Sorumutu estraordináriu Konsellu Ministrus loron 31 fulan-outubru tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 31 Fulan-outubru Tinan 2014
Komunikadu Imprensa
Sorumutu estraordináriu Konsellu Ministrus loron 31 fulan-outubru tinan 2014
Governu hala’o sorumutu estraordináriu iha sesta-feira, loron 31 fulan-outubru 2014, iha sala sorumutuk Konsellu Ministrus nian, iha Palásiu, iha Dili, no aprova ona alterasaun ba diploma rua:
1. Alterasaun daruak ba Dekretu Governu nu. 1/2014, loron 12 fevereiru, kona-ba Ezekusaun Orsamentu Jerál Estadu nian, ba Tinan 2014
Dekretu Governu nu. 1/2014, loron 12 fevereiru, estabelese ona regra hirak presiza atu ezekuta Orsamentu Jerál Estadu nian (OJE) ba tinan 2014, ne’ebé aprova ona husi Lei n.u 2/2014, loron 5 fevereiru, kona-ba OJE ba 2014 nian.
Alterasaun ida ne’e ajusta regra hirak jerál kona-ba atu taka ezekusaun orsamentu nian, no retifika alterasaun ne’ebé halo ho baze iha garantia bankária sira.
2. Alterasaun ba dahuluk Dekretu-Lei nu. 31/2009, loron 18 novembru, ne’ebé aprova Estatutu Pesoál Servisu Migrasaun nian
Dekretu-lei n.u 31/2009, loron 18 novembru, ne’ebé aprova Estatutu pesoál Servisu Migrasaun nian, kria programa rekonvensaun profisionál ida ne’ebé permite elementu hirak iha kareira Polisia Nasionál Timor-Leste nian atu ba fali iha kareira Migrasaun nian, bainhira sira kompleta ona rekizitu sira. Tuir diploma ida ne’e, estabelese tiha ona períodu tranzitóriu ida ba rekonvensaun, ho prazu ida to’o de’it tinan lima, prazu ida ne’e remata iha loron 18 novembru 2014.
Bainhira programa refere seidauk bele implementa, maka alterasaun ida ne’e, bele hanaruk tan prazu ba períodu tranzitóriu nian no difini fali kompozisaun juri nian ba prosesu rekonvensaun.
Konsellu Ministrus mós analiza ona aprezentasaun rua:
1. Aprezentasauan kona-ba progresu Ezekusaun Orsamentu Jerál Estadu nian ba 2014
Ekipa Tékniku Ministru Finansas nian ida, aprezenta ona ba Konsellu Ministrus, dadu kuantitativu hirak kona-ba kondisaun atuál Orsamentu Jerál Estadu nian ba 2014.
2. Aprezentasaun Orsamentu Jerál Estadu nian ba 2015
Ekipa téknika Ministériu Finansas nian ida aprezenta tiha ona ba Konsellu Ministrus panorama ida kona-ba Orsamentu Jerál Estadu nian ba 2015, hodi ko’alia kona-ba kestaun hirak hanesan planeamentu no panorama ekonómiku paíz ida ne’e nian, ezekusaun OJE 2014 nian no politika hirak prinsipál ne’ebé prevee tiha ona ba tinan 2015.
