Ministru Estadu no Prezidénsia Konsellu Ministru no

  Porta-Vóz Ofisiál Governu Timor-Leste

 Dili, loron 19 fulan-dezembru tinan 2014

Timor-Leste louva kampaña Juíza Natércia Gusmão

Iha loron 16 fulan-dezembru, Asembleia Estadu Parte fó sai rezultadu finál kona-ba eleisaun juis foun na’in neen  ba Tribunál Penál Internasionál. Hafoin hala’o tiha kampaña ida maka’as no halo konpetisaun lubun ida, kandidata Timor-Leste nian la eleita, hetan sétimu lugar. Votasaun hahú iha loron 8 fulan-dezembru. Atu to’o ba-iha rezultadu finál nian, presiza votasaun ronda ruanulu-resin-rua. Atu to’o ba-iha rezultadu finál nian, presiza votasaun ronda ruanulu-resin-rua. Iha ronda ba da-12, Juíza Natércia hetan votasaun boot liu, hosi kandidatu na’in tolu seluk, maibé nia la hetan maioria husi dois tersus nian ne’ebé presiza ba eleisaun. Iha ronda tuir mai, hosi kandidatu rua seluk, nia hetan de’it votu 57, Peter Kovács, kandidatu  Ungria nian, ne’ebé hakat liu nia ho votu 60.

Iha ne’ebá kandidatu rua ne’e hotu hatudu ona prova ida husi sira nia esforsu ne’ebé maka’as, iha tan ronda 9 votasaun nian molok kandidatu úngaru ikus mai konsege hetan maioria nesesária atu manaan iha eleisaun.

Governu Timor-Leste hahii ba juis foun sira ne’ebé eleitu no hahii mós esforsu hirak Juíza Natércia nian no ba sira hotu ne’ebé tulun nia iha ninia kampaña. Iha Novaiorke ema simu nia di’ak no ema barak hakfodak ho ninia esperiénsia no hatudu ninia prátika konkreta. Embaixada Timor-Leste nian iha Nasoens Unidas, ho sede iha Novaiorke, la kole atu promove ninia nomeasaun, ne’ebé lidera husi Embaixadora Sofia Borges.

Agradese mos ba ema hotu ne’ebé apoiu ona kandidatura Juiza Natércia nian, liu-liu solidariedade no apoiu hirak hato’o hosi Estadu ki’ik sira. Governu Timor-Leste kontinua servisu maka’as atu apoiu TPI no luta internasionál hasoru umpunidade.

Maski ema lamenta uitoan, tanba la iha kandidatu feto ida mak eleita, maibé importante atu foti ba ás katak TPI bele de’it sai forti, bainhira Tribunál simu esperiénsia oin-oin hosi ninia Juiz sira. Ho sentidu ida ne’e, maka Estadu hirak ki’ik mós fo sira nia kontribuisan ne’ebé vale duni ba TPI, ne’ebé bele halo Tribunál sai riku no mós sai meta komún ba universalizasaun nian.

Porta-voz Governu nian, Ministru Estadu Agio Pereira, hatete katak “kampaña ba eleisaun ba Tribunál Penál Internasionál ne’e aumenta ona vizibilidade internasionál Timor-Leste nian no manan ona respeitu hosi ema barak iha komunidade internasionál, iha Novaiorque. Ita agradese Juiza Natércia Gusmão Pereira tanba ninia servisu maka’as no komportamentu.”