Ministru Estadu no Prezidénsia Konsellu Ministru no

  Porta-Vóz Ofisiál Governu Timor-Leste

 

Dili, loron 28 fulan-janeiru tinan 2015

Adeus Tom Uren

 

Ho laran triste tebes  maka Governu Timor-Leste nian rona mate Onorável Tom Uren C, iha loron 26 fulan-Janeiru tinan 2015. Hodi Governu nia naran, Primeiru-Ministru Kay Rala Xanan Gusmão, hato’o  sentidu kondolénsia ba nia família,maluk no belun sira.

Tom Uren ne’e hetan konsiderasaun boot iha Timor-Leste, nu’udar ema ida ne’ebé dignu no korajozu. Bainhira vise Prezidente Partidu Trabalista Australianu  hola parte ba kauza povu timor-oan sira nian, maibé  ema Australianu oituan liu mak iha situasaun polítika Australia nian preparadu ona atu foti lian hodi defende dereitu sira povu ida ne’e nian. Ninia determinasaun maka halo adosaun ba rezolusaun ida ne’ebé favorese autodeterminasaun ba iha konferénsia Partidu Trabalista Australianu nian iha tinan 1977, no kontribui ba audénsia sira kongresu Estadus Unidus Amerika nian kona-ba Timor-Leste mós iha tinan ne’e duni. Nia apoia nafatin timor-oan sira ne’ebé husu azilu polítiku no ho ninia kompañeiru  no veteranu sira II Guerra Mundial nian, maka Paddy Kenneally no Gordon Hart, nia sai nuudar na’in ba  asosiasaun Autraliana Timor Leste nian iha Nova Gales do Sul {AETA-NSW}.Tom Uren koa’lia nafatin no bebeik durante  tinan hirak luta nian kona-ba saida maka mosu iha Timor-Leste no nia fó nafatin apoiu ba ativista Australiana sira ne’ebé maka servisu ho laran luak ba povu timor-oan sira.

Ho nia esperiénsia hanesan ema dadur funu nian bainhira hetan kaer tiha husi Timor Osidentál, iha tinan 1942 marka ona ba nafatin iha ninia moris. Esperiénsia ida ne’e bele halo nia sai ema mane ida ne’ebé haree buat hotu negativu nian de’it maibé nia halo oinseluk hodi fiar tebes kona-ba valór hosi tulun no  asaun hamutuk nian. Tom Uren konkorda ho liafuan sira husi Martin Luther King katak “Ódiu ne’e  bele estraga personalidade ema nian no halo foer klamar. Ne’e halo aat liu ba ema sé maka rai ódiu  liufali ema ne’ebé maka hetan ódiu.”

Afoin funu hotu tiha, nia nunka haluha nia kompañeiru dadur funu nain sira no nia servisu ba sira, iha nia moris tomak. Ba nia belum timor oan sira, ne’ebé nia hetan iha tinan hirak nia laran, haree katak sofrimentu no injustisa ne’ebé mak nia iha atu hanesan mós ho sofrimentu no injustisa ne’ebé maka povu timor oan sira iha.

Iha loron 1 fulan jullu tinan 2013 Tom Uren hetan kondekorasaun ho Medalla Ordem Timor-Leste nian, husi Prezidente Timor-Leste, Sua Exselénsia Taur Matan Ruak, iha serimónia ida iha Camberra. Medalla ne’e entrega ona ba ninia oan mane, Mick.

Medalla Orden Timor-Leste nian, nu’udar prémiu  ida prestíjiu no dignidade ne’ebé maka fó ba ema hotu ne’ebé kontribui tebe-tebes ba benefísiu ba Timor-Leste, timoroan no ba ema hotu-hotu nian. Kona-ba kazu Tom Uren, iha ninia esperiénsia moris nian, nia kontribui ba buat tolu ne’e hotu. Timor-Leste sei  agradese nafatin ba ninia kontribuisaun no ninia karáter.

Iha entrevista ida halo iha tinan 1996, ema barak husu ba Tom Uren oinsá maka ema bele hanoin hikas fali nia. Nia hatán hodi dehan “nu’udar ema ida ho laran kmaan no laran luak, nu’udar lutadór ba pás”. Timor-Leste sei hanoin nafatin Tom Uren ne’e nu’udar ema ne’ebé halo ona diferensa ba-iha istória ita nia nasaun nian, nu’udar ema ida oinseluk tebe-tebes, laran kmaan no laran luak no hanesan ema lutadór ida ba pás.