Inaugurasaun edifísiu foun embaixada Timor-Leste iha Bruxelas
Ministru Estadu Negósiu Estranjéiru no Kooperasaun (MNEK), José Luis Guterres ofisiálmente inagura edífisiu foun ba Embaixada Timor-Leste iha Avenue de Tervuren 102 Bruxela, Béljika, Kuarta-feira, 15 Outubru 2014.
Partisipa iha serimónia ne’e, membru Parlamentu Nasionál Timor-Leste, David dias Ximenes, Ministru Justisa, Dionisio Babo, Embaixadór Timor-Leste ba Bruxela, Béljika, Nelson dos Santos, Diretór Jerál MNEK, João Freitas Camara, Adjuntu National Authorizing Officer (NAO), Madalena F. M. Hanjam Costa Soares no delegasaun seluk tan hosi Timor-Leste.
Partisipa mós hosi Deputadu Parlamentu Uniaun Europeia nian balun, Embaixadór sira no sidadaun Bruxela ne’ebé durante ne’e apoia Timor-Leste.
‘‘Ha’u senti kontenti tebes, ohin mai iha ne’e inaugura edifísiu foun Embaixada Timor nian. Ne’e marka tan pasu importante ida ba povu no nasaun Timor-Leste. Tanba liuhosi edifísiu foun ida-ne’e, bele fasilita di’ak liután servisu Embaixada nian iha Bruxela,’’ Ministru José Luis Guterres deklara iha serimónia inaugurasaun Embaixada Timor Leste.
Entertantu, iha parte seluk Ministru José Luis Guterres akompaña hosi Ministru Justisa Dionisio Babo, Deputadu David Dias Ximenes, Embaixadór Nelson Dos Santos ho delegasaun, hala’o sorumutu ho Membru Parlamentu Uniaun Europeia ne’ebé lidera hosi Deputada Ana Gomes iha Parlamentu Uniaun Europeia.
Sorumutu ne’e hanesan parte ida atu hametin liután kooperasaun entre Timor-Leste ho Komisaun Uniaun Europeia, nune’e mós ko’alia kona-ba progresu dezenvolvimentu, páz no estabilidade iha Timor-Leste.
