sesante, Kay Rala Xanana Gusmão,“ba nia vizaun, kapasidade inovasaun polítika, no mós ba nia vontade atu habelar obrigasaun no responsabilidade hosi Timoroan nia jerasaun foun ba iha nível aas Estadu nian".
Iha Serimónia simu pose ne’e marka prezensa mós husi na’in ulun sira Timor-Leste nian no husi komunidade internasionál, reprezentante sira husi korpu diplomátiku no husi organizasaun naun-govenamentál sira no distintu konvidadu sira seluk.
Atu lee diskursu S.E. Prmeiru-Ministru Dr. Rui Maria de Araújo nian, klike iha ne’e.
Atu lee biografia S.E. Prmeiru-Ministru Dr. Rui Maria de Araújo nian, klike iha ne’e.
Atu lee Komunikadu Imprensa husi Portavós Governu Konstitusionál VI klike iha ne’e.
