Primeiru-Ministru partisipa iha Forum Ekonómiku Mundu Islámiku da-10 nian
Primeiru-Ministru, Xanana Gusmão sai husi Díli domingu ida ne’e, loron 26 fulan-outubru, ba Dubai hodi partisipa iha Fórum Ekonómiku Mundu Islámiku (FEMI) da-10 nian. Konvite mai husi Prínsipe sira Xeque Mohammed Bin Rashid Al Maktoum, Vise-Prezidente no Primeiru-Ministru Emiradu Árabes Unidos no Emir husi Dubai no Sua Exelénsia Tun Musa Hitam, Prezidente Fundasaun Fórum Ekonómiku Mundu Islámiku nian, Primeiru-Ministru sei hato’o ninia diskursu prinsipál ida durante Sesaun Abertura, iha loron 28 fulan-outubru tinan 2014.
Hamutuk ho Primeiru-Ministru partisipa mós Xefe Estadu no Governu nian barak, inklui mós Primeiru-Ministru Malázia, Prezidente sira husi Kazakistaun no Repúblika Populár Bangladexe, no seluk tan. Iha Forum ida ne’e sei partisipa mós responsável polítiku sira, líder emprezariál no akadémiku nia sira.
FEMI disponibiliza plataforma mundiál ida importante atuhodi diskuti abordajen foun kona-ba kooperasaun internasionál no kona-ba kolaborasaun ekonómika, atu nune’e bele harii parseria iha mundu musulmanu no mós la’ós musulmanu nia laran.Tema ba FEMI da-10 ida ne’e kona-ba “Parseria Inovadora ba Kresimentu Ekonómiku” no Primeiru-Ministru sei halo diskursu entre emprezáriu musulmanu no mós la’ós musulmanu nian sira, tuir perspetiva Timor-Leste nian.
Tuir Primeiru-Ministru katak “Fórum Ekonómiku Mundu Islámiku ne’e nu’udar eventu ida importante atuhodi fortalese solidariedade internasionál no habelar toleránsia, kompreensaun no progresu, liu-liu iha tempu ohin loron nian la hakmatek”.
Hosi Dubai, Xanana Gusmão ba fali Abu Dhabi hodi halo sorumutu ho empreza públika dezenvolvimentu sira, atu diskuti forma oinsá Árabe Unidos mak apoia hela kreximentu no diversifikasaun ba nia ekonomia, liuhusi investimentu xave iha infraestrutura sosiál sira. Primeiru-Ministru sei halo mós sorumutu ho funsionáriu responsável sira husi investimentu rikusoi minarai país nian no diskuti abordajen kona-ba jestaun ba nia fundu petrolíferu no nia perspetiva ba tempu oin mai. Xanana Gusmão mós sei partisipa iha han-kalan ida ho dirijente polítiku boot sira husi Emirados Árabes Unidos no líder emprezariál sira, ne’ebé nia sei iha biban atu ko’alia kona-ba dezenvolvimentu ekonomia Timor-Leste nian no kona-ba biban ba investimentu husi rai li’ur ba-iha nasaun.
Iha Abu Dhabi Primeiru-Ministu akompaña husi Ministra Finansas, Emília Pires, Vise-Governadór Banku Mundiál Timor-Leste no Prezidente Konsellu Konsultivu Investimentu Fundu Petrolíferu Timor-Leste nian.
Primeiru-Ministru sei fila hikas mai Díli iha loron 3 fulan-novembru.
