Ministru Estadu no Prezidénsia Konsellu Ministru no

  Porta-Vóz Ofisiál Governu Timor-Leste

 

Dili, loron 2 fulan-fevereiru tinan 2015

Primeiro-Ministro no Presidente da Repúblika hala’o sorumutu atu diskuti kona-ba Reestruturasaun Govern nian

Primeiro-Ministro [Primeiru-Ministru], Kay Rala Xanana Gusmão, no Presidente da República [Prezidente Repúblika] Taur Matan Ruak, hala’o sorumutu ohin loraik ne’e, iha tuku tolu lorokraik, atu diskuti kona-ba proposta reestruturasaun husi V Governo Constitucional [Governu Konstitusionál da-V].

Konsulta prezidensiál sira kona-ba restruturasaun Governu nian sei hala’o durante semana ida ne’e nia laran.

Iha tempu hirak liu ba ne’ebé Primeiru-Ministru Xanana Gusmão fó sai tiha ona kona-ba reestruturasaun ida boot hosi Governu, hodi esplika katak objetivu mak atu forma Ezekutivu ida  efisiente no efikáz, ne’ebé foka liu ba-iha alkansa prestasaun servisu nian ida ne’ebé di’ak liu  no fó fali kbiit foun ba Governu atubele aselera implementasaun ba Planu Estratéjiku Dezenvolvimentu nian.

Ba ida ne’e, tenki integra ema ne’ebé mak iha kualifikasaun aas tebes no iha kapasidade atu serbi,  iha kompeténsia no esperiénsia ne’ebé signifikativu ba Governu. Sei hamenus ezekutivu, atu nune’e forma grupu ida ne’ebé efisiente no funsionál liu, hodi haree liu ba-iha rezultadu sira, nune’e fó mós biban ba líder husi jerasaun foun sira ne’ebé bele kontribui ba Nasaun.

Sei hato’o tan deklarasaun hirak seluk bainhira Prezidente Repúblika no Primeiru-Ministru iha deklarasaun ofisiál sira kona-ba Reestruturasaun Governu nian.