Ministru Estadu no Prezidénsia Konsellu Ministru no

  Porta-Vóz Ofisiál Governu Timor-Leste

 

Dili, loron 5 fulan-fevereiru tinan 2015

Timor-Leste promove koordenasaun atu maksimiza rezultadu iha Sorumutuk Trimestrál Parseiru Dezenvolvimentu nian

Ohin dadersan, Primeiro-Ministro [Primeiru Ministru] Kay Rala Xanana Gusmão iha Ministério dos Negócios Estrangeiros e Cooperação [Ministériu Negósius Etranjeirus no Kooperasaun] fó boasvindas ba parseiru dezenvolvimentu sira iha ninia sorumutuk trimestrál [fulan tolu-tolu] dahuluk tinan 2015 nian. Primeiro-Ministro ko’alia liuliu kona-ba akordu entre Governu no parseiru sira atu “servisu hamutuk, fó laran ba malu no simu malu nia hanoin no kompriende malu atubele lori progresu ba ita  nia nasaun” no nia hateten mós katak sira hotu ne’ebé mak halibur malu iha sorumutuk ne’e iha  objetivu ne’ebé hanesan “hadi’a povo timoroan sira nia moris”.

Mai mós iha sorumutuk ne’e Ministru sira, Parseiru sira Dezenvolvimentu nian, Diretór-Jerál sira no reprezentante Sociedade Civil [Sosiedade Sivil] sira. Dr. Noeleen Heyzer, Sub-Secretária-Geral das Nações Unidas e Conselheira Especial do Secretário-Geral das Nações Unidas para Timor-Leste [Sub-Sekretária-Jerál Nasoens Unidas no Konselleira Espesiál Sekretáriu-Jerál Nasoens Unidas nian], ne’ebé mak partisipa mós hanesan bainaka espesiál.

Timor-Leste rekoñesidu mós hanesan nasaun ida ne’ebé inovadór iha área koordenasaun dezenvolvimetu nian, ne’ebé kontribui ona ba redifinisaun paradigma dezenvolvimentu nível mundiál nian liuhosi nia apoiu ba Akordu Foun (New Deal), no hanesan nasaun ida ne’ebé mak ukun rasik ninia-an no ukun iha dalan rezilénsia nian. Tinan ida ne’e sei hala’o Sorumutuk Trimestrál regulár  Parseiru sira Dezenvolvimentu nian no, hanesan baibain, Sorumutuk Anuál ida Parseiru sira Dezenvolvimentu Timor-Leste nian (TLDPM), ne’ebé tama ona iha ajenda ba-iha fulan-juñu tinan ida ne’e nian.

Iha sorumutuk ohin nian, Ministra das Finanças [Ministra Finansas), Emília Pires no funsionáriu sira seluk Ministério das Finanças [Ministériu Finansas nian] fó hatene ba partisipante sira kona-ba Dekretu ba Prosedimentu Finansas Públikas no Ezekusaun Orsamentu Jerál Estadu nian ba tinan 2015, Dekretu-Lei kona-ba Kompeténsia Profisionál Jestaun Finansas Públikas nian,  proposta Dekretu-Lei kona-ba Rejime Jurídiku “Contrato a Termo Certo” iha Administrasaun Públika no sira mós diskuti kona-ba Kalendáriu Eventu nian ida ba tinan 2015. Aprezentasaun “Planu Eatratéjiku Dezenvolvimentu nian kona-ba Sistema Integradu Indikadór nian sira”, estuda métodu sira hodi hatene kona-ba progresu iha realizasaun objetivu dezenvolvimentu Timor-Leste nian.

Parseiru sira dezenvolvimentu nian iha mós biban hodi bele ko’alia hamutuk ho membru Governu sira no funsionáriu sira Ministério das Finanças nian hodi hato’o sira kestaun no buka hatene hodi fahe ba malu sira ninia preokupasaun.

Iha sorumutuk ida ne’e Primeiro-Ministro ko’alia liuliu mós kona-ba importánsia planeamentu no investimentu estratéjiku, nesesidade atu hadi’a kualidade servisu no knaar importante liu mak atu kria servisu ba foin sa’e sira.

Parseiru sira bele iha kontaktu lorloron ho funsionáriu sira Ministério das Finanças liuhusi Unidade Jestaun Parseiru sira Dezenvolvimentu nian, ne’ebé diriji husi Câncio de Jesus Oliveira.

Portavós V Governo Constitucional [Governu Konstitusionál da-V nian], Ministro de Estado [Ministru Estadu] Agio Pareira, hateten katak, “Governu hahii tebes esforsu parseiru sira dezenvolvimentu nian hodi fó sira ninia tulun ba-iha prioridade sira Governo nian. Iha komprimisu parseiru sira hamutuk ho Governo kontinua hala’o nafatin hodi servisu hamutuk, hatudu rezultadu di’ak ne’ebé fó benefísiu ba Povu Timor-Leste nian. Koordenasaun importante tebes no laiha valór ne’ebé mak aas liu”.