Governu Timor-Leste

Primeiru-Ministru iha kompeténsia rasik no kompeténsia ne’ebé delega ba nia tuir Konstituisaun no Lei.

Kompete liu-liu ba Primeiru-Ministru: atu xefia Governu no prezide Konsellu Ministru; diriji no orienta polítka jerál Governu nian no asaun hirak kona-ba governasaun; reprezenta Governu no Konsellu Ministru iha ninia relasaun ho Prezidente Repúblika no Parlamentu Nasional; koordena atu hametin instituisaun Estadu nian sira, apoiu ba dezenvolvimentu empreza nasionál no desentralizasaun administrativa.

Servisu no organizmu hirak tuir mai sai dependente ba Primeiru-Ministru maka: Ajénsia Dezenvolvimentu Nasionál; Komisaun Nasionál Aprovizionamentu; Ajénsia Planeamentu Ekonomiku no Investimentu; Inspeksaun-Jerál Estadu no Servisu Nasionál Intelijénsia nian.

Primeiru-Ministru hetan tulun husi Vise-Primeiru-Ministru Koordenadór Asuntu Sosiál no Ministru Estadu no Prezidénsia Konsellu Ministru nian, bainhira hala’o sira nia funsaun.

Vise-Primeiru-Ministru Koordenadór Asuntu Sosiál nian fó tulun ba Primeiru-Ministru hodi superviziona polítika jerál iha área governasaun nian liu-liu kona-ba aspetu sosiál, hodi hala’o responsabilidade espesífika ba servisu no atividade hosi Sekretaria Estadu Juventude no Desporto; Sekretaria Estadu ba Polítika Formasaun Profisionál no Empregu no Sekretaria Estadu Promosaun Igualdade, hirak pretense ba Prezidénsia Konsellu Ministru nian.

Delega ba Vise-Primeiru-Ministru Koordenadór Asuntu Sosiál, podér Primeiru-Ministru nian atu koordena Ministru Saúde, Ministru Edukasaun no Ministru Solidariedade Sosiál buat botu ne’ebé refere ba prestasaun servisu:

Bainhira mosu dezastre naturál, maka Vise-Primeiru-Ministru Koordenador Asuntu Sosiál maka kaer responsabilidde atu hala’o koordenasaun interministeriál.

Ministru Estadu no Prezidénsia Konsellu Ministru fó tulun ba Primeiru-Ministru atu Prezide Konsellu Ministru no Koordena Governu no sai nu’udar Portavós Governu nian.

Ministru Estadu Prezidénsia Konsellu Ministru iha mós kompeténsia hirak hanesan tuir mai: koordena preparasaun no organizasaun servisu governu nian, nune’e mós atu haree tuir no avaliasaun ba desizaun hirak ne’ebé foti hosi Konsellu Ministru no Primeiru-Ministru; koordena divulgasaun ba aksaun no medida hirak Governu nian no atu organiza forma no modu intervensaun públika husi Governu; koordena apoiu no konsulta jurídika ba Konsellu Ministru, Primeiru-Ministru no membru Governu nian hirak seluk ne’ebé integra iha Prezidénsia Konsellu Ministru; koordena no sentraliza prosesu lejislativu no regulamentu sira hosi Governu, iha aspetu formál, uniformizasaun no armonizasaun lejislativa no, nune’e mós, iha avaliasaun ba nesesidade intervensaun Governu nian; promove modernizasaun iha prosedimentu lejislativu, mak hanesan liu husi rekursu ba instrumentu sira e-government; analiza no prepara projetu diploma legál no regulamentu sira husi Governu, iha koordenasaun ho minitériu ne’ebé mak propoin; asegura servisu kontensiozu iha Prezidénsia Konsellu Ministru; reprezenta Estadu, iha prosesu ne’ebé mak Estadu hola parte, liuhusi ninia servisu jurídiku sira; hatan, iha kolaborasaun ho ministériu responsabilidade jurídika ba, ba prosesu fiskalizasaun konstitusionalidade no legalidade nian; tradús ka akompaña tradusaun ba diploma legál sira ka dokumentu hirak seluk ne’ebé presiza ba asaun Konsellu Ministru ka Primeiru-Ministru nian; reprezenta Konsellu Ministru no Primeiru-Ministru, bainhira sira rasik deside, iha komisaun espesiál sira ne’ebé harii tiha ona; promove no superviziona entidade responsável sira ba formasaun no valorizasaun funsionáriu públiku sira nian no nu’udar Portavós Konsellu Ministru nian.

Delega ba Ministru Estadu no Prezidénsia Konsellu Ministru responsabilidade jurídika ba Sekretáriu Estadu sira ne’ebé halo parte iha Prezidénsia Konsellu Ministru: Sekretáriu Estadu Konsellu Ministru; Sekretáriu Estadu Asuntu Parlamentár; Sekretáriu Estadu Komunikasaun Sosiál; Sekretáriu Estadu Ba Fortalesimentu Institusionál no Sekretáriu Estadu ba Apoiu no Promosaun Setór Privadu.

Delega ba Ministru Estadu no Prezidénsia Konsellu Ministru responsabilidade jurídika ba servisu no órgaun sira, ne’ebé halo parte iha Prezidénsia Konsellu Ministu: Sentru Formasaun Téknika iha Komunikasaun (SEFTEK) no Komisaun Funsaun Públika, ne’ebé mak Institutu Nasionál Administrasaun Públika halo parte.

Ministériu Negósiu Estranjeiru no Kooperasaun hanesan órgaun sentrál Governu nian ne’ebé iha responsabilidade atu halo konsepsaun, ezekusaun, koordenasaun no avaliasaun kona-ba polítika, ne’ebé Konsellu Ministru define no aprova, ba área sira kona-ba diplomasia no kooperasaun internasionál, kona-ba funsaun konsulár no promosaun interese timoroan sira nian ne’ebé hela iha rai-liur.

Kompeténsia Ministru Estadu no Negósiu Estranjeiru no Kooperasaun nian maka hanesan tuir mai: planifika, propoin no ezekuta polítika esterna Timor-Leste nian no garante ninia unidade no koerénsia; elabora projetu lejizlativu no regulamentasaun nian sira iha área hirak ne’ebé nia iha responsabilidade jurídika; negosia no propoin halo tratadu no akordu internasionál sira tuir prioridade husi polítika esterna Timor-Leste nian; promove interese Timor-Leste nian iha rai-li’ur no asegura protesaun sidadaun Timor nian iha rai-liur; asegura reprezentasaun Timor-Leste nian iha Estadu no Organizasaun Internasionál sira seluk no jere rede embaixada, misaun, reprezentasaun permanente no temporál no postu konsulár sira, tuir prioridade polítika esterna nian; planea no ezekuta preparasaun kona-ba adezaun Timor-Leste nian ba Oraganizasaun Nasaun sira Sudeste Ázia nian (ASEAN) no asegura reprezentasaun nasaun nian iha sorumutu no atividade sira organisaun ne’e nian; planeia no ezekuta polítika kona-ba kooperasaun internasionál, ho koordenasaun ho Ministériu Finansa no mós instituisaun kompetente Governu nian sira seluk; hamutuk ho Ministériu Finansa no departamentu kompetente Governu nian sira seluk, halo koordenasaun kona-ba relasaun Timor-Leste nian ho parseiru dezenvolvimentu nian sira; ezerse funsaun sira ne’ebé nia simu kona-ba asuntu diplomasia ekonómika; estabelese mekanizmu kolaborasaun no koordenasaun nian ho órgaun governu nian sira seluk ne’ebé fó mós tutela ba área hirak ne’ebé iha ligasaun.

Ministru Estadu no Negósiu Estranjeiru no Kooperasaun hetan tulun husi Vise-Ministru Negósiu Estranjeiru no Kooperasaun no Sekretáriu Estadu ba Asuntu ASEAN.

Ministériu Defeza no Seguransa hanesan órgaun sentrál Governu nian ne’ebé iha responsabilidade atu halo konsepsaun, ezekusaun, koordenasaun, no avaliasaun kona-ba polítika ne’ebé Konsellu Ministru define no aprova, ba área sira defeza nasionál, kooperasaun militár, seguransa públika, investigasaun kriminál no imigrasaun.

Ministru Defeza no Seguransa iha kompeténsia maka hanesan tuir mai ne’e: propoin polítika no elabora projetu regulamentasaun nian sira ne’ebé importante ba área hirak ne’ebé nia iha responsabilidade jurídika; ho koordenasaun ho Ministériu Negósiu Estranjeiru, halo akordu internasionál sira iha matéria defeza no kooperasaun militár; administra no fiskaliza Forsa Armada Timor-Leste nian; promove adekuasaun meiu militár nian sira; fiskaliza navegasaun iha tasi no lalehan ho fin militár nian; ezerse tutela ba forsa polisiál Timor-Leste nian; promove adekuasaun meiu polisiál nian sira; fó seguransa ne’ebé di’ak ba patrimóniu imobiliáriu Estadu nian; fiskaliza no kontrola ezersísiu atividade seguransa privada sira nian; promove dezenvolvimentu estratéjia prevensaun, mediasaun nian no rezolusaun konflitu iha komunidade; ezerse tutela ba servisu imigrasaun nian sira; fiskaliza servisu navegasaun nian iha tasi no lalehan ho fin sivíl nian; tau matan ba seguransa ema no sasán sira nian iha tempu ahi-han, bee-sa’e, rai-monu, rai-nakdoko no iha situsaun hotu-hotu ne’ebé tau sira iha risku; dezenvolve, ho koordenasaun ho entidade kompetente sira seluk, programa kona-ba edukasaun sívika atu bele hasoru dezastre natural sira no dezastre sira seluk ne’ebé mosu tanba ema nia hahalok hodi hametin solidariedade sosiál no estabelese mekanizmu kolaborasaun no koordenasaun nian ho órgaun Governu nian sira seluk ne’ebé fó tutela ba área hirak ne’ebé iha ligasaun.

Ministru Defeza no Seguransa helan tulun husi Sekretáriu Estadu Defeza no Sekretáriu Estadu Seguransa.

Ministériu Finansa hanesan órgaun sentrál Governu nian ne’ebé iha responsabilidade atu halo konsepsaun, ezekusaun, koordenasaun, no avaliasaun kona-ba polítika ne’ebé Konsellu Ministru define no aprova, ba área sira planeamentu no monitorizasaun anuál nian, kona-ba orsamentu no finansa.

Ministra Finansa iha kompeténsia hanesan tuir mai: propoin polítika monetária no kona-ba valór osan nian ho kolaborasaun ho Banku Sentrál; propoin polítika no elabora projetu regulamentasaun nian sira ne’ebé importante iha matéria makroekonomia, reseita tributária no la’ós tributária, enkuadramentu orsamentál, aprovizionamentu, kontabilidade públika, finansa públika, auditoria no kontrolu ba tezouraria Estadu nian, emisaun no jestaun kona-ba dívida públika; administra fundu mina-rai Timor-Leste nian; koordena projetu no programa sira entre Timor-Leste no parseiru dezenvolvimentu nian sira, iha ligasaun ho Ministériu Negósiu Estranjeiru no Kooperasaun; jere dívida públika esterna, partisipasaun sira Estadu nian no parseria ba dezenvolvimentu, hodi simu kompeténsia atu halo koordenasaun kona-ba parte finanseira no fiskál ninian; jere patrimóniu Estadu nian, sein prejudika knaar Ministériu Justisa iha matéria kona-ba patrimóniu imobiliáriu; promove polítika kona-ba jestaun bein imóvel sira Estadu nian, liuhusi kolaborasaun ho entidade kompetente públika sira seluk; jere fornesimentu bens ne’ebé aproviziona ona ba Ministériu hotu-hotu; negosia, asina no jere implementasaun kontratu kona-ba parseria públiku-privada, hodi tau-matan didi’ak ba ninia avaliasaun finanseira ho objetivu atu bele partilla risku ne’ebé adekuadu entre Estadu no parseiru privadu sira no ba sustentabilidade husi kada projetu; elabora no publika estatístika ofisiál sira; promove regulamentasaun ne’ebé importante no ezerse kontrolu finanseiru kona-ba despeza sira husi Orsamentu Jerál Estadu nian ne’ebé fó ba Ministériu sira, iha ámbitu prosekusaun polítika ida ho autonomia finanseira ne’ebé boot liután ba servisu sira; tau matan ba jestaun di’ak kona-ba finansiamentu ne’ebé efetua liuhusi Orsamentu Jerál Estadu nian, husi parte órgaun administrasaun indireta sira Estadu nian no órgaun governasaun lokál, liuhusi auditoria no akompañamentu; koordena asisténsia téknika nasionál no intenasionál kona-ba asesoria téknika ba órgaun Governu nian sira la inklui área sira rekursu umanu nian; dezenvolve sistema informasaun nian kona-ba jestaun finanseira iha servisu no organizmu Administrasaun Públika nian hotu-hotu iha artikulasaun ho dezenvolvimentu prosesu kona-ba e-government nian; estabelese mekanizmu kolaborasaun no koordenasaun nian ho órgaun governu nian sira seluk ne’ebé iha responsabilidade jurídika área sira ne’ebé iha ligasaun.

Ministra Finansa helan tulun husi Vise-Ministra Finansa.

Ministériu Justisa mak órgaun sentrál Governu nian ne’ebé iha responsabilidade atu halo konsepsaun, ezekusaun, koordenasaun no avaliasaun kona-ba polítika ne’ebé Konsellu Ministru define no aprova, ba área sira justisa, direitu no direitu umanu nian sira.

Ministru Justisa iha kompeténsia hanesan tuir mai: propoin polítika no elabora projetu lejizlasaun no regulamentsaun nian ne’ebé importante ba área hirak ne’ebé nia fó tutela; regula no jere Sentru Formasaun Jurídika no formasaun ba investigadór kriminál sira, ba área atuasaun nian oinoin; regula no jere sistema iha kadeia sira, ezekusaun pena no servisu reinsersaun sosiál; asegura mekanizmu ne’ebé adekuadu kona-ba asesu ba direitu no tribunál sira, liu-liu sidadaun sira ne’ebé la favoresidu liu, iha kontestu informasaun jurídika no konsulta jurídika no apoiu judisiáriu, liu-liu liuhusi Defensoria Públika no entidade ho estrutura Justisa nian sira seluk; kria no garante mekanizmu hirak ne’ebé adekuadu ne’ebé asegura direitu sira sidadania nian no promve divulgasaun lei sira ne’ebé vigora hela; organiza rejistu kona-ba prédiu rústiku no urbanu sira no rejistu beins la book-an sira; jere no fiskaliza sistema servisu rejistu no notariadu nian; administra no halo jestaun ne’ebé koerente kona-ba patriomóniu imobiliáriu Estadu nian; promove no orienta formasaun jurídika ba karreira jurídika no ba funsionáriu públiku sira seluk; asegura relasaun sira iha planu internasionál kona-ba polítika Justisa nian, liu-liu ho Governu no organizasaun internasionál sira seluk, sein prejudika kompeténsia Ministériu Negósiu Estranjeiru no Kooperasaun nian rasik; estabelese mekanizmu kolaborasaun no koordenasaun nian ho órgaun Governu nian sira seluk ne’ebé iha responsabilidade jurídika ba área sira ne’ebé iha ligasaun.

Ministru Justisa helan tulun husi Vise-Ministru Justisa no Sekretáriu Estadu Rai no Propriedade.

Ministériu Saúde hanesan órgaun sentrál Governu nian ne’ebé iha responsabilidade atu halo konsepsaun, ezekusaun, koordenasaun no avaliasaun kona-ba polítika ne’ebé Konsellu Ministru define no aprova, ba área saúde nian no kona-ba atividade farmaseútika.

Ministru Saúde iha kompeténsia sira hanesan tuir mai: propoin polítika no elabora projetu regulamentasaun nian sira ne’ebé importante ba área hirak ne’ebé nia fó tutela; garante sidadaun hotu-hotu nia asesu ba kuidadu saúde nian; koordena atividade hirak ne’ebé iha relasaun ho kontrolu epidemolójiku; halo kontrolu sanitáriu ba produtu hirak ne’ebé bele influensia saúde ema nian; promove formasaun ba profisionál saúde nian sira; kontribui ba susesu iha asisténsia umanitária, promosaun dame nian, seguransa no dezenvolvimentu sosioekonómiku, liuhusi mekanizmu koordenasaun no kolaborasun nian sira ho órgaun Governu nian sira seluk ne’ebé iha responsabilidade jurídika ba área sira ne’ebé iha ligasaun.

Ministru Saúde nian fó tutela ba Institutu Nasionál Saúde nian, Servisu Autónomu Medikamentu no Ekipamentu Médiku, EP (SAMES) no Laboratóriu Nasionál.

Ministru Saúde helan tulun husi Vise-Ministra Étika no Prestasaun Servisu no Vise-Ministra Jestaun, Apoiu no Rekursu.

Ministériu Edukasaun hanesan órgaun sentrál governu nian ne’ebé iha responsabilidade atu halo konsepsaun, ezekusaun, koordenasaun no avaliasaun kona-ba polítika ne’ebé Konsellu Ministru define no aprova, ba área sira kona-ba ensinu no kualifikasaun, nune’e mós ba área sira siénsia no teknolojia nian.

Ministru Edukasaun iha kompeténsia sira hanesan: propoin no asegura polítika hirak ne’ebé iha relasaun ho edukasaun pré-eskolár no eskolár, hahú husi ensinu báziku sira no sekundáriu no integra modalidade espesiál edukasaun nian, to’o ba promosaun ensinu rekorente no aprendizajen iha moris tomak; partisipa iha definisaun no ezekusaun polítika kona-ba kualifikasaun no formasaun profisionál; garante direitu ba edukasaun no asegura eskolaridade obrigatória, atubele promove inkluzaun no igualdade oportunidade nian; reforsa kondisaun sira ensinu no aprendizajen nian, hodi kontribui ba kualifikasaun populasaun nian no melloria iha susesu eskolár no empregu; define kurríkulu nasionál iha nivel ensinu oinoin no rejime avaliasaun alunu sira nian no aprova programa ensinu nian sira, nune’e mós ho orientasaun no ninia konkretizasun; promove no jere dezenvolvimentu no rekualifikasaun parke eskolár estabelesimentu públiku ensinu la’ós superior, nune’e mós ho apoia inisiativa sira iha ámbitu ensinu partikulár no kooperativu; planeia no administra rekursu umanu, liuhusi koordenasaun ho Komisaun Funsaun Públika, no mós rekursu materiál no finanseiru hirak ne’ebé afeta ba sistema edukativu; dezenvolve medida polítika nian iha área ensinu superiór, siénsia no teknolojia, nune’e mós ho nia organizasaun, finansiamentu, ezekusaun no avaliasaun; promove igualdade kona-ba oportunidade iha asesu ba ensinu superiór; promove dezenvolvimentu, modernizasaun, kualidade, kompetitividade no rekoñesimentu internasionál kona-ba sistema ensinu superiór no sientífiku no teknolójiku; promove ligasaun entre instituisaun ensinu superiór nian sira ho siénsia no teknolojia, no entre sira ho sistema produtivu sira; dezenvolve no implementa polítika ida kona-ba fó bolsa-estudu liuhusi kompetisaun no transparénsia; promove avaliasaun no inspesaun permanente ba estabelesimentu ensinu superiór, sientífiku no teknolójiku; promove avaliasaun ba profisionál edukasaun nian sira no planeia sistema análize no monitorizasaun nian ida, atubele avalia rezultadu sira no impaktu husi polítika edukasaun no formasaun nian.

Servisu no organízmu ne’ebé Ministériu Edukasaun nian iha responsabilidade jurídika maka hanesan tuir mai ne’e: Institutu Nasionál Formasaun Dosente no Profisionál Edukasaun nian (INFORDEPE) no Ajénsia Nasionál ba Avaliasaun no Akreditasaun Akadémika (ANAAA).

Ministru Edukasaun helan tulun husi Vise-Ministra Ensinu Báziku, Vise-Ministru Ensinu Sekundáriu no Vise-Ministru Ensinu Superiór.

Ministériu Administrasaun Estatál mak órgaun sentrál Governu nian ne’ebé iha responsabilidade atu halo konsepsaun, ezekusaun, koordenasaun no avaliasaun kona-ba polítika ne’ebé Konsellu Ministru define no aprova, ba área sira hanesan podér lokál, desentralizasaun administrativa, dezenvolvimentu lokál no rurál, organizasaun no ezekusaun prosesu eleitorál no referendáriu, no prezervasaun dokumentu ofisiál sira.

Ministru Administrasaun Estatál iha kompeténsia maka hanesan: promove no ezekuta polítika kona-ba dezenvolvimentu lokál no rurál no hamenus dezigualdade ekonómika no sosiál entre rejiaun sira; koordena no fahe informasaun interna no esterna sira ba estrutura Adminitrasaun Lokál Estadu nian; koordena no fiskaliza atividade administrasaun distritu no sub-distritu nian sira, servisu no organízmu sira seluk husi administrasaun lokál; koordena no fiskaliza atividade servisu no organizmu administrasaun rejionál no lokál nian; promove no kondúz prosesu desentralizasaun administrativa no kriasaun munisipalidade; garante apoiu tékniku ne’ebé adekuadu ba prosesu eleitorál no referendáriu sira; promove rekuperasaun, prezervasaun guarda adekuadu ba dokumentu istóriku no ofisiál nasaun nian sira, inklui administrasaun públika; propoin no dezenvolve norma instrusaun kona-ba ba klasifikasaun, tratamentu no arkivamentu dokumentu istóriku no ofisiál nasaun nian sira, inklui administrasaun públika nian no estabelese mekanizmu kolaborasaun no koordenasaun nian ho órgaun Governu nian sira seluk ne’ebé fó tutela ba área sira ne’ebé iha ligasaun.

Ministru Administrasaun Estatál helan tulun husi Sekretáriu Estadu Dezenvolvimentu Lokál no Sekretáriu Estadu Dezentralizasaun Administrativa.

Ministériu Komérsiu, Indústria no Ambiente mak órgaun sentrál Governu nian ne’ebé iha responsabilidade atu halo konsepsaun, ezekusaun, koordenasaun no avaliasaun kona-ba polítika ne’ebé Konsellu Ministru define no aprova ba área sira hanesan atividade ekonómika komersiál no indústria no setór kooperativa nian, nune’e mós ambiente.

Ministru Komérsiu, Indústria no Ambiente iha kompeténsia maka hanesan: propoin polítika no elabora projetu regulamentasaun nian ne’ebé importante ba área sira ne’ebé sira fó tutela; dezenvolve, ezekuta no avalia polítika kona-bakomérsiu, indústria no ambiente; kontribui ba dinamizasaun atividade ekonómika nian, inklui ho sira ne’ebé iha relasaun ho kompetividade nasionál no internasionál; apoiu atividade ajente ekonómiku sira nian, no promove dilijénsia ne’ebé importante ba valorizasaun solusaun hirak ne’ebé maka halo tramitasaun prosesuál sai simples no lais liután; apresia no fó lisensa ba projetu instalasaun no funsionamentu empriendimentu komersiál no industriál nian; halo inspesaun no fiskalizasaun ba atividade empriendimentu komersiál no industriál sira tuir lei; mantein no administra sentru informasaun no dokumentasaun nian ida kona-ba empreza sira; propoin kualifikasaun no klasifikasaun empriendimentu industrial sira nian tuir buat ne’ebé bele aplika ho lei; promove dezenvolvimentu setór kooperativu nian, liu-liu iha área rurál sira no iha setór agrikultura nian, ho koordenasaun ho Ministériu Agrikultura no Peska; habelar importánsia setór ekonómiku kooperativu no mikro no empreza mikro no kiik sira no promove formasaun kona-ba oainsá harii, organiza, jere no halo kontabilidade kooperativa no empreza kiik sira nian; organiza no administra rejistu ida kona-ba kooperativa sira; organiza no administra rejistu kona-ba propriedade industriál; promove regra interna no internasionál kona-ba normalizasaun, metrolojía no kontrolu kualidade nian, padraun medida unidade nian no magnitude fízika nian; elabora polítika ambientál no halo avaliasaun ba rezultadu hirak ne’ebé alkansa ona; promove, akompaña no apoia estratéjia integrasaun ambiente nian iha polítika setoriál; halo avaliasaun ambientál estratéjika kona-ba polítika, planu, programa no lejizlasaun no koordena prosesu avaliasaun nian kona-ba impaktu ambientál husi projetu iha nível nasionál, inklui prosedimentu kona-ba konsulta públiku; asegura, iha termu jerál no iha sede lisensiamentu ambientál nian, adosaun no fiskalizasaun kona-ba medida prevensaun no kontrolu nian ne’ebé integradu husi poluisaun husi instalasaun ne’ebé nia abranje.

Ministru Komérsiu, Indústria no Ambiente helan tulun husi Vise-Ministru Komérsiu, Indústria no Ambiente, Sekretáriu Estadu Komérsiu, Sekretáriu Estadu Indústria no Kooperativa no Sekretáriu Estadu Ambiente.

Ministériu Solidariedade Sosiál hanesan órgaun sentrál Governu nian, nu’udar responsável ba konsepsaun, ezekusaun, koordenasaun no avaliasaun polítika, ne’ebé define no aprova ona husi Konsellu Ministru, ba área seguransa sosiál, asisténsia sosiál, dezastre naturál no reinsersaun komunitária.

Ministra Solidariedade Sosiál iha kompeténsia maka hanesan: jere no implementa sistema seguransa sosiál ba serbisu-na’in sira no populasaun sira seluk; dezenvolve programa asisténsia sosiál no ajuda umanitária ba sira ne’ebé vulnerável liu; propoin no dezenvolve polítika estratéjia nian iha jestaun risku dezastre nian; dezenvolve no implementa programa sira iha jestaun risku dezastre nian, maka hanesan, iha edukasaun sívika, prevensaun, mitigasaun (halo kamán terus), hatan ba emerjénsia no rekuperasaun hafoin hetan tiha dezastre; promove programa desmobilizasaun, reforma no pensaun ne’ebé atribui ba Kombatente Libertasaun Nasionál nian; providénsia akompaña, no inklui fali veteranu iha sosiedade veteranu no Kombatente Libertasaun Nasionál sira nian; providénsia akompaña, fó protesaun no halo reinsersaun komunitária ba grupu vulnerável sira seluk; estabelese mekanizmu kolaborasaun no koordenasaun ho órgaun Governu sira seluk ho responsabilidade jurídika ba área ne’ebé iha ligasaun.

Sentru Nasionál Reabilitasaun iha tutela no superintendénsia Ministru Solidariedade Sosiál nian.

Ministra Solidariedade Sosiál helan tulun husi Vise-Ministru Solidariedade Sosiál, Sekretáriu Estadu Seguransa Sosiál no Sekretáriu Estadu Asuntu Kombatente Libertasaun Nasionál.

Ministériu Obra Públika hanesan órgaun sentrál Governu nian, nu’udar responsável ba konsepsaun, ezekusaun, koordenasaun no avaliasaun polítika, ne’ebé define no aprova ona husi Konsellu Ministru, ba área obra públika sira, abitasaun, urbanizasaun, distribuisaun bee, saneamentu no eletrisidade.

Ministru Obra Públika iha kompeténsia maka hanesan: propoin no ezekuta liña polítika sira Ministériu nian iha área obra públika sira, abitasaun, urbanizmu, infra-estrutura, rede-rodoviária iha koordenasaun ho Ministériu Transporte no Komunikasaun, distribuisaun bee, saneamentu no eletrisidade; asegura implementasaun no ezekusaun kuadru legál no regulamentadór atividade sira ne’ebé iha relasaun ho atividade ministériu nian; kria no implementa kuadru legál no regulamentár atividade konstrusaun sivil no investigasaun kona-ba materiál sira konstrusaun nian; estuda no ezekuta obra sira ba protesaun, konservasaun no reparasaun ba ponte, estrada, mota ain no tasi ninin, liu-liu halo kontrolu ba bee lihun; promove estudu no ezekusaun sistema foun rede infra-estrutura nian kona-ba distribuisaun bee, nune’e mós saneamentu báziku, no fiskaliza ninia funsionamentu no esplorasaun, la hasees atribuisaun sira ne’e hosi órgaun sira seluk; propoin no dezenvolve polítika nasionál ba abitasaun no planeamentu espasiál; propoin no dezenvolve planeamentu urbanu; estabelese koordenasaun no promove kualidade projetu fíziku ne’ebé mak Estadu halo; promove realizasaun obra sira konstrusaun, konservasaun no reparasaun edifísiu públiku, monumentu no instalasaun espesiál, iha kazu obra hirak ne’ebé hala’o tuir lei; promove adopta norma téknika no regulamentu sira kona-ba materiál ne’ebé uza ba konstrusaun sivil, nune’e mós teste labotoriál sira atu garante seguransa edifikasaun nian; fó lisensa no fiskaliza edifikasaun urbana hotu-hotu, liu-liu ba partikulár sira, munisipál ka entidade autónoma sira, tuir lei aplikável; mantein no dezenvolve sistema nasionál ida ba informasaun no vijilánsia kona-ba estadu obra sira nian no kona-ba materiál konstrusaun sivil, inklui infra-estrutura ne’ebé hetan bee nalihun; asegura koordenasaun setór enerjétiku renovável no fó aten brani atu komplementa entre ninia modu oinoin nune’e mós ba ninia kompetisaun, iha ordem atu bele satisfás di’ak liu utente sira; dezenvolve kuadru legál no regulamentár ba atividade sira ne’ebé iha relasaun ho rekursu enerjétiku renovável; regula iha koordenasau ho ministériu sira seluk, operadór sira iha área produsaun eletrisidade nian; dezenvolve estudu sira kona-ba kapasidade rekursu enerjétiku renovável no enerjia alternativa sira; mantein arkivu informasaun ida kona-ba operasaun no rekursu enerjétiku renovável sira no estabelese mekanizmu kolaborasaun no koordenasaun ho órgaun Governu sira seluk ho responsabilidade jurídika ba área ne’ebé iha ligasaun.

Halo parte iha tutela no superintendénsia Ministru Obra Públika nian Institutu Jestaun Ekipamentu.

Ministru Obra Públika helan tulun husi Sekretáriu Estadu Obra Públika, Sekretáriu Estadu Eletrisidade no Sekretáriu Estadu Água, Saneamentu no Urbanizasaun.

Ministériu Transporte no Komunikasaun hanesan órgaun sentrál Governu nian, nu’udar responsável ba konsepsaun, ezekusaun, koordenasaun no avaliasaun polítika, ne’ebé define no aprova ona husi Konsellu Ministru, ba área transporte terrestre, marítimu no aéreu karáter sivil nian no servisu sira ne’ebé tulun, iha komunikasaun sira, inklui mós, servisu postál, telegráfiku, telefóniku no telekomunikasaun sira seluk tan, servisu metereolójiku no informátika sira.

Ministru Transporte no Komunikasaun iha kompeténsia maka hanesan: propoin polítika no hala’o projetu regulamentasaun nesesária iha ninia área tutela nian; asegura implementasaun no ezekusaun kuadru legál no regulamentadór atividade sira nian ne’ebé iha relasaun ho ministériu; prepara no dezenvolve, iha kooperasaun ho servisu públiku sira seluk, implementasaun planu rodoviáriu territóriu nasionál nian; dezenvolve no regula atividade komunikasaun nian nune’e mós kria kondisaun di’ak liu ba meiu komunikasaun sira; asegura koordenasaun setór transporte no fó aten-barani atu komplementa iha ninia modu oinoin nune’e mós ba ninia kompetisaun, iha órden atu bele satisfás di’ak-liu utente sira; promove jestaun, nune’e mós atu adopta norma téknika no regulamentasaun kona-ba uzu públiku servisu komunikasaun sira nian; garante atu hala’o servisu públiku telekomunikasaun sira, no utilizasaun ba espasu radiuelétriku liuhusi empreza públika ka fó servisu públiku ba entidade privada sira; mantein no dezenvolve sistema nasionál ba informasaun no vijilánsia metereolójika no sismolójika, inklui mós konstrusaun no manutensaun ba infra-estrutura hirak ne’e; gere sistema teknolojia informasaun Governu nian no fó garantia ba prestasaun servisu sira ne’e, nune’e mós implementa sistema informátika iha territóriu nasionál; promove no koordena investigasaun sientífika no dezenvolvimentu teknolójiku kona-ba transporte terrestre, aéreu no marítimu karáter sivil nian no koordena no promove jestaun, manutensaun no modernizasaun infra-estrutura aeroportuáriu sira, navegasaun aérea, rodoviária, viária, portuária no servisu sira ne’ebé iha ligasaun.

Halo parte iha tutela no superintendénsia Ministru Transporte no Komunikasaun nian mak: Administrasaun Portu Timor-Leste nian; Autoridade Aviasaun Civil Timor-Leste nian; Aeroportu no Navegasaun Aérea Timor-Leste, E.P. no Autoridade Nasionál Komunikasaun sira.

Ministru Transporte no Komunikasaun helan tulun husi Vise-Ministru Transporte no Komunikasaun.

Ministériu Agrikultura no Peska hanesan órgaun sentrál Governu nian, nu’udar responsável ba konsepsaun, ezekusaun, koordenasaun no avaliasaun polítika, ne’ebé define no aprova ona husi Konsellu Ministru, ba área sira agrikultura, floresta, peska no pekuária.

Ministru Agrikultura no Peska iha kompeténsia maka hanesan: propoin polítika no hala’o projetu projetu regulamentasaun nesesária iha ninia área tutela; asegura implementasaun no kontinua hala’o programa dezenvolvimentu rurál nian, iha koordenasaun ho Ministériu Komérsiu, Indústria no Ambiente; kria sentru apoiu tékniku ba to’os-na’in sira; gere ensinu tékniku-agríkola; promove investigasaun agrária; kontrola uza rai ba fin produsaun agro-pekuária; promove no fiskaliza animál sira nia saúde; promove indústria agro-pekuária no peskeira; fiskaliza produsaun alimentár; gere Servisu Kuarentena; promove, iha koordenasaun ho Ministériu Komérsiu, Indústria no Ambiente iha dezenvolvimentu rurál, hodi implementa sistema kooperativu ida ba produsaun no komersializasaun produsaun agríkola; halo estudu viabilidade ba instalasaun sistema irrigação; jere, liuhusi koordenasaun ho Ministériu Komérsiu, Indústria no Ambiente, rekursu florestál no basia hidrográfika; jere bee hodi hala’o servisu agrikultura nian; kontrola, fiskaliza setór peska no akikultura; estabelese mekanizmu kolaborasaun no koordenasaun ho órgaun Governu sira seluk ne’ebé iha responsabilidade jurídika ba área ne’ebé iha ligasaun; jere Parke Nasionál no Área Protejida sira no garante protesaun no konservasaun natureza no biodiversidade, hodi kontrola implementasaun polítika no fiskaliza atividade sira ne’ebé viola kualidade tomak fauna no flora nasionál nian, liuhusi kolaborasaun ho entidade ne’ebé mak iha relasaun.

Ministru Agrikultura no Peska helan tulun husi Vise-Ministru Agrikultura no Peska, Sekretáriu Estadu Floresta no Konservasaun Natureza, Sekretáriu Estadu Peska no Sekretáriu Estadu Pekuária.

Ministériu Turizmu hanesan órgaun sentrál Governu nian, nu’udar responsável ba konsepsaun, ezekusaun, koordenasaun no avaliasaun polítika, ne’ebé define no aprova ona husi Konsellu Ministru, ba área sira turizmu no kultura.

Ministru Turizmu iha kompeténsia maka hanesan: propoin polítika no elabora projetu regulamentasaun ne’ebé presiza ba área ne’ebé iha ninia responsabilidade jurídika; gere, ezekuta no halo avaliasaun polítika turizmu nian; kontribui haburas sektór turizmu no hato’o medida no polítika públika sira ne’ebé kona loos ba ninia dezenvolvimentu; apoia atividade ajente ekonómiku sektór turístiku nian hodi promove kuidadu nesesáriu liuhosi solusaun ne’ebé simples liu no lalais ba prosedimentu lisensiamentu ne’e nian; fó pareser kona-ba pedidu informasaun molok atu harii empreza turístika sira; apresia no fó lisensa ba projetu instalasaun no funsionamentu ba empreza turístiku; dirije, halo inspesaun no fiskalizasaun ba jogu rekreativu no empreza turístiku sira, tuir lei; mantein no organiza sentru informasaun ida no dokumentasaun kona-ba empreza atividade sira sektór turístiku nian; suspende no revoga lisensa ezersísiu atividade turístika nian, tuir lei; kualifika no klasifika empreza turístiku, tuir lei aplikável; halo planu tinan-tinan kona-ba atividade promosaun ba dezenvolvimentu turizmu ho kálkulu ba ninia despeza sira; implementa no ezekuta lei sira kona-ba instalasaun, lisensiamentu no verifikasaun ba kondisaun funsionamentu ekipamentu turístiku nian; estabelese mekanizmu kolaborasaun ho servisu seluk no órgaun governu sira ho tutela kona-ba área sira ne’ebé iha ligasaun, liu-liu ba servisu kompetente sira husi ordenamentu no dezenvolvimentu fíziku ba territóriu, ho hanoin atu promove zona estratéjika dezenvolvimentu turístiku nasionál nian; kolabora, ho órgaun no institutu públiku kompetente sira, iha promosaun no divulgasaun Timor-Leste nian, hamutuk ho investidór no operadór turístiku sira, hodi garante divulgasaun no informasaun ne’ebé nesesária; dirije iha eventu turístiku no kulturál; halo polítika no regulamentu ba konservasaun, protesaun no prezervasaun ba patrimóniu istóriku kulturál sira; propoin polítika ba definisaun no dezenvolvimentu kultura; estabelese polítika kooperasaun no troka kulturál ho país sira KPLP nian no organizasaun kulturál no país sira rejiaun nian; estabelese polítika kooperasaun ho UNESKU; promove kriasaun Biblioteka Nasionál no Muzeu Nasionál; dezenvolve programa sira, iha koordenasaun ho Ministériu Edukasaun atu hatama kultura iha ensinu Timor-Leste nian; garante prezervasaun ida adekuada ba dokumentu ofisiál no istóriku sira; promove kriasaun Akademia Arte no Indústria Kreativa Kulturál Timor-Leste nian no proteje direitu sira kona-ba kriasaun artistíka no literária.

Ministru Turizmu helan tulun husi Sekretária Estadu Arte no Kultura.

Ministériu Petróleu no Rekursu Minerál hanesan órgaun sentrál Governu nian, nu’udar responsável ba konsepsaun, ezekusaun, polítika enerjétika no jestaun rekursu minerál sira, inklui mós minarai no minériu estratéjiku selukseluk, ne’ebé aprova ona husi Konsellu Ministru, nune’e mós husi lisensiamentu no regulasaun atividade estrativa, atividade industriál benefisiasaun minarai no minerál sira, inklui petrokímia no refinasaun.

Ministru Petróleu no Rekursu Minerál iha kompeténsia maka hanesan: elabora no propin polítika no projetu lei sektór nian; estabelese sistema administrasaun no jestaun sektoriál no regulamentár atividade sektór nian; garante partisipasaun másima Timor-Leste nian iha atividade sektór minarai no rekursu minerál sira liuhusi instrumentu jurídiku, administrativu no tékniku ne’ebé adekuadu; promove oportunidade nasionál iha sektór atu bele dada no hametin investimentu hosi rai li’ur; monitoriza implementasaun ba Tratadu sira no akompaña ezekusaun setoriál instrumentu sira ne’ebé maka relevante; liuhusi orientasun direta Primeiru-Ministru nian, hala’o prosesu negósiasaun kona-ba modelu dezenvolvimentu kampu Greater SunRise ka matéria sira seluk ne’ebé relasiona ho ezersísiu jurisdisaun iha Tasi Timor; koordena ezekusaun projetu Tasi Mane no fó lisensa no monitoriza atividade sira ne’ebé dezenvolve ona iha zona territoriál ne’ebé maka dedika ba projetu Tasi Mane; determina, tuir kondisaun jerál ne’ebé prevee iha lei, termu kontratu espesífiku ba prospesaun no aproveitamentu rekursu minarai no lisensa ba esplorasaun mina nian; asegura rezerva mínima obrigatória iha kombustível sira no ninia fornesimentu regulár ba unidade públika produsaun enerjia nian; regula, autoriza no fiskaliza atividade sira downstream, maka hanesan esportasaun, transporte, armazenamentu, distribuisaun no komersializasaun, grosu ka retallu inklui mós importasaun, petróleu brutu, no ninia komponente no minerál sira, maka hanesan refinaria, unidade likefasaun, gás ka petrokímika sira; autoriza no fó lisensa jusante ba estrasaun projetu indústria tranformadora kona-ba prosesamentu, benefisiasaun, tratamentu, konversaun ka transformasaun petróleu brutu no ninia komponente no minerál sira, maka hanesan refinaria, unidade likefasaun, gás ka petrokímika sira; konsidera kompleksidade no espesialidade téknika sektór minarai no rekursu minerál sira, atu aprova lisensa ambientál iha sektór ida ne’e, iha koordenasaun ho na’i-ulun sira ne’ebé kompetente iha área Ambiente nian; ezerse podér atu dirije no iha responsabilidade jurídika ba administrasaun indireta setór, institusionál no emprezariál Estadu nian no dezenvolve koñesimentu no investigasaun estrutura jeolójika solu no subsolu no rekursu idrojeolójiku nasionál sira.

Kompeténsia Vise-Ministru Negósiu Estranjeiru no Kooperasaun nian maka hanesan tuir mai ne’e: fó tulun ba Ministru; superviziona servisu sira kona-ba administrasaun no jestaun finanseira; aprezenta no implementa planu ida kona-ba formasaun no fortalesimentu rekursu umanu, iha área diplomasia no relasaun internasionál; koopera no koordena ho Ministériu sira, liu-liu Ministériu Finansa nian, iha asuntu hotu-hotu ne’ebé relasiona ho kooperasaun internasionál.

Kompeténsia Vise-Ministra Finansa maka halo operasionalizasaun kona-ba estratéjia no polítika ne’ebé Ministru define.

Vise-Ministra Finansa tulun Ministra Finansa.

Kompeténsia Vise-Ministru Justisa nian maka hanesan tuir mai ne’e: jestaun no administrasaun rekursu umanu iha Ministériu no Organizmu hirak ne’ebé nia iha responsabilidade jurídika; autorizasaun kona-ba despeza, inklui aprovasaun CPV, to’o ba limite ne’ebé tuir Lei Ministru bele halo, iha limite orsamentu ne’ebé aprovadu ba Ministériu no órgaun servisu nian sira seluk; autorizasaun kona-ba atu loke prosesu aprovizionamentu nian, adjudikasaun no asinatura kontratu, to’o valór ne’ebé tuir Lei, Ministru bele autoriza; autorizasun kona-ba transferénsia verba (alterasaun orsamentál) to’o ba limite máximu ne’ebé lei permite; asuntu hirak ne’ebé iha relasaun ho lojístika ekipamentu no viatura Ministériu sira nian no ida ne’ebé iha relasaun ho jestaun korente informátika nian no sistema informasaun nian.

Vise-Ministru Justisa tulun Ministru Justisa.

Kompeténsia Vise-Ministra Étika no Prestasaun Servisu nian maka kompeténsia sira ministru nian ne’ebé temi kona-ba formasaun profisionál no karreira médika no pesoál sira seluk, liu-liu ne’ebé ko’alia kona-ba atendimentu ba utente sira.

Vise-Ministra Étika no Prestasaun Servisu tulun Ministru Saúde.

Kompeténsia Vise-Ministra Jestaun, Apoiu no Rekursu nian maka kompeténsia sira Ministru nian ne’ebé ko’alia kona-ba jestaun finanseira no administrativa no kona-ba patrimóniu ministériu nian.

Vise-Ministra Jestaun, Apoiu no Rekursu tulun Ministru Saúde.

Kompeténsia Vise-Ministra Ensinu Báziku nian maka hirak ne’ebé: propoin no asegura polítika hirak ne’ebé iha relasaun ho edukasaun pré-eskolár no eskolár, hahú husi ensinu báziku no integra modalidade espesiál edukasaun nian, to’o ba promosaun ensinu rekorente no aprendizajen iha moris tomak; garante direitu ba edukasaun no asegura eskolaridade obrigatória, atubele promove inkluzaun no igualdade oportunidade nian; reforsa kondisaun sira ensinu no aprendizajen nian, hodi kontribui ba kualifikasaun populasaun nian no melloria iha susesu eskolár no empregu no define kurríkulu nasionál iha nivel ensinu oinoin no rejime avaliasaun alunu sira nian no aprova programa ensinu nian sira, nune’e mós ho orientasaun no ninia konkretizasun.

Vise-Ministra Ensinu Báziku tulun Ministru Edukasaun.

Kompeténsia Vise-Ministru Ensinu Sekundáriu maka hirak ne’ebé: propoin no asegura polítika hirak ne’ebé iha relasaun ho ensinu sekundáriu no integra modalidade espesiál edukasaun nian, to’o ba promosaun ensinu rekorente no aprendizajen iha moris tomak; partisipa iha definisaun no ezekusaun polítika kona-ba kualifikasaun no formasaun profisionál; define kurríkulu nasionál iha nivel ensinu oinoin no rejime avaliasaun alunu sira nian no aprova programa ensinu nian sira, nune’e mós ho orientasaun no ninia konkretizasun no promove no jere dezenvolvimentu no rekualifikasaun parke eskolár estabelesimentu públiku ensinu la’ós superior, nune’e mós ho apoia inisiativa sira iha ámbitu ensinu partikulár no kooperativu.

Vise-Ministru Ensinu Sekundáriu tulun Ministru Edukasaun.

Kompeténsia Vise-Ministru Ensinu Superiór nian maka hirak ne’ebé: promove igualdade kona-ba oportunidade iha asesu ba ensinu superiór; promove dezenvolvimentu, modernizasaun, kualidade, kompetitividade no rekoñesimentu internasionál kona-ba sistema ensinu superiór no sientífiku no teknolójiku; promove ligasaun entre instituisaun ensinu superiór nian sira ho siénsia no teknolojia, no entre sira ho sistema produtivu sira no promove avaliasaun no inspesaun permanente ba estabelesimentu ensinu superiór, sientífiku no teknolójiku.

Vise-Ministru Ensinu Superiór tulun Ministru Edukasaun.

Kompeténsia Vise-Ministru Komérsiu, Indústria no Ambiente nian maka hirak ne’ebé: kontribui ba dinamizasaun atividade ekonómika nian, inklui ho sira ne’ebé iha relasaun ho kompetividade nasionál no internasionál; apoiu atividade ajente ekonómiku sira nian, no promove dilijénsia ne’ebé importante ba valorizasaun solusaun hirak ne’ebé maka halo tramitasaun prosesuál sai simples no lais liután; promove dezenvolvimentu setór kooperativu nian, liu-liu iha área rurál sira no iha setór agrikultura nian, ho koordenasaun ho Ministériu Agrikultura no Peska; habelar importánsia setór ekonómiku kooperativu no mikro no empreza mikro no kiik sira no promove formasaun kona-ba oainsá harii, organiza, jere no halo kontabilidade kooperativa no empreza kiik sira nian; organiza no administra rejistu ida kona-ba kooperativa sira.

Vise-Ministru Komérsiu, Indústria no Ambiente tulun Ministru Komérsiu, Indústria no Ambiente.

Delega ba Vise-Ministru Solidariedade Sosiál, kompeténsia hirak ne’ebé: dezenvolve programa asisténsia sosiál no ajuda umanitária ba sira ne’ebé vulnerável liu; propoin no dezenvolve polítika estratéjia nian iha jestaun risku dezastre nian; dezenvolve no implementa programa sira iha jestaun risku dezastre nian, maka hanesan, iha edukasaun sívika, prevensaun, mitigasaun (halo kamán terus), hatan ba emerjénsia no rekuperasaun hafoin hetan tiha dezastre no providénsia akompaña, fó protesaun no halo reinsersaun komunitária ba grupu vulnerável sira seluk.

Vise-Ministru Solidariedade Sosiál tulun Ministra Solidariedade Sosiál.

Delega ba Vise-Ministru Transporte no Komunikasaun kompeténsia sira ne’ebé: dezenvolve no regula atividade komunikasaun nian nune’e mós kria kondisaun di’ak liu ba meiu komunikasaun sira; asegura koordenasaun setór transporte no fó aten-barani atu komplementa iha ninia modu oinoin nune’e mós ba ninia kompetisaun, iha órden atu bele satisfás di’ak-liu utente sira; promove jestaun, nune’e mós atu adopta norma téknika no regulamentasaun kona-ba uzu públiku servisu komunikasaun sira nian; garante atu hala’o servisu públiku telekomunikasaun sira, no utilizasaun ba espasu radiuelétriku liuhusi empreza públika ka fó servisu públiku ba entidade privada sira no gere sistema teknolojia informasaun Governu nian no fó garantia ba prestasaun servisu sira ne’e, nune’e mós implementa sistema informátika iha territóriu nasionál.

Vise-Ministru Transporte no Komunikasaun tulun Ministru Transporte no Komunikasaun.

Delega ba Vise-Ministru Agrikultura no Peska kompeténsia hirak ne’ebé: asegura implementasaun no kontinua hala’o programa dezenvolvimentu rurál nian, iha koordenasaun ho Ministériu Komérsiu, Indústria no Ambiente; kria sentru apoiu tékniku ba to’os-na’in sira; gere ensinu tékniku-agríkola; promove investigasaun agrária; kontrola uza rai ba fin produsaun agro-pekuária no promove, iha koordenasaun ho Ministériu Komérsiu, Indústria no Ambiente iha dezenvolvimentu rurál, hodi implementa sistema kooperativu ida ba produsaun no komersializasaun produsaun agríkola.

Vise-Ministru Agrikultura no Peska tulun Ministru Agrikultura no Peska.

Sekretáriu Estadu Konsellu Ministru fó apoiu ba Primeiru-Ministru no Ministru Estadu no Prezidénsia Konsellu Ministru, iha ámbitu koordenasaun ba prosesu lejislativu Governu nian.

Delega ba Sekretáriu Konsellu Ministru kompeténsia hirak tuir mai: fó apoiu tékniku-administrativu no lojístiku ba sorumutu Konsellu Ministru nian; asegura publikasaun lei Governu nian iha Jornál Repúblika; promove publikasaun loloos ba diploma lejislativa Governu no órgaun sira seluk Estadu nian; garante kumpri regra prosedimentu Konsellu Ministru nian.

Delega ba Sekretáriu Estadu Konsellu Ministru responsabilidade jurídika ba Gráfika Nasionál.

Sekretáriu Estadu Asuntu Parlamentár fó tulun ba Primeiru-Ministru kona-ba relasaun Governu nian ho Parlamentu Nasionál no ho bankada parlamentár sira.

Delega ba Sekretáriu Estadu Asuntu Parlamentár responsabilidade jurídika ba Gabinete Apoiu Parlamentár.

Sekretáriu Estadu Komunikasaun Sosiál fó tulun ba Primeiru-Ministru no Ministru Prezidénsia Konsellu Ministru iha área Komunikasaun Sosiál nian.

Delega ba Sekretáriu Estadu Komunikasaun Sosiál kompeténsia hirak tuir mai: propoin polítika no elabora projetu regulamentasaun ne’ebé presiza iha área hotu-hotu komunikasaun sosiál nian; tau matan ba órgaun sira komunikisaun sosiál Estadu nian; garante atu fahe informasaun iha nível nasionál no internasionál.

Delega ba Sekretáriu Estadu Komunikasaun Sosiál responsabilidade jurídika ba servisu no organizmu hirak hanesan tuir mai: Diresaun Nasionál Diseminasaun ba Informasaun no Sentru Rádiu Komunidade.

Sekretáriu Estadu ba Fortalesimentu Institusionál fó tulun ba Primeiru-Ministru iha área Fortalesimentu Institusionál.

Delega ba Sekretáriu Estadu ba Fortalesimentu Institusionál kompeténsia hirak tuir mai: propoin planu no polítika desburokratizasaun administrasaun públika nian no fó apoiu ba implementasaun ba planu hirak ne’e iha instituisaun hotu-hotu Estadu nian atu hodi hadi’a kna’ar servisu públiku nian; koordena ho Instituisaun sira Estadu nian kona-ba implementasaun ba prosedimentu komunikasaun institusionál, atuhodi garante efisiénsia, komunikasaun no hadi’a imájen instituisaun sira nian; garante katak instituisaun sira hotu iha planu operasionál ba funsionamentu instituisaun ne’e rasik no formasaun ba funsionáriu sira; apoia dezenvolvimentu ba kapasidade planeamentu no reporte Governu tomak nian; propoin ba entidade relevante sira kona-ba planu formasaun kontínua ba tékniku sira hotu-hotu iha área ida-idak nian, iha instituisaun oin-oin Estadu nian, hodi garante efisiénsia ba prestasaun servisu; koordena ho instituisaun Estadu nian hodi halo abordajen ne’ebé fó rezultadu di’ak liu ba kapasitasaun; propoin ba entidade kompetente sira, bainhira presiza, aktu fiskalizasaun no auditoria, atu nune’e bele halakon burokratizasaun iha administrasaun públika, hodi garante rezultadu servisu nian ne’ebé loos; garante formasaun no fó nafatin asisténsia ba futura komisaun preparatória munisípiu nian liuhusi koordenasaun ho Ministériu Administrasaun Estatál, Ministériu Finansa no instituisaun hirak seluk ne’ebé relevante.

Sekretáriu Estadu ba Apoiu no Promosaun Setór Privadu fó tulun ba Primeiru-Ministru iha área relasaun Estadu nian ho setór ekonómiku privadu.

Delega ba Sekretáriu Estadu ba Apoiu no Promosaun Setór Privadu kompeténsia hirak tuir mai: propoin polítika lejislasaun no estabelese mekanizmu ne’ebé iha relasaun ho promosaun investimentu privadu no apoiu ba Estadu ho investimentu privadu iha koordenasaun ho entidade sira seluk ne’ebé relevante; propoin no implementa planu apoiu ba dezenvolvimentu setór privadu nasionál; promove sorumutu ho setór privadu nasionál, kona-ba ninia partisipasaun iha dezenvolvimentu nasaun nian hodi buka fó solusaun ba problema dezempregu no étika traballu; promove diálogu ho setór privadu hodi buka métodu atuasaun ida di’ak, kona-ba difikuldade no obstákulu ne’ebé hasoru, iha nia relasaun ho instituisaun finanseira Estadu nian; aprezenta proposta, hafoin rona tiha setór privadu, kona-ba formulasaun polítika no mekanizmu apoiu no insentivu, iha nia relasaun ho instituisaun finanseira no bankária sira; gere orsamentu kona-ba promosaun dezenvolvimentu setór privadu emprezariál no promove kriasaun Banku Dezenvolvimentu Nasionál, iha koordenasaun ho Ministériu Finansa no Banku Sentrál.

Delega ba Sekretáriu Estadu ba Apoiu no Promosaun Setór Privadu ba ninia responsabilidade Jurídika ba organizmu sira tuir mai: Institutu Apoiu Dezenvolvimentu Emprezariál; Ajénsia Espesializada Investimentu nian; Banku Nasionál Komersiál Timor-Leste no Sentru Bambu.

Sekretária Estadu Promosaun Igualdade fó tulun, tuir termu da-1, artigu da-10 Vise-Primeiru-Ministru iha konsepsaun, ezekusaun no avaliasaun polítika, ne’ebé define no aprova ona iha Konsellu Ministru, iha área sira promosaun igualdade nian ba feto no mane.

Delega ba Sekretária Estadu Promosaun Igualdade kompeténsia hirak tuir mai: apoia elaborasaun polítika globál no setoriál ne’ebé reflete iha promosaun igualdade no habiit feto timoroan nia knar iha sosiedade; elabora proposta normativa, hato’o pareser no intervein, tuir lei, iha domíniu tranversál iha área hotu-hotu ne’ebé relevante ba promosaun igualdade, hodi estabelese mekanizmu revizaun lei, polítika, orsamentu no programa sira Governu nian iha área sira ne’ebé mak iha ninia responsabilidade jurídika; koordena ho ministériu seluk-seluk, asaun ne’ebé loloos ba promosaun igualdade no habiit feto timoroan nia knar; dezenvolve parseria no fó apoiu ba iha organizasaun feto sira ne’ebé partisipa iha promosaun igualdade ba feto no mane, hodi asegura mekanizmu konsulta ho sosiedade sivil, instituisaun sira seluk husi Governu no organizasaun internasionál sira; promove asaun sensibilizasaun opiniaun públika no tuir prátika di’ak kona-ba igualdade ba feto no mane, partisipasaun feto no mane nian hotu iha vida ekonómika, sosiál, polítika no familiar no luta hasoru diskriminasaun no violénsia kontra feto; mantein opiniaun públika iha informasaun no sensibilizasaun kona-ba problema hirak ne’ebé iha relasaun ho igualdade no direitu feto nian ho rekursu ba meiu sira husi komunikasaun sosiál, fó sai publikasaun ka meiu sira seluk ne’ebé adekuadu; asegura modalidade partisipasaun institusaun sira nian no organizasaun não-governamentál ne’ebé kontribui hala’o polítika igualdade ba feto no mane, nune’e mós atu konfere kompeténsia téknika no haree loloos kualidade ema no entidade ne’ebé partisipa iha promosaun igualdade ba feto no mane; koopera ho organizasaun iha ámbitu komunitáriu no internasionál no organizmu estranjeiru sira ne’ebé mak hala’o knar hanesan, hodi partisipa iha orientasaun internasionál boboot sira kona-ba igualdade ba feto no mane no prmove ninia implementasaun iha nível nasionál.

Sekretáriu Estadu Juventude no Desportu, tuir termu da-1, artigu da-10, fó tulun ba Vise Primeiru Ministru atu halo konsepsaun, ezekusaun, koordenasaun no avaliasaun kona-ba polítika, ne’ebé Konsellu Ministru define no aprova, ba área sira kona-ba promosaun moris-di’ak no dezenvolvimentu juventude no desportu nian.

Kompeténsia Sekretáriu Estadu Juventude no Desportu maka hanesan tuir mai ne’e: propoin polítika no elabora projetu regulamentasaun nian sira ne’ebé importante ba área sira juventude no desportu nian; asegura implementasaun no ezekusaun kuadru legál no regulamentadór kona-ba atividade hirak ne’ebé iha relasaun ho juventude no desportu; promove atividade hirak ne’ebé destina ba foin-sa’e sira, liu-liu iha kampu sira hanesan desportu, arte no kultura; estabelese mekanizmu sira kolaborasaun no koordenasaun nian ho órgaun Governu nian sira seluk ne’ebé maka tau matan ba área sira ne’ebé iha ligasaun ho kompeténsia hirak ne’e.

Sekretáriu Estadu Juventude no Desportu hetan responsabilidade atu tau matan ba entidade sira hanesan tuir mai ne’e: Komisaun Nasionál Desportu (KND) no Komisaun Reguladora Arte Marsiál (KRAM).

Sekretáriu Estadu ba Polítika kona-ba Formasaun Profisionál no Empregu, tuir termu da-1, husi artigu da-10, fó tulun ba Vise-Primeiru-Ministru atu halo konsepsaun, koordenasaun no avaliasaun kona-ba polítika, ne’ebé Konsellu Ministru define no aprova, ba área sira kona-ba servisu, formasaun profisionál no empregu.

Kompeténsia Sekretáriu Estadu ba Polítika kona-ba Formasaun Profisionál no Empregu nian maka hanesan tuir mai ne’e: propoin polítika no elabora projetu regulamentasaun nian sira iha área servisu, formasaun profisionál no empregu nian; promove programa no atividade sira iha área servisu, formasaun profisionál no empregu, hamutuk ho instituisaun relevante sira seluk; promove relasaun tripartida entre Governu, servisu-na’in no empregadór sira, ho objetivu atu bele previne konflitu ne’ebé iha relasaun ho servisu; promove knaar mediasaun, konsiliasaun no arbitrajen iha ámbitu relasaun servisu nian; insentiva atu timoroan sira bele hetan kontratu iha rai-li’ur; regulamenta no fiskaliza servisu ema estranjeiru sira nian iha Timor-Leste; halo fiskalizasaun kona-ba kumprimentu dispozisaun legál sira iha matéria servisu nian; promove no fiskaliza Saúde, Seguransa no Ijiene iha servisu no estabelese mekanizmu kona-ba kolaborasaun no koordenasaun ho órgaun Governu nian sira seluk ne’ebé fó mós tutela ba área hirak ne’ebé iha ligasaun.

Sekretáriu Estadu ba Polítika kona-ba Formasaun Profisionál no Empregu iha responsabilidade jurídika atu tau matan ba organizmu sira hanesan tuir mai ne’e: Sentru Nasionál Formasaun Profisionál no Empregu Tibar; Sentru Nasionál Formasaun Profisionál Bekora; Institutu Nasionál Dezenvolvimentu Maundeobra no Inspesaun Jerál Servisu nian.

Sekretáriu Estadu ba Asuntu ASEAN nian ninia kompeténsia maka hanesan tuir mai ne’e: planea no ezekuta preparasaun kona-ba adezaun Timor-Leste nian ba Oraganizasaun Nasaun sira Sudeste Ázia nian (ASEAN) no asegura reprezentasaun nasaun nian iha sorumutu no atividade sira organisaun ne’e nian.

Sekretáriu Estadu ba Asuntu ASEAN tulun Ministru Estadu no Negósiu Estranjeiru no Kooperasaun.

Kompeténsia Sekretáriu Estadu Defeza nian maka hanesan tuir mai ne’e: propoin polítika no elabora projetu regulamentasaun nian sira ne’ebé importante ba área hirak ne’ebé nia iha responsabilidade jurídika; ho koordenasaun ho Ministériu Negósiu Estranjeiru, halo akordu internasionál sira iha matéria defeza no kooperasaun militár; administra no fiskaliza Forsa Armada Timor-Leste nian; promove adekuasaun meiu militár nian sira; fiskaliza navegasaun iha tasi no lalehan ho fin militár nian no estabelese mekanizmu kolaborasaun no koordenasaun nian ho órgaun Governu nian sira seluk ne’ebé fó tutela ba área hirak ne’ebé iha ligasaun.

Sekretáriu Estadu Defeza tulun Ministru Defeza no Seguransa.

Kompeténsia Sekretáriu Estadu Seguransa nian maka hanesan tuir mai ne’e: propoin polítika no elabora projetu regulamentasaun nian sira ne’ebé importante ba área hirak ne’ebé nia iha responsabilidade jurídika; ezerse tutela ba forsa polisiál Timor-Leste nian; promove adekuasaun meiu polisiál nian sira; fó seguransa ne’ebé di’ak ba patrimóniu imobiliáriu Estadu nian; fiskaliza no kontrola ezersísiu atividade seguransa privada sira nian; promove dezenvolvimentu estratéjia prevensaun, mediasaun nian no rezolusaun konflitu iha komunidade; ezerse tutela ba servisu imigrasaun nian sira; fiskaliza servisu navegasaun nian iha tasi no lalehan ho fin sivíl nian; tau matan ba seguransa ema no sasán sira nian iha tempu ahi-han, bee-sa’e, rai-monu, rai-nakdoko no iha situsaun hotu-hotu ne’ebé tau sira iha risku; dezenvolve, ho koordenasaun ho entidade kompetente sira seluk, programa kona-ba edukasaun sívika atu bele hasoru dezastre natural sira no dezastre sira seluk ne’ebé mosu tanba ema nia hahalok hodi hametin solidariedade sosiál no estabelese mekanizmu kolaborasaun no koordenasaun nian ho órgaun Governu nian sira seluk ne’ebé fó tutela ba área hirak ne’ebé iha ligasaun.

Sekretáriu Estadu Seguransa tulun Ministru Defeza no Seguransa.

Kompeténsia Sekretáriu Estadu Rai no Propriedade nian maka hanesan tuir mai ne’e: organiza rejistu kona-ba prédiu rústiku no urbanu sira no rejistu beins la book-an sira no administra no halo jestaun ne’ebé koerente kona-ba patriomóniu imobiliáriu Estadu nian.

Sekretáriu Estadu Rai no Propriedade tulun Ministru Justisa.

Kompeténsia Sekretáriu Estadu Dezenvolvimentu Lokál nian maka hirak ne’ebé: promove no ezekuta polítika kona-ba dezenvolvimentu lokál no rurál no hamenus dezigualdade ekonómika no sosiál entre rejiaun sira; koordena no fahe informasaun interna no esterna sira ba estrutura Adminitrasaun Lokál Estadu nian no mós koordenasaun programa dezenvolvimentu Suku sira, Planu Dezenvolvimentu Integradu Distritál no Programa ba Uma Hela-fatin “MDG’s”.

Sekretáriu Estadu Dezenvolvimentu Lokál tulun Ministru Administrasaun Estatál.

Kompeténsia Sekretáriu Estadu Dezentralizasaun Administrativa nian maka hirak ne’ebé: koordena no fiskaliza atividade administrasaun distritu no sub-distritu nian sira, servisu no organízmu sira seluk husi administrasaun lokál; promove no kondúz prosesu desentralizasaun administrativa no kriasaun munisipalidade no mós ho jestaun kona-ba Programa Dezenvolvimentu Desentralizadu.

Sekretáriu Estadu Dezentralizasaun Administrativa tulun Ministru Administrasaun Estatál.

Kompeténsia Sekretáriu Estadu Komérsiu nian maka hirak ne’ebé: apresia no fó lisensa ba projetu instalasaun no funsionamentu empriendimentu komersiál nian; halo inspesaun no fiskalizasaun ba atividade empriendimentu komersiál sira tuir lei; mantein no administra sentru informasaun no dokumentasaun nian ida kona-ba empreza sira no promove regra interna no internasionál kona-ba normalizasaun, metrolojía no kontrolu kualidade nian, padraun medida unidade nian no magnitude fízika nian.

Sekretáriu Estadu Komérsiu tulun Ministru Komérsiu, Indústria no Ambiente.

Kompeténsia Sekretáriu Estadu Indústria no Kooperativa nian maka hirak ne’ebé: apresia no fó lisensa ba projetu instalasaun no funsionamentu empriendimentu industriál nian; halo inspesaun no fiskalizasaun ba atividade empriendimentu industriál sira tuir lei; mantein no administra sentru informasaun no dokumentasaun nian ida kona-ba empreza sira; propoin kualifikasaun no klasifikasaun empriendimentu industrial sira nian tuir buat ne’ebé bele aplika ho lei; habelar importánsia setór ekonómiku kooperativu no mikro no empreza mikro no kiik sira, promove formasaun kona-ba oainsá harii, organiza, jere no halo kontabilidade kooperativa no empreza kiik sira nian no organiza no administra rejistu kona-ba propriedade industriál.

Sekretáriu Estadu Indústria no Kooperativa tulun Ministru Komérsiu, Indústria no Ambiente.

Kompeténsia Sekretáriu Estadu Ambiente nian maka hirak ne’ebé: elabora polítika ambientál no halo avaliasaun ba rezultadu hirak ne’ebé alkansa ona; promove, akompaña no apoia estratéjia integrasaun ambiente nian iha polítika setoriál; halo avaliasaun ambientál estratéjika kona-ba polítika, planu, programa no lejizlasaun no koordena prosesu avaliasaun nian kona-ba impaktu ambientál husi projetu iha nível nasionál, inklui prosedimentu kona-ba konsulta públiku; asegura, iha termu jerál no iha sede lisensiamentu ambientál nian, adosaun no fiskalizasaun kona-ba medida prevensaun no kontrolu nian ne’ebé integradu husi poluisaun husi instalasaun ne’ebé nia abranje.

Sekretáriu Estadu Ambiente tulun Ministru Komérsiu, Indústria no Ambiente.

Delega ba Sekretáriu Estadu Seguransa Sosiál, kompeténsia hirak ne’ebé: jere no implementa sistema seguransa sosiál ba serbisu-na’in sira no populasaun sira seluk.

Sekretáriu Estadu Seguransa Sosiál tulun Ministra Solidariedade Sosiál.

Delega ba Sekretáriu Estadu Asuntu Kombatente Libertasaun Nasionál, kompeténsia hirak ne’ebé: promove programa desmobilizasaun, reforma no pensaun ne’ebé atribui ba Kombatente Libertasaun Nasionál nian; providénsia akompaña, no inklui fali veteranu iha sosiedade veteranu no Kombatente Libertasaun Nasionál sira nian.

Sekretáriu Estadu Asuntu Kombatente Libertasaun Nasionál tulun Ministra Solidariedade Sosiál.

Delega ba Sekretáriu Estadu Obra Públika kompeténsia hirak ne’ebé: kria no implementa kuadru legál no regulamentár atividade konstrusaun sivil no investigasaun kona-ba materiál sira konstrusaun nian; estuda no ezekuta obra sira ba protesaun, konservasaun no reparasaun ba ponte, estrada, mota ain no tasi ninin, liu-liu halo kontrolu ba bee lihun; propoin no dezenvolve polítika nasionál ba abitasaun no planeamentu espasiál; propoin no dezenvolve planeamentu urbanu; estabelese koordenasaun no promove kualidade projetu fíziku ne’ebé mak Estadu halo; promove realizasaun obra sira konstrusaun, konservasaun no reparasaun edifísiu públiku, monumentu no instalasaun espesiál, iha kazu obra hirak ne’ebé hala’o tuir lei.

Sekretáriu Estadu Obra Públika tulun Ministru Obra Públika.

Delega ba Sekretáriu Estadu Eletrisidade, kompeténsia hirak ne’ebé prevee: asegura koordenasaun setór enerjétiku renovável no fó aten brani atu komplementa entre ninia modu oinoin nune’e mós ba ninia kompetisaun, iha ordem atu bele satisfás di’ak liu utente sira; dezenvolve kuadru legál no regulamentár ba atividade sira ne’ebé iha relasaun ho rekursu enerjétiku renovável; regula iha koordenasau ho ministériu sira seluk, operadór sira iha área produsaun eletrisidade nian; dezenvolve estudu sira kona-ba kapasidade rekursu enerjétiku renovável no enerjia alternativa sira.

Sekretáriu Estadu Eletrisidade tulun Ministru Obra Públika.

Delega ba Sekretáriu Estadu Água, Saneamentu no Urbanizasaun, kompeténsia hirak ne’ebé: promove estudu no ezekusaun sistema foun rede infra-estrutura nian kona-ba distribuisaun bee, nune’e mós saneamentu báziku, no fiskaliza ninia funsionamentu no esplorasaun, la hasees atribuisaun sira ne’e hosi órgaun sira seluk.

Sekretáriu Estadu Água, Saneamentu no Urbanizasaun tulun Ministru Obra Públika.

Delega ba Sekretáriu Estadu Floresta no Konservasaun Natureza kompeténsia hirak ne’ebé: jere Parke Nasionál no Área Protejida sira no garante protesaun no konservasaun natureza no biodiversidade, hodi kontrola implementasaun polítika no fiskaliza atividade sira ne’ebé viola kualidade tomak fauna no flora nasionál nian, liuhusi kolaborasaun ho entidade ne’ebé mak iha relasaun.

Sekretáriu Estadu Floresta no Konservasaun Natureza tulun Ministru Agrikultura no Peska.

Delega ba Sekretáriu Estadu Peska kompeténsia Ministériu Agrikultura no Peska kona-ba atividade peska nian.

Sekretáriu Estadu Peska tulun Ministru Agrikultura no Peska.

Delega ba Sekretáriu Estadu Pekuária kompeténsia Ministériu Agrikultura no Peska nian kona-ba atividade pekuária.

Sekretáriu Estadu Pekuária tulun Ministru Agrikultura no Peska.

Delega ba Sekretária Estadu Arte no Kultura kompeténsia hirak ne’ebé: halo polítika no regulamentu ba konservasaun, protesaun no prezervasaun ba patrimóniu istóriku kulturál sira; propoin polítika ba definisaun no dezenvolvimentu kultura; estabelese polítika kooperasaun no troka kulturál ho país sira KPLP nian no organizasaun kulturál no país sira rejiaun nian; estabelese polítika kooperasaun ho UNESKU; promove kriasaun Biblioteka Nasionál no Muzeu Nasionál; dezenvolve programa sira, iha koordenasaun ho Ministériu Edukasaun atu hatama kultura iha ensinu Timor-Leste nian; garante prezervasaun ida adekuada ba dokumentu ofisiál no istóriku sira; promove kriasaun Akademia Arte no Indústria Kreativa Kulturál Timor-Leste nian.

Sekretária Estadu Arte no Kultura nune’e mós nu’udar tutela kona-ba servisu no organizmu hirak tuir mai ne’ebé pasa ba Ministériu Turizmu: Diresaun Jerál Kultura; Unidade Implementasaun ba Akademia Arte no Indústria Kulturál sira Timor-Leste nian; Komisaun Akompañamentu Akademia Arte no Indústria Kulturál sira Timor-Leste nian.

Sekretária Estadu Arte no Kultura tulun Ministru Turizmu.