Ministru Estadu no Prezidénsia Konsellu Ministru no

  Porta-Vóz Ofisiál Governu Timor-Leste

 Dili, loron 8 fulan-janeiru tinan 2015

Portugál reforsa kooperasaun iha setór Edukasaun

 

Ministru Edukasaun Timor-Leste, Bendito dos Santos Freitas, no Ministru Edukasaun no Siénsia Portugal, Nuno Crato, sira asina akordu kooperasaun nian ida iha setór edukasaun nian iha loron  2, fulan janeiru, sexta-feira, iha Lisboa. Akordu ne’e estabelese protokolu ida ba implementasaun no operasionalizasaun projetu “Sentru Aprendizajen no Formasaun ba Profesór Timor-Leste nian sira”, ne’ebé maka sei halibur profesór ema portugál nian besik na’in 150 ne’ebé prevee katak sira sei to’o iha Timor-Leste iha 2015.

Kooperasaun bilateral ida ne’e determina ona atu konslodia susesu kona-ba apoiu ne’ebé maka oras ne’e foka ba Eskola Referénsia 11 iha país nia laran tomak, ne’ebé kolega ema portugál no timor oan sira servisu hamutuk hodi bele alkansa prátika edukasionál hirak diak liu iha hanorin Kurríkulu Nasionál Timor-Leste nian. Hosi tinan 2011 maka koloka ona profesór ema portugál nian sira iha eskola hirak ne’e, la’os deit iha ensinu pré-eskolar maibé mos iha 1º no 2º sicklu ensinu báziku, nune’e mos atu fo formasaun bainhira hala’o hela servisu ba profesór timor oan sira.

Iha tinan 2015 reforsu ba apoiu ne’e sei bele hadia diak liu tan formasaun ba profesór sira, nune’e mos formasaun ba pesoál administrasaun nian iha eskola sira no jestór eskolár sira. Planu sira ba tinan ida ne’e mos inklui harí Eskola Referénsia iha Viqueque no Ainaro. Reforsu ida ne’e hasa’e total Eskola Referénsia ba 13, hodi funsiona eskola ida iha kada Munisípiu Timor-Leste nian.

Profesór timor oan besik na’in 30, ne’ebé maka hotu ona sira nia formasaun iha Eskola Referénsia sira, oras ne’e sei integra ba iha Sentru Aprendizajen no Formasaun Profesór nian sira atu nune’e sira bele fahe sira nia kompeténsia hamutuk ho alunu no profesór sira.

Ministru Edukasaun no Siénsia portugés, Nuno Crato, afirma katak kooperasaun entre Portugal no Timor-Leste iha área edukasaun nian sai hanesan “ezemplu”.

Ministru Edukasaun Timor-Leste, Bendito dos Santos Freitas, dehan katak ida ne’e hanesan projetu ida ne’ebé importante tebetebes, ba Portugal no mós ba Timor-Leste, no hatudu ninia laran haksolok ba esforsu husi profesór portugés no timoroan hotu-hotu ne’ebé partisipa iha kooperasaun bilaterál ne’e to’o agora. Ministru sauda profesór foun sira ne’ebé sei to’o iha Timor-Leste iha tinan 2015 no repete tan ninia agradesimentu ba Governu Portugal nian ba reforsu iha kooperasaun ne’e.