Governu Timor-Leste liu husi Sekretária Estadu Joventude no Desportu no Sri Chinmoy ONENESS-HOME, PEACE RUN, hala’o atividade Halai  Dame Nian,  ne’ebé hahú husi estátua Sri Chinmoy, iha Parlementu Nasionál nia oin no lori toxa dame nian halai haleu to’o finál iha edifísiu Palásíu Governu nia oin, iha loron 9, fulan Novembru, tinan  2014.

Objetivu prinsipál husi Atividade refere, atu promove pás no dame iha rai laran, iha programa Halai Dame Nian ne’e mós hetan partisipaun máximu husi alunus nivél sekundária, Estudante universitáriu, atleta sira, populasaun sira no mós komunidade internasionál sira ,seremónia ne’e integra iha programa selebrasaun Estadu nian ba Loron Juventude Nasionál.

Prezidente Parlementu Nasionál, Vicenti Guterres ,iha intervensaun hatete, hanesan órgaun soberania ami nia solidáriu ho inisiativa ne’ebé di’ak tebtébes ba programa Halai Dame Nian ne’e, la’ós iha Kurrida de’it mak iha pás maibé pás lorloron tenki iha ita nia fuan, ita nia laran no mós iha ita nia família nia laran,  pás tenki hahú uluk husi buat kiik oan sira hanesan labele ko’alia liafuan kroat ba malun, tenki uza liafuan mamar ba malun, pás hahú husi família nia laran, iha nasaun nia laran no mós ho relijiaun tomak iha mundu.

“Husu ba ba órgaun soberania hotu-hotu bainhira atu hetan pás iha nasaun nia laran tenki iha separasaun de poderes tanba tenki servisu hamutuk atu bele haforsa  ita nia rai, hodi hala’o demokrásia no justisa loloos, ida ne’e mak kna’ar estadu nian hodi bele fó pás ba sosiedade tomak, tanba bainhira estadu funsiona  ho di’ak  ita mós bele ona hetan pás iha nasaun nia laran, tanba Pás ne’ebé mak harii iha justisa no direitu nia laran, ida ne’e pás ne’ebé loos”, dehan Vicenti.

Iha fatin hanesan, Diretór Ezekutivu, Salil Wilson hatete katak,Halai Dame Nian  ne’e hanesan pás ba  mundu, domin ba mundu no armónia ba mundu, buat sira ne’e hotu defísil atu ita hetan iha desionáriu nia laran, maibé ida ne’e mak realidade tébes akontese, esperiénsia ne’ebé mak ami hetan liu husi Halai Dame Nian  hatudu katak,  buat ne’ebé ami hala’o ne’e tébes duni no hala’o duni iha ne’e.

Diretór ne’e esplika liután, ”Ami hato’o agradese no obrigado ba ita-boot sira nia partisipasaun iha atividade sira ne’ebé ita hala’o  hamutuk, hatudu duni ita-boot sira nia domin mai ami no ami senti katak, buat sira ne’e hotu labele hakerek ho liafuan maibé hatudu liu hosi sentimentu, Timor-Leste hanesan nasaun ne’ebé kiik liu, maibé nasaun Timor-Leste hela duni ho domin no pás nia laran.

 Ami liu ona  husi nasaun 140, maibé laiha nasaun ida ami senti domin ida mak á s hanesan iha Timor-Leste  ne’e, ami senti katak, Timor-Leste hanesan nasaun ne’ebé mak  bele hato’o duni mensazen husi Sri Chinmoy nian, ha’u mós hakarak  hato’o mensazen husi Sri Chinmoy bainhira nia mai vizita iha fulan Janeiru, tinan  2004,”  Ha’u hakneak tébes ba espíritu  Timor nian, ha’u hakneak ba ita nia eroi sira ne’ebé mak halo luta naruk tébes no halo buat barak ba nasaun ne’e”.