Prezidénsia Konsellu Ministrus (PKM), liuhusi Sentru Formasaun Téknika iha Komunikasaun (CEFTEC), entrega sertifikadu ba formandu finalista sira 2014 nian iha serimónia ida ne’ebé hala’o iha loron 21 fulan-novembru tinan 2014 iha Gráfika Nasionál, Dili.

Sekretáriu Estadu ba Fortalesimentu Institusionál nian, Francisco da Costa Soares, mai mós iha serimónia ne’e no iha ninia diskursu abertura nian, nia felisita formasaun kontínua ba funsionáriu Estadu nian sira iha língua, komunikasaun no teknolojia foun sira, no hahii tebetebes benefísiu sira husi formasaun rekursu umanu nu’udar dalan atu halo servisu instituisaun nasionál nian sira sai profisionál liután.

Iha enserramentu tinan letivu 2014 nian ne’e, tékniku hamutuk 92 husi instituisaun públika 35 maka hetan ona kualifikasaun. Sertifikadu lian portugés nian hamutuk 70 maka entrega tiha ona no tékniku profisionál na’in 23 husi Funsuan Públika maka hetan rezultadu pozitivu durante tuir Kualifikasun Nasionál iha Komunikasaun no Média ba setór públiku nível IV  husi INDMO.

Formasaun ida-ne’e hala’o iha kolaborasaun ho Programa Apoiu ba Simeira CPLP nian, ne’ebé estabelese parseria ida entre Ceftec no PQLP/CAPES, (Programa Kualifikasan iha Lian Portugés iha Timor-Leste husi Kooperasaun  Brazileira), husi kedas fulan-juñu tinan 2014.

Iha enserramentu serimónia ne’e nian, Artikuladora-Jerál PQLP/CAPES nian, Raquel Scartezini, felisita programa formasaun ne’e hodi dehan katak dalan nakloke ba posibilidade parseria nian iha futuru.