Vise-Ministru Negósius Estranjeirus no Koperasaun, Constâncio da Conceição Pinto simu vizita kortezia husi Estudante Vietnam sira, ne’ebé lidera husi Xefe Delegasaun Denh Vãn Tóan, iha loron 04 Dezembru, iha Sala Reuniaun Institutu Diplomátiku, MNEK.

Vizita estudu ne’e ho objetivu atu hametin relasaun amizade entre povo husi rai rua ne’e no atu fó oportunidade ba estudante sira atu partilha no hatene kona-ba sistema edukativu, interkambiu kulturál, istória no kontestu sosiál husi nasaun rua nian.

Vise-Ministru esklarese katak, “vizita ida ne’e hanesan follow-up ida ba desizoens ne’ebé Primeiru-Ministru halo bainhira halao vizita ofisial ba Vietnam. Durante visita, konkorda katak atu halo exchange visitors. Ne’ebé ita he’in katak ita-nian mós bele ba iha Vietnam. Ha’u hanoin buat ne’e di’ak tanba sira mai haree ita-nia rai, sira hasoru ema barak, aprende ita-nia kultura, ita-nia natureza. Sira ne’e ba sei koalia kona-ba ita-nia rai. Nemak sira agora sai hanesan ita-nia mensajeiru ba iha Vietnam. Ha’u hanoin kapas tebtebes.”

Iha reuniaun kortézia ho estudantes sira, Vise-Ministru akompaña husi Xefe Gabinete Interina ba Vise-Ministru, Marlina Malik ho Xefe Gabinete Interinu no Asesór ba Sekretáriu Estadu ba Assuntu ASEAN, Francisco Lemos dos Santos.