Sorumutu estraordináriu Konsellu Ministrus nian iha loron 24 fulan-novembru tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 24 Fulan-novembru Tinan 2014
Komunikadu Imprensa
Sorumutu estraordináriu Konsellu Ministrus nian iha loron 24 fulan-novembru tinan 2014
Konsellu Ministru hala’o sorumutuk estraordináriu iha segunda-feira ne’e, loron 24 fulan-novembru tinan 2014, iha sala sorumutuk Konsellu Ministrus nian, iha Palásiu Governu Dili, no aprova ona Proposta Nomeasaun Envidu Espesiál CPLP nian ba Guiné-Bisau no Guiné Ekuatoriál.
Dr. José Ramos Horta hanesan ema ne’ebé Governu propoin hodi kaer kargu ida ne’e, ne’ebé harii iha ámbitu Prezidénsia Rotativu Komunidade Nasaun sira Lian Portugés nian (CPLP) hosi Timor-Leste.
Guiné Ekuatoriál integra ona ba CPLP, iha fulan-jullu liubá, durante Simeira da-X husi Xefe Estadu sira no Governu, ne’ebé hala’o iha Dili no importante akompaña dezenvolvimentu sosiál no polítika nasaun ne’e nian, nune’e mós fó apoiu ne’ebé mak membru foun ne’e presiza ba ninia prosesu integrasaun iha Komunidade.
Guiné-Bisau, nasaun ne’ebé mak durante ne’e Timor-Leste fó ona apoiu espesiál, tanba ne’e importante atu akompaña nafatin prosesu tranzisaun ne’ebé mak sei difísil hela no manutensaun ba pás sosiál no polítika nian.
Tanba Timor-Leste mak prezide CPLP durante tinan 2 ne’e, no rekomendasaun sira husi Simeira fulan-jullu nian fó hanoin atu akompaña situasaun nasaun rua ne’e nian, no tanba simu tiha ona akordu husi membru-nasaun Komunidade nian sira seluk, Konsellu Ministru deside ona hodi hato’o ba Prezidente Repúblika atu hili Prémiu Nobel Pás no eis-xefe misaun Nasoins Unidas nian ba-iha Guiné-Bisau, Dr.José Ramos Horta, hodi kaer kargu Enviadu Espesiál CPLP nian ba Guiné-Bisau no ba Guiné Ekuatoriál.
