Primeiru-Ministru Kay Rala Xanana Gusmão nu’udar mós Ministru Defeza no Seguransa fó juramentu ba Eis Membru Arte marsiál sira hosi Instituisaun F-FDTL no PNTL hamutuk ema na’in 288 iha Palásiu Governu, loron 13 Janeiru 2015. Total numéru ne’e kompostu husi membru PSHT (Persaudaraan Setia Hati Terate) na’in 145, Ikatan Kera Sakti (IKS) Sna’in 88 no Korka na’in 55.

Primeiru-Ministru, Xanana Gusmão iah juramentu ne’e hateten, juramentu ba eis membru grupu arte marsiál sira hosi Forsa Defeza Timor-Leste (F-FDTL) no Polísia Nasionál Timor-Leste (PNTL) ne’e, relasiona ho problema envolvimentu membru forsa defeza no forsa siguransa balun iha grupu arte marsiais.

Xanana Gusmão reafirma Estadu estabelese forsa defeza no forsa siguransa, atu asegura povu nia moris no nasaun nia siguransa. “Imi mak salva povu, imi mak aseguru povu. Povu tomak hein imi, atu sai lutu ba nasaun no lutu ba sira-nia moris diak lorloron,” Xanana dehan.

Ministru Defeza no Seguransa ne’e mó esplika, Estadu la premite membru F-FDTL no PNTL atu involve no haki’ak grupu, hodi hatauk povu no estraga joven sira. Membru forsa defeza no siguransa, tenki hatudu dexiplina iha instituisaun ida-idak.

Ho juramentu iha Bandeira Nasionál no instituisaun rua nia okos, garante katak sei la involve aan tan ona.  Husu membru F-FDTL no PNTL, atu servisu de’it tuir dever konstitusionál. Maibé karik Juramentu ne’e liu tiha, mak sei envolve nafatin, desizaun ikus maka tenki hasai nia hosi instituisaun refere.

“Ha’u  hus ba imi, atu sai membru PNTL no F-FDTL ne’ebé di’ak. Tanba funu ita-nia rai, seidauk  to’o atu dezenvolve ita-nia rai ne’e. Ii tenki forte hodi defende rai ida-ne’e no povu ne’e. Ita-nia dezenvolvimentu ne’e foin hahu. Husu imi-nia komprimisiu no espiritu, atu soe ona imi-nia relasaun emosional ho arte marsiál sira,” Xanana dehan.

Serimonia Juramentu ne’e, asiste  direitamente hosi Vise-Primeiru-Ministru, Fernando La Sama de Araujo, Xefé Estadu Maior F-FDTL, Major Jeneral Lere Anan Timur, Komandante Jerál PNTL, Longuinhos Monteiro, membru Governu sira, funsiunariu sira iha Palásiu Governu no komunidade balun.