Vise-Ministru Negósiu Estranjeiru no Koperasaun, Constâncio da Conceição Pinto, akompañia hosi Embaixadór Timor-Leste iha Brazil, Gregorio de Sousa, partisipa seremónia tomada de posse ba Prezidénte re-eleitu Brazil nian, Dilma Rousseff, loron 1 Janeiru 2015 iha Brazília.

Seremónia posse ba mandatu daruak Prezidénte Dilma nian hetan partisipasaun hosi delegasaun internasionál hamutuk 70 ne’ebé kompostu hosi Xefe Estadu ka Xefe Governu hamutuk nain 15 no Vise Xefe Estadu ka Vise Xefe Governu hamutuk nain 15.

“Vizíta ida-ne’e hanesan onra ida, reprezenta Estadu no Governu Timor-Leste. Seremónia ne’e di’ak tebes, simples maibe furak tebes. Tanba ne’e, ita hein katak ho re-eleisaun Prezidénte Dilma ne’e bele hametin tan relasaun entre rai rua. Ita mos hein katak Prezidénte Dilma bele fó apoiu ba CPLP,” Constancio Pinto informa.

Durante partisipa iha tomada de posse ida ne’e, Vise-Ministru mós hasoru malu ho Prezidente Repúblika Gine-Bissau, Jose Mario Vaz hamutuk ho delegasaun, ko’alia kona-ba dezenvolvimentu politíku, ekonómiku no seguransaiha Guine-Bissau.

Prezidente Gine-Bissau husu atu Timor-Leste, atu kontinua fó apoiu liuliu iha área reforma seguransa, investimentu iha área agrikultura no hein Timor-Leste nia kontribuisaun iha diskusaun Meza-Redonda doadores ba Gine-Bissau, fulan Fevereiru 2015 mai.

Entertantu Prezidente Gine-Bissau informa, situasaun Guinee-Bissau iha paz nian laran no trankuillu. Masibe, frazil mós iha seitór ekonómiku.

Vise Ministru reitera nafatin Timor-Leste nian apoiu ba Gine-Bissau, liuliu seitór reforma seguransa ne’ebé nesesariu tebes atu garante sustentabilidade no paz iha Gine-Bissau.