Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Dili, loron 28 fulan-novembru tinan 2014
Timor-Leste selebra aniversáriu da-39u Proklamasaun Independénsia
Iha loron 28 fulan-novembru tinan 1975, hafoin liu tiha besik tinan 400 hosi kolonializmu nia-ukun, Timor-Leste deklara nia independénsia. Ohin, Repúblika Demokrátika Timor-Leste komemora ninia aniversáriu ba da-39u ba eventu istóriku ida ne’e.
Komemorasaun sira hosi eventu ida ne’e sei hala’o iha distritu sanulu-resin-tolu nia laran.
Iha distritu Aileu, Prezidente Repúblika Demokrátika Timor-Leste, Taur Matan Ruak, Prezidente Parlamentu Nasionál, Vicente Guterres, Primeiru-Ministru, Kay Rala Xanana Gusmão, Prezidente Tribunál Rekursu, Guilhermino da Silva, no Sekretáriu – Jerál FRETILIN, Dr. Marí Alkatiri sei partisipa ba-iha serimónia hasa’e bandeira Nasionál nian.
Dr. Marí Alkatiri, nu’udar líder ida hosi fundadór sira ba Fretilin no Repúblika Demokrátika Timor-Leste no mós Sekretariu-Jerál Fretilin nian sei lee testu Proklamasaun Independénsia Repúblika Demokrátika Timor-Leste, ne’ebé lee ba dahuluk iha loron 28 fulan-novembru tinan 1975, hosi Prezidente Repúblika dahuluk, Francisco Xavier do Amaral.
Iha serimónia molok Loron Proklamasaun nian, iha loron 27 fulan-novembru, Prezidente Repúblika fó medalla ba timor-oan sira ne’ebé fó sira nia-vida hodi subar líder boot sira rezisténsia nian, inklui sira ne’ebé maka subar lider rezisténsia no Primeiru-Ministru atuál, Kay Rala Xanana Gusmão.