Ministru Estadu no Prezidénsia Konsellu Ministru no

  Porta-Vóz Ofisiál Governu Timor-Leste

 

Dili, loron 24 fulan-novembru tinan 2014

Ministru Defeza Nasionál Portugál vizita Timor-Leste iha ámbitu kooperasaun bilaterál ne’ebé sei hala’o hela

 

Ministru Defeza Nasionál Portugál, José Pedro Aguiar-Branco, sei vizita Timor-Leste iha loron 25 no 26 fulan-novembru. Ministru Aguiar-Branco sei partisipa iha sorumutuk lubun ida, inklui mós sorumutuk bilaterál ida ho Primeiru-Ministru no Ministru Defeza no Seguransa, Kay Rala Xanana Gusmão, no ho  Sekretáriu Estadu Defeza, Júlio Tomás Pinto.

Hahú kedas iha independénsia, mak Portugál fó apoiu ba dezenvolvimentu no profissionalizasaun ba Forsa Defeza sira Timor-Leste nian  [F-FDTL] no nia sai mós hanesan parseiru ida ne’ebé fó apoiu maka’as tebes liuhusi inisitiva lubun ida, disponibiliza asesór sira, fó formasaun baze no formasaun ba funsionáriu sira no selesaun ba ofisiál timoroan sira iha Portugál. Kooperasaun iha setór Defeza nian define tuir akordu lubun ida, hahú hosi Akordu Kooperasaun Tékniku-Militár entre Repúblika Portugeza no Repúblika Demokrátika Timor-Leste, ne’ebé asina tiha iha Díli, iha loron Reataurasaun Independénsia nian, loron 20 fulan-maiu tinan 2002. Programa-Kuadru Kooperasaun Tékniku-Militár Luso-Timorense, hosi tinan 2014 to’o 2016, asina ona hahú tinan ida ne’e iha Lisboa, iha loron 5 fulan-fevereiru tinan 2014.

Durante vizita Ministru José Pedro Aguiar-Branco, sei asina mós Memorandu Entendimentu ida kona-ba Sentru Lian Portugés iha Metinaru. Sentru ne’e sei iha ninia knaar atu hanorin habelar lian no kultura portugeza ba militár sira, liuhosi kria kursu lian nian no atividade hirak seluk ne’ebé komplementár, ho ninia baze iha Kuartél F-FDTL iha Metinaru. Timor-Leste mak selu despeza   konstrusaun no sosa ekipamentu ba Sentru, no Portugál mak sei fó ninia asesoria ba-iha konstrusaun no ekipamentu no kria programa no konteúdu adisionál sira. Portugál sei fó formadór no monitór sira, tuir akordu ne’ebé defini tiha ona iha akordu ida uluk.

Portavós Governu nian Ágio Pereira, hatete katak “Governu no membru sira Forsa Defeza Timor-Leste nian, hahí’i tebes ba Portugál ninia asiténsia ba-iha setór Defeza. Governu hein de’it momentu ne’ebé sei to’o mai atu hodi fó boazvindas ba Ministru Aguiar-Branco.”