………………………………………………………………………………………………………………
Díli, Loron 11 Fulan-novembru Tinan 2014
Komunikadu Imprensa
Sorumutu Konsellu Ministrus loron 11, fulan novembru, tinan 2014
Konsellu Ministrus hala’o sorumutu iha Tersa-feira loron 11, fulan-novembru, tinan 2014, iha sala sorumutuk Konsellu Ministrus nian, iha Palásiu Governu, iha Dili, no aprova ona diploma rua no projetu rua:
1. Alterasaun ba da-3 Dekretu Governu nian, n.u 1/2014, loron 12, fulan-fevereiru, kona-ba Ezekusaun Orsamentu Jerál Estadu nian ba Tinan 2014
Dekretu Governu nian n.u 1/2014, loron 12, fulan-fevereiru, kona-ba Ezekusaun Orsamentu Jerál Estadu nian ba tinan 2014, ne’ebé estabelese regra hirak ne’ebé mak presiza atu hala’o Orsamentu Jerál Estadu nian (OJE) ba tinan 2014, no hetan aprovasaun hosi Lei n.u 2/2014, kona-ba OJE nian, ba tinan 2014.
Daudaun ne’e, mosu nesesidade atu halo alterasaun ba diploma ida ne’e, ho objetivu atu altera regra jerál hirak kona-ba atu hakotu ezersísiu orsamentu nian, hodi nune’e bele fó fleksibilidade ida boot liu ba kazu hirak ne’ebé bele justifika.
2. Obra konstrusaun kanál irrigasaun nian sira iha Oebaba
Konsellu Ministrus aprova ona faze da-ruak ba konstrusaun kanál irrigasaun nian iha Oebaba, iha sub-distritu Zumalai, Distritu Suai-Covalima, ne’ebé mak uza teknolojia ida maka’as tebes atu bele garante seguransa ba kanál sira no ba sira nia sustentabilidade.
3. Adenda ba kontratu ho Free Balance Inc.
Konsellu Ministrus analiza ona nesesidade konstrusaun servisu adisionál nian sira, ne’ebé empreza jestaun finanseira ida ne’e mak hala’o. Servisu adisionál hirak ne’e mak: melloramentu, dezenvolvimentu, instalasaun, implementasaun no teste ba funsionalidade hirak ne’ebé foun, nune’e mós ba funsionalidade sistema jestaun finanseira nian hirak hadi’a tiha ona, aleinde formasaun ba funsionáriu hirak servisu ba funsionalidade hirak foun ne’e.
Empreza Free Balance Inc. ne’e, hanesan atu fó hanoin-de’it katak nia mak hetan kontratu hosi Estadu Repúblika Demokrátika Timor-Leste nian iha Tinan 2010 atu fó apoiu ba Implementasaun no Jestaun ba Solusaun no Planeamnetu Rekursu Governu nian sira (Implementation and Management of Government Resources Planning ‘GRP’ solutions).
Adenda ba Kontratu ho Free Balance Inc. ida ne’e ninia objetivu mak atu kontinua hadi’a no hala’o lailais liután reforma ba Jestaun Públiku Finanseiru nian.
4. Dekretu-lei ne’ebé aprova pagamentu saláriu báziku fulan ida nian ba setór públiku
Hanesan akontese ona iha tinan hirak uluk liubá, Konsellu Ministrus desidi atu aprova pagamentu estraordináriu, ne’ebé úniku, ba saláriu baze fulan ida nian ba sira ne’ebé mak iha ligasaun ho Dekretu-Lei id ne’e.
Desizaun ida ne’e atu fó valór ba Administrasaun Públika, liuhosi rekoñesimentu ba ninia rekursu umanu sira nia servisu.