Governu Timor-Leste

Ministru Estadu no Prezidénsia Konsellu Ministrus, Ágio Pereira, hakotu ninia vizita ida servisu nian ba iha Prinsipadu Mónaku. Durante vizita loron rua, hahú hosi loron 9 to’o loron 11 fulan-dezembru, Ministru hala’o sorumutuk ho Xefe Estadu Mónaku nian, Sua Alteza Serenísima Prínsipe Albert II, Xefe Governu, Ministru Estadu Michel Roger, no  ho Arsebispu Bernard Barsi. Objetivu vizita ida-ne’e nian atu hafoun no hametin relasaun espesiál entre Timor-Leste no Mónaku, ne’ebé hahú tiha ona iha tinan 35 ba kotuk.

Prinseza Grace Mónaku nian ne’ebé matebian tiha ona, iha tinan 1979, hala’o vizita ba-iha kampu refujiadu timoroan sira nian, iha Vale Jamor, fatin besik Lisboa, Portugál. Nu’udar testemuña ba kondisaun kampu refujiadu sira nian, Prinseza ne’e fó ona fundus ba kuidadu médiku no edukasaun refujiadu sira nian. Sua Alteza Serenísima Prínsipe Albert II kontinua hala’o nafatin servisu umanitáriu husi ninia inan matebian nian hodi ajuda halo maternidade rua iha Timor-Leste – Klínika Prínsipe Rainier III, iha Same, no Maternidade Prinseza Grace, iha Pássabe – nune’e mós projetu ida kona-ba  haburas ai-horis sándalu iha Lifau, Oekusi Ambenu.

Ministru Ágio Pereira entrega rasik ba Sua Alteza Serenísima Prínsipe Albert II karta ida hosi Primeiru-Ministru Xanana Gusmão, hamutuk ho kópia ninia livru ida “Estratéjia ba Futuru”, ho dedikasaun pesoál ba Sua Alteza Serenísima. Ministru Estadu  iha mós, oportunidade hodi fó hatene ba Sua Alteza Serenísima, ba Ministru Estadu  no ba Arsebispu kona-ba dezenvolvimentu ne’ebé Timor-Leste alkansa tiha ona, nune’e mós fó konvite ba sira atu bele hala’o vizita mai Timor-Leste iha tinan 2015, iha okaziaun komemorasaun kintu sentenáriu ne’ebé Portugés sira to’o iha Timor.

Delegasaun ne’e iha mós oportunidade hodi agradese ba Krús Vermella Mónaco nian ne’ebé fó apoiu ho laran luak ba konstrusaun Maternidade Prinseza Grace, iha Oekusi Ambenu, no loke odamatan ba projetu hamutuk sira ba tempu oin mai nian no mós asisténsia ba formasaun parteira sira nian.

Delegasaun ne’e inklui Embaixadór Timor-Leste ba Nasoens Unidas iha Jenebra, Marciano da Silva, no Asesora Espesiál Projetu Estratéjiku nian, Grace Phan, ne’ebé hasoru malu ho empreza ES-KO Mónaku nian atu buka hatene poténsia sinerjia iha komérsiu. Inklui mós iha  delegasaun ne’e Ministru Pereira ninia Señora, Yeni, no oan, AJ, hodi reflete no hafoun fali kona-ba dimensaun familiár  ba relasaun entre Timor-Leste no Prinsipadu Mónaku.

Embaixadór Marciano da Silva sei hein kredensiál ba Mónaku iha tinan 2015.